ଦିଗପହଣ୍ଡି, ୫/୧୦ (ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ବମୋକେଇ ପଞ୍ଚାୟତ ଅନ୍ତର୍ଗତ ସିନ୍ଧୁଖାଳି ଗ୍ରାମ ନିକଟସ୍ଥ ପୋଖରୀରୁ ମାଛ ଚୋରି ଉଦ୍ୟମକୁ କେନ୍ଦ୍ର କରି ଜଣେ ମାଛଚାଷୀଙ୍କୁ ତେଣ୍ଟାରେ ଆକ୍ରମଣ କରି ହତ୍ୟା ଉଦ୍ୟମ ଅଭିଯୋଗ ହୋଇଛି। ଏହି ଘଟଣାରେ ପୁଲିସ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଥିବା ବେଳେ ଜାମିନ ନାମଞ୍ଜୁର ହେବାରୁ ତାଙ୍କୁ ଜେଲ୍ ହାଜତକୁ ପଠାଇ ଦିଆଯାଇଛି।
ସୂଚନା ଅନୁଯାୟୀ, ସିନ୍ଧୁଖାଳି ଗ୍ରାମର ଦେବାଶିଷ ପ୍ରଧାନ ଗ୍ରାମ ନିକଟସ୍ଥ ଏକ ପୋଖରୀରେ ମାଛଚାଷ କରୁଛନ୍ତି। ଗତ ଶନିବାର ରାତି ପ୍ରାୟ ସାଢ଼େ ୧୧ଟା ସମୟରେ ନାରାୟଣପୁର ଗ୍ରାମର କେ. ଭୁବନି ପୋଖରୀରେ ଜାଲ ପକାଇ ମାଛ ଚୋରି କରୁଥିବା ବେଳେ ଦେବାଶିଷ ସେଠାରେ ପହଞ୍ଚି ଭୁବନିଙ୍କୁ ଧରିଥିଲେ।
ଦେବାଶିଷ ଭୁବନିଙ୍କ ନିକଟରୁ କିଛି ମାଛ ଓ ଜାଲ ଛଡ଼ାଇ ନେଇଥିଲେ। ଏଥିରେ ଭୁବନି ଉତ୍ତ୍ୟକ୍ତ ହୋଇ ନିଜ ହାତରେ ଧରିଥିବା ଏକ ଲୁହା ତେଣ୍ଟାରେ ଦେବାଶିଷଙ୍କୁ ଆକ୍ରମଣ କରି ହତ୍ୟା ଉଦ୍ୟମ କରିଥିବା ଅଭିଯୋଗ ହୋଇଛି। ଦେବାଶିଷ ଚିତ୍କାର କରିବାରୁ ଗ୍ରାମର କିଛି ବ୍ୟକ୍ତି ଘଟଣାସ୍ଥଳକୁ ଦୌଡ଼ି ଆସି ଭୁବନିଙ୍କୁ କାବୁ କରିଥିଲେ। ଏଥିସହ ତାଙ୍କୁ ମାଡ଼ ମାରିବା ସହ ନୂଆପଡ଼ା ଫାଣ୍ଡି ପୁଲିସକୁ ଖବର ଦେଇଥିଲେ।
ଖବର ପାଇ ପୁଲିସ ଟିମ୍ ଘଟଣାସ୍ଥଳରେ ପହଞ୍ଚି ଅଭିଯୁକ୍ତ ଭୁବନିଙ୍କୁ ଥାନାକୁ ନେଇଥିଲା। ଏନେଇ ଦେବାଶିଷ କେ. ନୂଆଗାଁ ଥାନାରେ ଏତଲା ଦେଇଥିଲେ। ଏତଲାକୁ ଭିତ୍ତି କରି ଆଇଆଇସି ବିଶ୍ୱଜିତ ନାୟକ ଥାନା ମାମଲା ନଂ. ୨୧୮/୨୬ରେ ବିଏନଏସ୍ର ଦଫା ୩୦୩(୨)/୨୯୬/୧୧୫(୨)/୧୦୯(୧) ଅନୁଯାୟୀ ଅଭିଯୁକ୍ତଙ୍କ ବିରୋଧରେ ମକଦ୍ଦମା ରୁଜୁ କରିଥିଲେ।
ମାମଲାର ତଦନ୍ତକାରୀ ଅଧିକାରୀ ଏସ୍ଆଇ ପୁଷ୍ପାଞ୍ଜଳି ନାୟକ ସୋମବାର ଭୋର ପ୍ରାୟ ୫ଟା ସମୟରେ ଅଭିଯୁକ୍ତ ଭୁବନିଙ୍କୁ ଗିରଫ କରିଥିଲେ। ପରେ ସନ୍ଧ୍ୟାରେ ତାଙ୍କୁ କୋର୍ଟ ଚାଲାଣ କରାଯାଇଥିଲା। ଜାମିନ ଆବେଦନ ନାମଞ୍ଜୁର ହେବାରୁ ଅଭିଯୁକ୍ତଙ୍କୁ ଦିଗପହଣ୍ଡି ସବ୍ଜେଲ୍ ହାଜତକୁ ପଠାଇ ଦିଆଯାଇଛି।
ପୁଲିସ ଅଭିଯୁକ୍ତଙ୍କ ନିକଟରୁ ହତ୍ୟା ଉଦ୍ୟମରେ ବ୍ୟବହୃତ ଲୁହା ତେଣ୍ଟାକୁ ଜବତ କରିଛି।
