ଦିଗପହଣ୍ଡି,୨୯ା୫(ଡି.ଏନ.ଏ.)-ଦିଗପହଣ୍ଡି ବ୍ଲକ ସମ୍ମିଳନୀ କକ୍ଷରେ ସୋମବାର ଜଙ୍ଗଲ ଅଧିକାର ଆଇନ ଗଞ୍ଜାମ ଜିଲା ଉପଖଣ୍ଡ ସ୍ତରୀୟ ସମୀକ୍ଷା ଓ ସଚେତନତା ସଭା ଅନୁଷ୍ଠିତ ହୋଇଯାଇଛି। ସଭାରେ ବିଡିଓ ହଳଧର ଶବର ଅଧ୍ୟକ୍ଷତା କରିଥିବା ବେଳେ ଜିଲା ମଙ୍ଗଳ ଅଧିକାରୀ ଡ. ପରୀକ୍ଷିତ ଦାସ, ଦିଗପହଣ୍ଡି ଅତିରିକ୍ତ ତହସିଲଦାର ମନୋଜ ପ୍ରଭାକର କୁଜୁର, ବନାଞ୍ଚଳ ଅଧିକାରୀ ପରମାନନ୍ଦ ପାଣିଗ୍ରାହୀ, ବ୍ଲକ ସମାଜ ମଙ୍ଗଳ ଅଧିକାରୀ ଜିତେନ୍ଦ୍ର ମହାଲିଆ ପ୍ରମୁଖ ମଞ୍ଚାସୀନ ଥିଲେ। ଜଙ୍ଗଲ ଅଧିକାର ଆଇନ-୨୦୦୬ ଅନୁଯାୟୀ ଜଙ୍ଗଲ ଜମି ସ୍ବତ୍ୱାଧିକାର ପଟ୍ଟା ପାଇଁ ଆବେଦନ କରିଥିବା ୪୪୯ ହିତାଧିକାରୀଙ୍କ ଦରଖାସ୍ତକୁ ନାମଞ୍ଜୁର କରାଯାଇଥିଲା। ଜିଲା ଉପଖଣ୍ଡସ୍ତରୀୟ କମିଟି ଜଙ୍ଗଲ ବିଭାଗ କ୍ଷେତ୍ର କର୍ମଚାରୀଙ୍କ ଡିଜିଟାଲ ସର୍ଭେ ରିପୋର୍ଟକୁ ଭିତ୍ତିକରି ଆବେଦନ ହୋଇଥିବା ଦରଖାସ୍ତ ଗୁଡ଼ିକୁ ପ୍ରତ୍ୟାଖ୍ୟାତ କରିଥିବା ଜଣାପଡ଼ିଛି। ସେ ସମ୍ପର୍କରେ ସଭାରେ ସବିଶେଷ ଆଲୋଚନା ସହ ଜନଶୁଣାଣି କରାଯାଇଥିଲା। ଦିଗପହଣ୍ଡି ବ୍ଲକର ପୋଡ଼ାଖାଲ, ଶ୍ୟାମସୁନ୍ଦରପୁରପଲ୍ଲୀ, ବାଲିପାଟ, କନିଆରି ସାହି, ଆଦିବାସୀ ସାହି, ମରେଇବାଡ଼ି, କଞ୍ଚରଡ଼ା, ବଡ଼ବୁରୁଡ଼ା, ଆମପୁର ଆଦି ଗ୍ରାମର ୫ ଶହରୁ ଊର୍ଦ୍ଧ୍ୱ ଅନୁସୂଚିତ ଜନଜାତି ବର୍ଗର ଜନସାଧାରଣ ସଭାରେ ଉପସ୍ଥିତ ଥିଲେ।
ଦିଗପହଣ୍ଡି ବନାଞ୍ଚଳ ଅଧିକାରୀଙ୍କ ସହ ଯୋଗାଯୋଗ କରିବାରୁ ସେ କହିଛନ୍ତି, ବନାଞ୍ଚଳ ଅଧୀନରେ ପ୍ରାୟ ୧୫ ହଜାର ହେକ୍ଟର ଜଙ୍ଗଲ ଜମି ରହିଛି। ୨୦୦୫ ଡିସେମ୍ବର ୧୩ ସୁଦ୍ଧା ଜଙ୍ଗଲ ଜମିରେ ବସବାସ କରୁଥିବା ୧୯୫ ପରିବାରକୁ ବନ ବିଭାଗ ରିପୋର୍ଟକୁ ଆଧାର କରି ରାଜସ୍ବ ବିଭାଗ ପକ୍ଷରୁ ଜମି ସ୍ବତ୍ୱାଧିକାର ପଟ୍ଟା ପ୍ରଦାନ କରାଯାଇଛି। ପ୍ରତ୍ୟାଖ୍ୟାତ ହୋଇଥିବା ୪୪୯ ହିତାଧିକାରୀ ଅଣ ଜଙ୍ଗଲ କିସମ ଜମିରେ ବସବାସ କରୁଛନ୍ତି। ସେମାନେ ଜଙ୍ଗଲ ଅଧିକାର ଆଇନ-୨୦୦୬ ଅନୁଯାୟୀ ଯୋଗ୍ୟ ନ ଥିବା ବନାଞ୍ଚଳ ଅଧିକାରୀ ଦର୍ଶାଇଛନ୍ତି। ଅନ୍ୟପକ୍ଷରେ ବିଭିନ୍ନ ଗ୍ରାମରୁ ଆସିଥିବା ବହୁ ସଂଖ୍ୟକ ଆବେଦନକାରୀ ନିରାଶ ହେବା ପରେ ପ୍ରତିକ୍ରିୟାଶୀଳ ହୋଇଛନ୍ତି। ଜଙ୍ଗଲ ଜମି ଅଧିକାର ଆଇନ ଅନୁଯାୟୀ ପିତୃ ପୁରୁଷ ଅମଳରୁ ଦଖଲ କରି ଆସୁଥିବା ଜମିପଟ୍ଟା ନ ମିଳିଲେ ଆନ୍ଦୋଳନ କରାଯିବ ବୋଲି ଡମ୍ବରୁ ମଳିକ, କିଶୋର ମଳିକ, ଉଗ୍ରସେନ ମଳିକ, ପ୍ରତାପ ମଳିକ, ରାମ ମଳିକ, ଜଟାଧାରୀ ମଳିକ, ସମ୍ବାରୁ ମଳିକ, ବିକ୍ରମ ମଳିକ, ଜଗନ୍ନାଥ ମଳିକ ପ୍ରମୁଖ ଚେତାବନୀ ଦେଇଛନ୍ତି।
