ବିନିକା,୧୬।୧୨ (ଡି.ଏନ୍.ଏ.)- ସୁବର୍ଣପୁର ଜିଲା ବିନିକା ବ୍ଲକ ସେଲେଡ଼ି ପଁଚେତ୍ ତୁଲୁଣ୍ଡିପାଲି ଗଁାର ହରିଜନ ପଡ଼ାର ବିକୀର୍ତ୍ତନ ନାଗ(୩୧)। ପରିବାର କହେଲେ ବାପ୍ ରମେଶ ନାଗ, ମା’ ସୁବିଧା, ମାଏକିନା ଦେବାଳୀ, ଭାଇ ସଂକୀର୍ତ୍ତନ, ଝି’ ନିହାରିକା ଆର ପୁଓ ଶୁଭମକେ ନେଇ ସଁସାର। ପରିବାରଟା ନିହାତି ଗରିବ୍ ହେଇଥିଲାବେଲେ ଚାଲଛପର ଘରଖଁଡ଼େ ଛାଡ଼ି ସଁପତି ବଲି କିଛି ନାଇଁ। ବିକୀର୍ତ୍ତନ ଆର ସଂକୀର୍ତ୍ତନ ଦୁଇ ଭାଇ କୁଲିମଜୁରି କରି ପରିବାର ଚଲଉଥିଲେ। ହେଲେ ହଠାତ୍ ୨୦୧୪ ସାଲେ ସଂକୀର୍ତ୍ତନକଁର ମେରୁହାଡ଼ରେ ଅସ୍ବିଧା ଦେଖାଦେଲା। ଏନ୍ତାଥି ବଡ଼ଭାଇ ବିକୀର୍ତ୍ତନ ଭାଇକେ ଧରି ଭୁବନେଶ୍ୱର କଳିଙ୍ଗ ହସ୍ପିଟାଲ ଆର ପଛେ କିମ୍ସ ହସ୍ପିଟାଲରେ ଭରତି କଲେ। ଡାକ୍ତର ପରୀକ୍ଷା ନିରୀକ୍ଷା କରି ମେରୁହାଡ଼ରେ ଅପରେଶନ ଦରକାର ଆର ଇଥିର ଲାଗି ବହୁତ୍ ଟଁକା ଦରକାର ବଲି କହେଲେ। ଏନ୍ତାଥି ବିକୀର୍ତ୍ତନ ଟଁକା ପଏସା ଅଭାବୁ ମୁହୁକାନ ଶୁଖେଇ ଭାଇକେ ଧରି ଘରକେ ଫିରିଆଏଲେ। ସେଦିନ୍ଠାନୁ ସଂକୀର୍ତ୍ତନ ଘରେ ଅକରମା ହେଇ ପଡ଼ିଛନ୍। ଇତାର ପରେ ୨୦୧୭ରେ ବିକୀର୍ତ୍ତନକଁର ମାଏକିନା ଦେବାଳୀର ମୁଡ଼ଦୁଖା ହେଇ ଆଏଁଖ୍ ନାଇଁ ଦିଶ୍ଲା। ବିକୀର୍ତ୍ତନ ଦେବାଳୀକୁଁ ବୁର୍ଲାରେ ଭରତି କଲେ। ସେଠାନେ ଡାକ୍ତର ଦେବାଳୀକୁଁ ମାଙ୍ଗାଲୋର ନିମାନ୍ସକେ ନେବାକେ ପରାମଶ ଦେଲେ। ନିମାନ୍ସରେ ଡାକ୍ତର କିଛି ଉଷୋକଷା ଲେଖି ଦେଇ ମାସେ ଉତାରୁ ଆଏବ ଅପରେଶନ କରବାକେ ପଡ଼ବା, ଅପରେଶନ କଲେ ଦେବାଳୀକଁର ଆଏଁଖ୍ ଦିଶବା ବଲି କହିଥିଲେ। ହେଲେ ବିକୀର୍ତ୍ତନ ଭାଇ ଆର ମାଏକିନାର ଚିକିଛାରେ ସବୁ ବିକିଭାଂଗି ସରବ୍ସୁଅଁାତ୍ ହେଇଛନ୍। ଇଆଡ଼େ ୭ ପରାନୀ କୁଟୁମ ପୁଷ୍ବାର ବୋଝ୍ରେ ସଁଥ୍ଲି ହେଉଛନ୍। ଏହେଦେ ବିକୀର୍ତ୍ତନ ଭାଇ ଆର ମାଏକିନାର ଚିକିଛା ଚିନ୍ତାରେ ଘାରି ହେଉଛନ୍। ଏନ୍ତାଥି ଗଲା ୯ ତାରିଖ ବିନିକା ବ୍ଲକରେ ଅନୁଷ୍ଠିତ ଜନଶୁନାନି ଶିବିରରେ ଦୁଇ ଭାଇ ଯାଇ ଜିଲାପାଲକୁଁ ଚିକିଛା ସାହାଯ୍ ଲାଗି ଗୁହାରି କରିଥିଲେ। ଜିଲାପାଳ ସଂକୀର୍ତ୍ତନକଁର ଚିକିଛା କଟକ ବଡ଼ ଡାକ୍ତରଖାନାରେ କରବାକେ ସ୍ବାସ୍ଥ୍ୟ ବିଭାଗକେ ନିରଦେଶ ଦେବାର ସଂଗେ ମୁଖ୍ୟମନ୍ତ୍ରୀ ରିଲିଫ ଫଣ୍ଡରୁ ୬ ହଜାର ଟଁକା ଦେଇଛନ୍। ସେନ୍ତା ଗଲାମାସ ଦେବାଳୀକୁଁ ଦିବ୍ୟାଙ୍ଗ ଭତା ମିଲିଛେ। ହେଲେ ୭ ପରାନୀ କୁଟୁମ ଗୁଟେ ଝୁପ୍ଡ଼ିରେ ରହୁଥିଲେ ବି ଆଏଜ୍ତକ ଆବାସ ଯୋଜନାରୁ ବଁଚିତ୍ ହେଇ ରହିଛନ୍। ଇ ଅସାହା ନିହାତି ଗରିବ୍ ଦୁଖି ପରିବାର ଉପରେ ଜିଲା ପରଶାସନ ଆର ରାଏଜ୍ ସରକାର ଦୁରୁଷ୍ଟି ଦେଇ ସଂକୀର୍ତ୍ତନ, ଦେବାଳୀକଁର ଚିକିଛା ସଂଗେ ସବୁ ପରକାର ସରକାରୀ ସହାଯ୍ ଯୁଗେଇ ଦେବାକେ ଗଁାବାସୀ ଦାବି କରିଛନ୍। ଇ ବାବ୍ଦେ ବିନିକା ବିଡିଓ ବିଶ୍ୱରଞ୍ଜନ ମଲ୍ଲିକକୁଁ ପଚରାଲାରୁ ଇ ବାବ୍ଦେ ମୋର ପାସେ ଖବର ନାଇଁଥାଇ। ଆପଣକରନୁ ଇ ଦୁଖି ପରିବାର ଉପରେ ଜାନ୍ବାକେ ପାଇଲି। ମୁଇଁ ସେଲେଡ଼ି ପଁଚେତ୍ କାର୍ଯ୍ୟ ନିର୍ବାହୀ ଅଧ୍କାରୀ ଆର ସରପଁଚ୍କଁର ସଂଗେ କଥା ହେଇ ପଦକ୍ଷେପ ନେମି ବଲି ସେ କହିଥିଲେ।
