ଅନୁଗୋଳ ଅଫିସ, ୯।୧୨ – ଅନୁଗୋଳ ଜିଲା ତାଳଚେର ବିଧାୟକ ବ୍ରଜ କିଶୋର ପ୍ରଧାନଙ୍କୁ କେହି ଟାର୍ଗେଟ୍ କରୁଛନ୍ତି। ବାରମ୍ବାର ତାଙ୍କ ଗାଡ଼ି ପୋଡ଼ି ଦେଉଛନ୍ତି। ଏପରି କି ତାଙ୍କ ତାଳଚେରସ୍ଥିତ ବାସଭବନରେ ମଧ୍ୟ ନିଅଁା ଲଗାଇ ଦେବାକୁ ନିକଟ ଅତୀତରେ ଉଦ୍ୟମ କରାଯାଇଛି। ତେଣୁ ବିଧାୟକଙ୍କ ଜୀବନ ପ୍ରତି ବିପଦ ଥିବାରୁ ତାଙ୍କୁ ସୁରକ୍ଷା ଯୋଗାଇ ଦିଆଯାଉ ବୋଲି ତାଳଚେର ନିର୍ବାଚନମଣ୍ଡଳୀର ଜନସାଧାରଣ ରବିବାର ଅନୁଗୋଳ ଜିଲାପାଳଙ୍କ ଅନୁପସ୍ଥିତିରେ ଉପଜିଲାପାଳ ବାସୁଦେବ ଶତପଥୀ ଏବଂ ଏସ୍ପି ଜଗମୋହନ ମୀନାଙ୍କୁ ଭେଟି ଦାବିପତ୍ର ପ୍ରଦାନ କରିଛନ୍ତି।
ଉକ୍ତ ଦାବିପତ୍ରରେ ଦର୍ଶାଯାଇଛି ଯେ, ଶନିବାର ବିଳମ୍ବିତ ରାତିରେ ବିଧାୟକ ପ୍ରଧାନଙ୍କ ଭରତପୁରସ୍ଥିତ କ୍ୟାମ୍ପ କାର୍ଯ୍ୟାଳୟରେ ଥିବା ଗାଡ଼ିରେ କେହି ନିଆଁ ଲଗାଇ ଦେଇଥିଲେ। ଏହା ପୂର୍ବରୁ ମଧ୍ୟ ତିନି ଥର ତାଙ୍କ ଗାଡ଼ି ଉପରେ ଆକ୍ରମଣ ହେଲାଣି। କିନ୍ତୁ ପୋଲିସ ଦୁର୍ବୃତ୍ତଙ୍କୁ ଧରିବାରେ ସକ୍ଷମ ହେଉନାହିଁ। ତେଣୁ ସମ୍ପୃକ୍ତ ଦୁର୍ବୃତ୍ତମାନଙ୍କୁ ଧରାଯିବା ସହ ବିଧାୟକଙ୍କୁ ସୁରକ୍ଷା ଯୋଗାଇ ଦେବାକୁ ତାଳଚେର ବାସିନ୍ଦା ଦାବି କରିଛନ୍ତି। ଆସନ୍ତା ୧୬ ତାରିଖ ସୁଦ୍ଧା ଏ ଦିଗରେ ପଦକ୍ଷେପ ଗ୍ରହଣ କରା ନ ଗଲେ ଜନସାଧାରଣ ଅନିର୍ଦ୍ଦିଷ୍ଟ କାଳ ଯାଏ ଗଣଧାରଣା ଦେବାକୁ ବାଧ୍ୟ ହେବେ ବୋଲି ଦାବିପତ୍ରରେ ଚେତାବନୀ ଦିଆଯାଇଛି। ଏହି ଦାବିପତ୍ର ପ୍ରଦାନ ସମୟରେ ତାଳଚେରର ରାଜକିଶୋର ପ୍ରଧାନ, ଜୟକିଶୋର ସାହୁ, ମୁରଲୀଧର ସାହୁ, ଦୀନେଶ ପ୍ରଧାନ, ପର୍ଶୁରାମ ସାହୁ, ଅମିତ କୁମାର ସାହୁ, ଦିଲୀପ କୁମାର ପ୍ରଧାନ, ସୁମିତ୍ରା ସାହୁ, ଜୟନ୍ତ ପ୍ରଧାନ, ସୁଶାନ୍ତ କୁମାର ପ୍ରଧାନ, ରାମ ନାଏକଙ୍କ ସମେତ ଅନ୍ୟମାନେ ଉପସ୍ଥିତ ଥିଲେ।
