ଦାରିଙ୍ଗବାଡି,୫।୨(ଡି.ଏନ.ଏ)- କନ୍ଧମାଳ ଜିଲା ଦାରିଙ୍ଗବାଡି ଅଞ୍ଚଳରେ ଲଘୁଚାପ ପ୍ରଭାବରେ ବୁଧବାର ସକାଳଠାରୁ ପ୍ରବଳରୁ ଅତି ପ୍ରବଳ ବର୍ଷା ହୋଇଛି ଫଳରେ ଜନଜୀବନ ଅସ୍ତବ୍ୟସ୍ତ ହୋଇଛି। ବର୍ଷା ଯୋଗୁ ଶୀତର ପ୍ରକୋପ ମଧ୍ୟ ବୃଦ୍ଧି ପାଇବା ସହ ତାପମାତ୍ରା ୧୦ ଡିଗ୍ରୀ ତଳେ ରହିଛି। ଗତ ୩ଦିନ ହେଲା ଅଞ୍ଚଳରେ କୋହଲା ପାଗ ସହ ଘନ କୁହୁଡି ଆଚ୍ଛାଦିତ ହୋଇ ରହୁଥିଲା। ଏଥିସହ ଝିପିଝିପି ବର୍ଷା ମଧ୍ୟ ହେଉଥିଲା। ତେବେ ବୁଧବାର ବର୍ଷାର ମାତ୍ରା ବୃଦ୍ଧି ପାଇବା ଯୋଗୁ ପନିପରିବା ଚାଷରେ ବହୁ କ୍ଷତି ହେବ ବୋଲି ଜଣାପଡିଛି। ତେବେ ଏହି ବର୍ଷା ହଳଦୀ ଚାଷ ପାଇଁ ବହୁତ ଫାଇଦା ଦେବ ବୋଲି କୁହାଯାଇଛି। ଏବେ ହଳଦୀ ଖୋଳା କାର୍ଯ୍ୟ ଚାଲିଥିବା ବେଳେ ବର୍ଷା କାରଣରୁ ମାଟି ହାଲକା ହୋଇଛି ତେଣୁ ହଳଦୀ ଖୋଳିବା ସହଜ ହୋଇଛି ବୋଲି ହଳଦୀ ଚାଷୀ ଟାମିଆ ବିନ୍ଧାଣୀ କହିଛନ୍ତି। ଦାରିଙ୍ଗବାଡି ସମେତ ଶ୍ରାନିକେତା, ସିମନବାଡି, ଦାସିଂବାଡି, ଗ୍ରୀନବାଡି, ଭ୍ରମରବାଡି, ସିଆଙ୍ଗବାଲି ଆଦି ଅଞ୍ଚଳରେ ବର୍ଷା ଜାରି ରହିଛି। ସେହିପରି ବ୍ରାହ୍ମଣୀ ଗାଁ ଅଞ୍ଚଳରେ କୋହଲା ପାଗ ସହ କଳାମେଘ ଢାଙ୍କି ରଖିଛି ଭୋର ସମୟରେ ଝିପିଝିପି ବର୍ଷା ହୋଇଥିବା ଜଣାପଡିଛି।
