ଛତ୍ରପୁର,୨୩ା୫(ଡି.ଏନ.ଏ)-ଗଞ୍ଜାମ ଜିଲା ଆୟୁଷ ଡାକ୍ତର ସଂଘ ପକ୍ଷରୁ ବିଭନ୍ନ ଦାବି ନେଇ ଶୁକ୍ରବାର ଜିଲାପାଳଙ୍କୁ ସ୍ମାରକପତ୍ର ପ୍ରଦାନ କରାଯାଇଛି । ସେଥିରେ ଦର୍ଶାଯାଇଛି ଯେ, ଆୟୁଷ ଡାକ୍ତରମାନଙ୍କୁ ଅଣ କୋଭିଡ୍ ସ୍ବାସ୍ଥ୍ୟସେବାରେ ନିୟୋଜିତ କରିବାକୁ ରାଜ୍ୟ ସ୍ବାସ୍ଥ୍ୟ ସଚିବଙ୍କ ନିର୍ଦ୍ଦେଶ ରହିଛି ମାତ୍ର ଜିଲାରେ ଥିବା କୋଭିଡ୍ କେୟାର ସେଣ୍ଟର ଓ ଡେଡିକେଟେଡ୍ କୋଭିଡ୍ ହେଲଥ୍ ସେଣ୍ଟରରେ ଆୟୁଷ ଡାକ୍ତର କାର୍ଯ୍ୟ କରିବାକୁ ଜିଲା ଚିକିତ୍ସାଧିକାରୀ ୨୦ ତାରିଖରେ ନିର୍ଦ୍ଦେଶ ଦେଇଛନ୍ତି। ଆୟୁଷ ଡାକ୍ତରମାନଙ୍କୁ ସ୍ଥାୟୀ ନିଯୁକ୍ତି ନ ଦେଇ କେବଳ ଆବଶ୍ୟକ ସମୟରେ କାର୍ଯ୍ୟ ହାସଲ କରାଯାଉଛି । କରୋନା ମହାମାରୀ ସମୟରେ ସମସ୍ତ ସ୍ବାସ୍ଥ୍ୟକର୍ମୀଙ୍କ ପାଇଁ ସ୍ବତନ୍ତ୍ର ଆର୍ଥତ୍କ ଓ ସାମାଜିକ ପ୍ୟାକେଜ୍ ଘୋଷଣା କରାଯାଇଥିଲେ ମଧ୍ୟ ଆୟୁଷ ଡାକ୍ତରମାନଙ୍କ ପାଇଁ କିଛି ଘୋଷଣା କରାଯାଇନାହିଁ । ରାଜ୍ୟ ସରକାରଙ୍କ ପକ୍ଷରୁ କୋଭିଡ୍-୧୯ ଜରୁରୀକାଳୀନ ଡ୍ୟୁଟି ପାଇଁ ରେଗୁଲାର ଡାକ୍ତରଙ୍କ ପାଇଁ ଘୋଷିତ ସାମାଜିକ ସୁରକ୍ଷା ଓ ବୀମା ପ୍ୟାକେଜ୍ ରେ ଆୟୁଷ ଡାକ୍ତରଙ୍କୁ ସାମିଲ କରିବା, ଇନସେନଟିଭ୍ ବାବଦରେ ଦୈନିକ ୧୪୦୦ ଟଙ୍କା ଦେବା ଆଦି ଦାବି ନେଇ ଜିଲାପାଳଙ୍କୁ ସ୍ମାରକପତ୍ର ପ୍ରଦାନ କରାଯାଇଥିବା ସଂଘ ପକ୍ଷରୁ ସୂଚନା ଦିଆଯାଇଛି ।
