ବେଙ୍ଗାଲୁରୁ ୧୭ା୬ (ପି.ଟି.): ଭାରତୀୟ ପୁରୁଷ ହକି ଦଳର ପୂର୍ବତନ ହକି କୋଚ୍ ରମେଶ ପରମେଶ୍ୱରନ ସମ୍ମାନଜନକ ଦ୍ରୋଣାଚାର୍ଯ୍ୟ ପୁରସ୍କାର ପାଇଁ ଆବେଦନ କରିଛନ୍ତି। କୋଚିଂରେ ଉଲ୍ଲେଖନୀୟ ସଫଳତା ହାସଲ କରିଥିବା କୋଚ୍ଙ୍କୁ ଦେଶର ଏହି ସର୍ବୋଚ୍ଚ ସମ୍ମାନ ଦିଆଯାଇଥାଏ। ହକି ଇଣ୍ଡିଆ ପୂର୍ବରୁ ବି.ଜେ. କାରିଆପ୍ପା ଓ ରମେଣ ପଠାନିଆଙ୍କ ନାମ ଦ୍ରୋଣାଚାର୍ଯ୍ୟ ପୁରସ୍କାର ପାଇଁ ସୁପାରିସ କରିସାରିଛି। ୭୦ ବର୍ଷୀୟ ରମେଶଙ୍କ ଆବେଦନ ପତ୍ରରେ ୧୯୮୦ ଅଲିମ୍ପିକ ସ୍ବର୍ଣ୍ଣ ପଦକ ବିଜୟୀ ଦଳର ଅଧିନାୟକ ବାସୁଦେବନ ବାସ୍କରନ, ପୂର୍ବତନ ଜାତୀୟ କୋଚ୍ ଏମ୍.କେ କୌଶିକ୍, ଦିଲୀପ ତିର୍କୀ ଓ ଆଶିଷ ବଲାଲଙ୍କ ସମେତ ଅନ୍ୟକେତେଜଣଙ୍କ ସମର୍ଥନ ରହିଛି। ରମେଶ ଜଣେ ଜୁନିୟର ଖେଳାଳିରୁ ଜାତୀୟ କୋଚ୍ ହୋଇପାରିଥିଲେ। ତାଙ୍କ ହକି କ୍ୟାରିୟରରେ ଉତ୍ଥାନ ଓ ପତନ ଏବଂ ସଫଳତା ଓ ବିଫଳତାର ଯଥେଷ୍ଟ ଅନୁଭୂତି ରହିଛି। ୨୦୧୫ରୁ ସେ କର୍ନାଟକ ହକି ଏକାଡେମୀରେ ଯୁବ ପ୍ରଭାମାନଙ୍କ ମେଣ୍ଟର ଉପଦେଷ୍ଟା ଭାବେ କାର୍ଯ୍ୟକରି ଆସୁଛନ୍ତି। ରମେଣ ୧୯୬୯ରେ ମହୀଶୂର ତରଫରୁ ଜାତୀୟ ଜୁନିୟର ଚାମ୍ପିୟନଶିପ୍ ଖେଳିଥିଲେ। ୧୯୭୮ରେ ସେ ଜାତୀୟ ଦଳର ସଦସ୍ୟ ହୋଇ ପାରିଥିଲେ। ବ୍ୟାଙ୍କକ୍ ଏସିଆନ ଗେମ୍ସରେ ଏକ ରୌପ୍ୟ ଜିତିବାରେ ସମର୍ଥ ହୋଇଥିଲେ। ବାଙ୍ଗାଲୋରସ୍ଥିତ ରିଜର୍ଭ ବ୍ୟାଙ୍କ୍ ଅଫ୍ ଇଣ୍ଡିଆରେ ଯୋଗଦାନ ପରେ ରମେଶ ୧୯୮୫ରେ ଜାତୀୟ ସିନିୟର ଚାମ୍ପିୟନଶିପ୍ ପାଇଁ କର୍ନାଟକ ଦଳକୁ ଟ୍ରେନିଂ ଦେଇଥିଲେ। ଦଶନ୍ଧି ପରେ ଭାରତୀୟ ଦଳର ସହକାରୀ କୋଚ୍ ଭାବେ ନିଯୁକ୍ତି ପାଇଥିଲେ। ୨୦୦୮ ପର୍ଯ୍ୟନ୍ତ ସେ ଏହି ପଦବୀରେ ରହିଥିଲେ। ପରେ ସେ ଇଣ୍ଡିଆନ ଅଏଲ୍ ଦଳ ଦାୟିତ୍ୱରେ ରହିଥିଲେ। ତାଙ୍କ ତତ୍ତ୍ୱାବଧାନରେ ଏହି ଦଳ ଜାତୀୟସ୍ତରରେ ଅନେକ ଟୁର୍ନାମେଣ୍ଟ ଜିତିଥିଲା।
