ଦାରିଙ୍ଗବାଡ଼ି,୧୯।୩(ଡି.ଏନ୍.ଏ.): କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକ ଅଧ୍ୟକ୍ଷା ସୁବେନ୍ତୀ ପ୍ରଧାନ ନିଜ ପଦବୀ ପୁଣି ଥରେ ହରାଇଛନ୍ତି। ହାଇକୋର୍ଟ ତାଙ୍କ ପଦବୀକୁ ୧୩ ତାରିଖରେ ଅସିଦ୍ଧି ଘୋଷଣା କରିଛନ୍ତି। ପୂର୍ବରୁ ଏହି ମାମଲାରେ ଜିଲା ଦୌରାଜଜ୍ ବ୍ଲକ ଅଧ୍ୟକ୍ଷାଙ୍କ ସଭ୍ୟପଦ ରଦ୍ଦ କରିଥିଲେ। ଏନେଇ ବ୍ଲକ ଅଧ୍ୟକ୍ଷା ହାଇକୋର୍ଟରୁ ରହିତାଦେଶ ଆଣିଥିବା ବେଳେ ତାକୁ ପୁଣି ହାଇକୋର୍ଟ ପକ୍ଷରୁ ଉଚ୍ଛେଦ କରାଯାଇଥିବା ଜଣାପଡ଼ିଛି।
ପ୍ରକାଶ ଯେ, ବ୍ଲକ୍ ଅଧ୍ୟକ୍ଷାଙ୍କ ୨ରୁ ଅଧିକ ସନ୍ତାନ ରହିଥିବା ନେଇ ତାଜୁଙ୍ଗିଆ ସମିତିସଭ୍ୟା ରୁଦା ମଲ୍ଲିକ କୋର୍ଟରେ ଅଭିଯୋଗ କରିଥିଲେ। ସୁବେନ୍ତୀଙ୍କ ୬ଟି ସନ୍ତାନ ରହିଥିବା ବେଳେ ସେ ଏହି ନିର୍ବାଚନରେ ଚଞ୍ଚକତା କରି ମିଥ୍ୟା ସତ୍ୟପାଠ ଦେଇ ନିର୍ବାଚନ ଲଢ଼ିଥିବା ଅଭିଯୋଗ ହୋଇଥିଲା। ଏନେଇ ପୂର୍ବରୁ ଜିଲା ଦୌରାଜଜ୍ଙ୍କ ନିକଟରେ ନିର୍ବାଚନ ମାମଲା ୨/୧୭ରେ ରୁଜୁ ହୋଇଥିଲା। ଜିଲା ଜଜ୍ ଅକ୍ଟୋବରରେ ମାମଲାର ଶୁଣାଣି କରି ଅଧ୍ୟକ୍ଷା ପ୍ରଧାନଙ୍କ ପଦବୀକୁ ରଦ୍ଦ କରିଥିଲେ। ଏନେଇ ବ୍ଲକ ଅଧ୍ୟକ୍ଷା ପ୍ରଧାନଙ୍କ ସହ ଯୋଗାଯୋଗ କରାଯିବାରୁ ସେ ଏନେଇ ସୁପ୍ରିମ୍କୋର୍ଟର ଦ୍ୱାରସ୍ଥ ହେବୁ ବୋଲି କହିଛନ୍ତି।
