ବ୍ରହ୍ମପୁର ଅଫିସ,୨୭।୨: ଦୀର୍ଘ ୨୪ ଦିନ ଧରି ନାନା ଆଶଙ୍କା ଓ ଅନିଶ୍ଚିତତା ମଧ୍ୟରେ ଜାପାନ ଜଳ ଜାହାଜରେ କରୋନା ଭାଇରସ୍ ପାଇଁ ଅଟକି ରହିଥିବା ବ୍ରହ୍ମପୁରର ଯୁବ ଇଞ୍ଜିନିୟର ଶିବାଶିଷ ନାୟକ ଗୁରୁବାର ଭୋର ୫ଟାରେ ଭାରତୀୟ ବିମାନରେ ଭାରତୀୟ ଦୂତାବାସ ସହଯୋଗରେ ଭାରତ ଫେରିଛନ୍ତି। ପୁଅ ଶିବାଶିଷ ଭାରତ ଫେରିଥିବା ଖବର ପାଇ ତାଙ୍କ ବାପା ଲିଙ୍ଗରାଜ ନାୟକ, ମା’ ଝୁନୁ ନାୟକ ଓ ଆତ୍ମୀୟସ୍ବଜନ ଖୁସିରେ ଆତ୍ମବିଭୋର ହୋଇପଡ଼ିଛନ୍ତି। ପୁଅ ସହିତ ସକାଳେ ଲିଙ୍ଗରାଜ କଥା ହେବା ପରେ ପରିବାର ଲୋକଙ୍କ ସହ ମନ୍ଦିରକୁ ଯାଇ ପୂଜାର୍ଚ୍ଚନା କରିଥିଲେ। ଭଗବାନ ଏବଂ ବ୍ରହ୍ମପୁରର ସମସ୍ତ ଖବରଦାତାଙ୍କୁ ପରିବାରବର୍ଗ ଅଶେଷ କୃତଜ୍ଞତା ଜଣାଇଛନ୍ତି । ବୁଧବାର ଶିବାଶିଷ ଓ ତାଙ୍କ ୫ ସହକର୍ମୀଙ୍କ ସମେତ ୧୧୯ ଜଣ ଭାରତୀୟ ଓ ୫ ଜଣ ବିଦେଶୀ ନାଗରିକଙ୍କୁ ଟୋକିଓ ପ୍ରଶାସନ ଏକ ବସ୍ରେ ହାନୀଡା ବିମାନ ବନ୍ଦର ପର୍ଯ୍ୟନ୍ତ ଆଣିଥିଲା। ସେଠାରେ ପୂର୍ବରୁ ପ୍ରସ୍ତୁତ ହୋଇ ରହିଥିବା ଏକ ଭାରତୀୟ ଚାଟାର୍ଡ ସ୍ବତନ୍ତ୍ର ବିମାନ ବୁଧବାର ସାରେ ସେଠାରୁ ଉଡ଼ାଣ ଆରମ୍ଭ କରିଥିଲା। ଗୁରୁବାର ସେମାନଙ୍କୁ ଭାରତ ଫେରାଇ ଅଣାଯାଇଛ। ଦିଲ୍ଲୀରେ ପହଞ୍ଚିବା ପରେ ସେମାନଙ୍କୁ ଏକ ବସ୍ରେ ସ୍ଥାନୀୟ ସାମରିକ ବେସ୍କୁ ନିଆଯାଇଥିଲା । ସେଠାରେ ସେମାନଙ୍କୁ ୧୪ଦିନ ନିରୀକ୍ଷଣରେ ରଖାଯିବ। ପରେ ସେମାନଙ୍କ କରୋନା ଭାଇରସ ନେଗେଟିଭ୍ ଆସିଲେ ସେମାନଙ୍କୁ ନିଜ ନିଜ ଘରକୁ ଛଡ଼ାଯିବ ବୋଲି ଭାରତ ଫେରିଥିବା ଇଞ୍ଜିନିୟର ଶିବାଶିଷ ଧରିତ୍ରୀକୁ ଏକ ସାକ୍ଷାତକାରରେ କହିଛନ୍ତି।
