ଭୁବନେଶ୍ୱର, ୧୫ା୪(ବ୍ୟୁରୋ): କରୋନା ଯୋଗୁ ବିପୁଳ କ୍ଷତି ସହିଥିବା ରାଜ୍ୟର ହୋଟେଲ ଏବଂ ଟ୍ରାଭେଲ ଟ୍ରେଡ୍ ଇଣ୍ଡଷ୍ଟ୍ରି ଆଗାମୀ ଦିନରେ ଆହୁରି କ୍ଷତିଗସ୍ତ ହେବା ଆଶଙ୍କା କରାଯାଉଛି। ଲକ୍ଡାଉନ୍ ଯୋଗୁ ହୋଟେଲ ଶିଳ୍ପକୁ ବଡ଼ ଝଟ୍କା ଲାଗିଛି। ସେହିପରି ଫନୀ ଯୋଗୁ ୨ ହଜାର କୋଟିରୁ ଊର୍ଦ୍ଧ୍ୱ ଟଙ୍କାର କ୍ଷତି ସହିଥିବା ରାଜ୍ୟ ପର୍ଯ୍ୟଟନ ଶିଳ୍ପ ଏଥର ଗୁରୁତର ଆର୍ଥିକ ସଂକଟର ସମ୍ମୁଖୀନ ହେବାକୁ ଯାଉଛି। ଓଡ଼ିଶାକୁ ବାର୍ଷିକ ପ୍ରାୟ ୧.୫ କୋଟି ପର୍ଯ୍ୟଟକ ଆସୁଥିବାବେଳେ ଏମାନଙ୍କ ମଧ୍ୟରୁ ବିଦେଶୀଙ୍କ ସଂଖ୍ୟା ଲକ୍ଷାଧିକ ରହିଥାଏ। ସେହିଭଳି ଅନ୍ୟ ରାଜ୍ୟରୁ ପ୍ରାୟ ୫୮ ଲକ୍ଷ ଓ ରାଜ୍ୟ ଭିତରୁ ୮୫ ଲକ୍ଷ ପର୍ଯ୍ୟଟକ ବିଭିନ୍ନ ପର୍ଯ୍ୟଟନସ୍ଥଳୀକୁ ଯାଇଥାନ୍ତି। ହେଲେ କରୋନା ଓ ଲକ୍ଡାଉନ୍ ପାଇଁ ପର୍ଯ୍ୟଟନସ୍ଥଳୀ ଖାଁଖଁା ହୋଇପଡିଥିବାବେଳେ ହୋଟେଲ ଶିଳ୍ପ ଠପ୍ ହୋଇଯାଇଛି। ଲକ୍ଡାଉନ୍ ସରିବା ପରେ କେନ୍ଦ୍ର ଓ ରାଜ୍ୟ ସରକାର ପର୍ଯ୍ୟଟନ ଏବଂ ହୋଟେଲ ଶିଳ୍ପର ପୁନରୁତ୍ଥାନ ଲାଗି ମାଷ୍ଟରପ୍ଲାନ୍ ପ୍ରସ୍ତୁତ କରିବାକୁ ପରାମର୍ଶ ଦେଇଛି ହୋଟେଲ ଆଣ୍ଡ୍ ରେଷ୍ଟୁରାଣ୍ଟ ଆସୋସିଏଶନ୍ ଅଫ୍ ଓଡ଼ିଶା(ଏଚ୍ଆର୍ଏଓ)। ଉଭୟ ଦୀର୍ଘମିଆଦି ଓ ସ୍ବଳ୍ପମିଆଦି ସ୍ତରରେ ବିକାଶ ଲାଗି ପ୍ରସ୍ତାବ ଦିଆଯାଇଛି। ବିଶେଷକରି ମାଇସ୍ ଟୁରିଜିମ୍କୁ ଫୋକସ୍ କରିବା ସହ ରାଜ୍ୟର ପ୍ରମୁଖ କର୍ପୋରେଟ୍ ସଂସ୍ଥା ନିଜର ସେମିନାର, ମିଟିଂ, କନ୍ଫରେନ୍ସ ଭଳି ବଡ଼ ବଡ଼ କାର୍ଯ୍ୟକ୍ରମକୁ ଆଗାମୀ ୨ ବର୍ଷ ପାଇଁ ରାଜ୍ୟ ମଧ୍ୟରେ ଥିବା ହୋଟେଲଗୁଡ଼ିକରେ ଆୟୋଜନ କରିବାକୁ ଅନୁରୋଧ କରାଯାଇଛି।
ଅନ୍ୟପକ୍ଷରେ ପର୍ଯ୍ୟଟକଙ୍କ ଲାଗି ଓଡ଼ିଶା ସୁରକ୍ଷିତ ବୋଲି ରାଜ୍ୟ ସରକାର ଏବଂ ରାଜ୍ୟ ପର୍ଯ୍ୟଟନ ଏକ ବ୍ୟାପକ କ୍ୟାମ୍ପେନ୍ କରିବା ଆବଶ୍ୟକ। ନୂଆ ଟୁରିଜମ୍ ପଲିସି ଆଣି ପର୍ଯ୍ୟଟନ ଭିତ୍ତିଭୂମିର ବିକାଶ କରାଯିବା ଉଚିତ୍। ପର୍ଯ୍ୟଟନ ବିଭାଗ ଅଧିକାରୀଙ୍କ ସହ ଏଚ୍ଆର୍ଏଓ ସଦସ୍ୟଙ୍କୁ ନେଇ ଏକ ସ୍ବତନ୍ତ୍ର କୋଭିଡ୍ ଟାକ୍ସଫୋର୍ସ ଗଠନ କରି ତା’ ମାଧ୍ୟମରେ ସ୍ବତନ୍ତ୍ର ସହାୟତା ପ୍ୟାକେଜ୍ ପ୍ରସ୍ତୁତ କରିବାକୁ ମତ ରଖିଛି ଆସୋସିଏଶନ। ଆଗାମୀ ଦିନରେ ବିଏମ୍ସି, ଶକ୍ତି ବିଭାଗ, ଅର୍ଥ ଓ ସମବାୟ ବିଭାଗ ଭଳି ବିଭିନ୍ନ ବିଭାଗ ସହ ଆସୋସିଏଶନ ଆଲୋଚନା କରିବ ବୋଲି ଏଚ୍ଆର୍ଏଓ ଅଧ୍ୟକ୍ଷ ଜେ. କେ. ମହାନ୍ତି କହିଛନ୍ତି। ପର୍ଯ୍ୟଟନ ସଚିବ ବିଶାଳ ଦେବ ଟେଲି କନ୍ଫରେନ୍ସ ଯୋଗେ ଆସୋସିଏଶନ ସଦସ୍ୟଙ୍କ ସହ ଆଲୋଚନା କରିଥିବାରୁ ଏଚ୍ଆର୍ଏଓ କୃତଜ୍ଞତା ଜଣାଇଛି। ଏଥିସହ ୩ ମାସ ପରିବର୍ତ୍ତେ ୧ ବର୍ଷ ପର୍ଯ୍ୟନ୍ତ ହୋଟେଲ ଶିଳ୍ପକୁ ଋଣ ଓ ସମସ୍ତ ଇଏମ୍ଆଇ କୋହଳ କରିବାକୁ ଅନୁରୋଧ କରାଯାଇଛି। ପରିସ୍ଥିତି ସ୍ବାଭାବିକ ନ ହେବା ପର୍ଯ୍ୟନ୍ତ ବ୍ୟାଙ୍କ୍ଗୁଡ଼ିକୁ କୋହଳ ନୀତି ଅବଲମ୍ବନ କରିବାକୁ ରାଜ୍ୟ ସରକାର ନିର୍ଦ୍ଦେଶ ଦେବା ଉଚିତ୍। ଏହାବ୍ୟତୀତ ହୋଟେଲ ଶିଳ୍ପ ଉପରୁ ଜିଏସ୍ଟି ଓ ଏସ୍ଜିଏସ୍ଟି ନିଆ ନ ଯାଉ। ବିଏମ୍ସି ହୋଲ୍ଡିଂ ଟ୍ୟାକ୍ସ, ବାର୍ ଲାଇସେନ୍ସ ଫି, ଗ୍ରାଉଣ୍ଡ୍ ୱାଟର ଫି, ଇଲେକ୍ଟ୍ରିସିଟି ଫି ଆଦିକୁ କିଛି ମାସ ପାଇଁ ଛାଡ଼ କରାଯାଉ। କର୍ମଚାରୀମାନଙ୍କୁ ଠିକ୍ ସମୟରେ ଦରମା ଦେବାକୁ ଓଡ଼ିଶା ଶ୍ରମିକ ମଙ୍ଗଳ ପାଣ୍ଠିରୁ ସହାୟତା ପ୍ରଦାନ କରିବାକୁ ଏଚ୍ଆର୍ଏଓ ଅଧ୍ୟକ୍ଷ ମହାନ୍ତି ଦାବି କରିଛନ୍ତି।
