କବିସୂର୍ଯ୍ୟନଗର,୧୪ା୬- କବିସୂର୍ଯ୍ୟନଗର ଥାନା ଗୁଡ଼ିଆଳି ଗ୍ରାମର ଖଦାଳ ସାହିରେ ଦୁଇଗୋଷ୍ଠୀ ମଧ୍ୟରେ ସାହି ସଭାକୁ କେନ୍ଦ୍ରକରି ଗଣ୍ଡଗୋଳ ହୋଇଥିଲା। ଏ ନେଇ ଉଭୟ ପକ୍ଷରୁ ଥାନାରେ ଅଭିଯୋଗ ହୋଇଥିଲା। ପୋଲିସ ପୃଥକ ୨ ମାମଲା ରୁଜୁ କରି ଉଭୟ ଗୋଷ୍ଠୀର ୫ ଜଣଙ୍କୁ ଗୁରୁବାର କୋର୍ଟଚାଲାଣ କରିଥିବା ଆଇଆଇସି ତପନ କୁମାର ପତି କହିଛନ୍ତି। ୨ଟି ଭଙ୍ଗା ବାଇକ ଜବତ ହୋଇଛି। ଗୁଡ଼ିଆଳି ଗ୍ରାମ ଖଦାଳ ସାହିରେ ମୋଟ ୧୨୫ ଘର। ବିଭିନ୍ନ କାରଣକୁ କେନ୍ଦ୍ରକରି ସବୁବେଳେ ସାହିର ଦୁଇଗୋଷ୍ଠୀ ମଧ୍ୟରେ ବିବାଦ ଲାଗି ରହେ। ୧୫ ଦିନ ତଳେ ଦୁଇ ପଡ଼ୋଶୀ ମଧ୍ୟରେ କୌଣସି କାରଣକୁ ନେଇ ମାରପିଟ ହୋଇଥିଲା। ଉଭୟ ପକ୍ଷର ୬ ଜଣ ଗୁରୁତର ଆହତ ହୋଇଥିଲେ। ଗତ ୧୦ ତାରିଖ ରାତ୍ର ସାହିରେ ସଭା ଚାଲିଥିଲା ବେଳେ ଅନ୍ୟ ଗୋଷ୍ଠୀ ୨ଟି ବାଇକରେ ଆସି ଗାଳିଗୁଲଜ ଶବ୍ଦ କରି ଚାଲି ଯାଇଥିବା ଅନ୍ୟ ପକ୍ଷ ଥାନାରେ ଅଭିଯୋଗ କରିଛନ୍ତି। ସେହିପରି ଗତ ୧୧ ତାରିଖରେ ସାହି ସଭା ଚାଲିଥିଲା। ଅପରଗୋଷ୍ଠୀ ୨ଟି ବାଇକରେ ଆସି ଗାଳିଗୁଲଜ କରିଥିବା ଥାନାରେ ଅଭିଯୋଗ ହୋଇଥିଲା। ତେବେ ବାଇକ ଚାଳକଙ୍କୁ ଗୋଡ଼ାଇବାରୁ ସେମାନେ ବାଇକ ଛାଡ଼ି ଚାଲି ଯାଇଥିଲେ। ଫଳରେ ବାଇକ ଭାଙ୍ଗି ଦେଇଥିବା ଅଭିଯୋଗ ହୋଇଛି। ଏନେଇ ଉଭୟ ଗୋଷ୍ଠୀ ପକ୍ଷରୁ ଥାନାରେ ଏତଲା ଦିଆଯାଇଥିବା ପୋଲିସ କହିଛି। ୧୩୫/୧୯ କେଶ ନଂ ପ୍ରକାରେ ଗୁଡ଼ିଆଳି ଖଦାଳ ସାହିର ସନାତନ ଦାସ, ସନ୍ତୋଷ ଦାସ (ବାପା ମୂରଲୀ) ଓ ନାରାୟଣ ଦାସଙ୍କୁ ପୋଲିସ ଥାନାରେ ଅଟକ ରଖିଥିବା ବେଳେ ଅନ୍ୟ ଗୋଷ୍ଠୀର କେଶ ନଂ ୧୩୬/୧୯ ପ୍ରକାରେ ମନ୍ମଥ ଦାସ ଓ ସନ୍ତୋଷ ଦାସ (ବାପା ସୁବାସ) ଥାନାରେ ଅଟକ ରଖିଥିବା ଜଣାପଡ଼ିଛି। ତେବେ ଉଭୟ ଗୋଷ୍ଠୀର ଶତାଧିକ ମହିଳା ପୁରୁଷ ଆସି ଥାନା ଆଗରେ ରହି ଅଟକ ଥିବା ୫ ଜଣଙ୍କୁ ଛାଡ଼ିବାକୁ ଅଡ଼ି ବସିଥିଲେ। ତେବେ ପୋଲିସ ଏସଆଇ ଅର୍ଜୁନ କଅଁର, ଆଇଆଇସି ତପନ କୁମାର ପତି ଆପୋଶ ବୁଝାମଣା କରିବାକୁ ଚେଷ୍ଟା କରି ବିଫଳ ହେବା ପରେ ଅଟକ ଥିବା ୫ ଜଣଙ୍କୁ କୋର୍ଟଚାଲାଣ କରାଯାଇଥିବା ଆଇଆଇସି ସୂଚନା ଦେଇଛନ୍ତି।
