ଲକ୍ଷ୍ନୌ, ୧୪।୬: ଉତ୍ତର ପ୍ରଦେଶରେ ସମାଜବାଦୀ ପାର୍ଟି ଓ ବହୁଜନ ସମାଜ ପାର୍ଟି ମେଣ୍ଟ ଭାଙ୍ଗିବା ପରେ ସାନ ଭାଇ ଶିବପାଲ ଯାଦବ ଏବଂ ପୁଅ ଅଖିଲେଶକୁ ଏକାଠି କରିବା ପାଇଁ ଅଣ୍ଟା ଭିଡିଥିଲେ ମୁଲାୟମ ସିଂହ ଯାଦବ। କିନ୍ତୁ ମୂଲାୟମଙ୍କ ସ୍ବପ୍ନରେ ପାଣି ପକାଇଦେଇଛନ୍ତି ଶିବପାଲ। ଆଉ ସମାଜବାଦୀ ଦଳକୁ ଫେରିବେ ନାହିଁ ବୋଲି ସେ କହିଛନ୍ତି। ୨୦୨୨ ବିଧାନସଭା ନିର୍ବାଚନ ଏକାକୀ ଲଢିବେ ବୋଲି ସେ ସୂଚନା ଦେଇଛନ୍ତି।
ଉତ୍ତର ପ୍ରଦେଶରେ ଅଖିଲେଶ ଓ ଶିବପାଲଙ୍କ ମଧ୍ୟରେ ଦଳୀୟ କ୍ଷମତାକୁ ନେଇ ୨୦୧୭ରେ ଭୀଷଣ କଳି ଲାଗିଥିଲା। ଏହାକୁ କେନ୍ଦ୍ର କରି ଶିବପାଲ ଏକ ନୂଆ ଦଳ ଗଢିଥିଲେ। ଯାଦବ ପରିବାର ଭୋଟ ବିଭାଜିତ ହୋଇଥିଲା। ଯାଦବ ପରିବାରର ଭୋଟକୁ ଏକାଠି କରିବା ପାଇଁ ଏସପିର ପ୍ରତିଷ୍ଠାତା ମୁଲାୟମ ସିଂହ ଯାଦବ ଦାଦା ପୁତୁରାଙ୍କୁ ଏକାଠି କରିବାକୁ ଚାହୁଁଥିଲେ।
