ନୂଆଦିଲ୍ଲୀ,୫।୬: ଚଳନ୍ତା ଟ୍ରେନ୍ରେ ୪ ମାସର ଶିଶୁ ପାଇଁ କ୍ଷୀର ଆଣି ଦେଇଥିବା ଜଣେ ଆର୍ପିଏଫ୍ ଯବାନଙ୍କର ସବୁଠି ପ୍ରଶଂସା କରାଯାଉଛି। ସୋସିଆଲ ମିଡିଆରେ ତାଙ୍କର ଏକ ଭିଡିଓ ଏବେ ଅଜସ୍ର ବାଃ ବାଃ ସାଉଁଟୁଛି। ରେଳମନ୍ତ୍ରୀ ପିୟୁଷ ଗୋୟଲ ମଧ୍ୟ ଯବାନଙ୍କ ସାହାସିକତାର ପ୍ରଶଂସା କରିଛନ୍ତି। ସୂଚନାଯୋଗ୍ୟ, ବେଲଗାଁଓରୁ ଗୋରଖପୁର ଶ୍ରମିକ ସ୍ପେଶାଲ ଟ୍ରେନରେ ଯାଉଥିବା ଜଣେ ମହିଳାଙ୍କର ୪ ମାସର ଶିଶୁଟି ଖୁବ୍ ଭୋକିଲା ଥିଲା। ତାକୁ କ୍ଷୀରର ଆବଶ୍ୟକତା ଥିବାରୁ ଟ୍ରେନ୍ ଭୋପାଳ ଷ୍ଟେଶନରେ ପହଞ୍ଚିବା ପରେ ମହିଳା ଜଣକ ସେଠାରେ ଥିବା ଆର୍ପିଏଫ୍ ଯବାନ ଇନ୍ଦର ସିଂ ଯାଦବଙ୍କୁ କିଛି କ୍ଷୀର ଆଣିଦେବାକୁ ଅନୁରୋଧ କରିଥିଲେ। ଏହା ଶୁଣିବା ପରେ ଇନ୍ଦର ଷ୍ଟେଶନ ବାହାରକୁ କ୍ଷୀର ଆଣିବାକୁ ଯାଇ ଫେରିବା ବେଳକୁ ଟ୍ରେନ୍ଟି ଗଡିବା ଆରମ୍ଭ କରିଥିଲା। ଏହାଦେଖି ଇନ୍ଦର ନିଜ ଜୀବନକୁ ପାଣି ଛଡାଇ ଦୌଡି ଦୌଡି ଚଳନ୍ତା ଟ୍ରେନ୍ରେ ଚଢି ଯାଇଥିଲେ ଓ ଉକ୍ତ ମହିଳାଙ୍କ ହାତରେ ତାଙ୍କ ଶିଶୁପାଇଁ କ୍ଷୀର ଯୋଗାଇ ଦେଇଥିଲେ। ଷ୍ଟେଶନରେ ଲାଗିଥିବା ସିସିଟିଭି କ୍ୟାମେରାରେ ସେ ସମୟର ସମସ୍ତ ଦୃଶ୍ୟ ରେକର୍ଡ ହେବା ପରେ ଘଟଣା ସମ୍ପର୍କରେ ଜଣାପଡିଥିଲା।
