ପଟ୍ଟାଙ୍ଗି,୧୬।୧୨(ଡି.ଏନ୍.ଏ.) ପଟ୍ଟାଙ୍ଗି ବ୍ଲକର କୋଟିଆ, ମାଳିପୁଟ, ପଟ୍ଟାଙ୍ଗି ଓ ନୂଆଗାଁ ପଞ୍ଚାୟତକୁ ଲାଗି ରହିଛି ସେରୁବନ୍ଧ ବକ୍ସାଇଟ ପାହାଡ଼। ଏଠାରେ ଖଣି ଖନନ ପାଇଁ ନାଲ୍କୋ ଅନୁମତି ପାଇଛି। ନାଲ୍କୋ ତାର ଉତ୍ପାଦନ ପାଇଁ ଦାମନଯୋଡ଼ିସ୍ଥିତ ପଞ୍ଚପଟ୍ଟମାଳୀ ମାଇନ୍ସର ବକ୍ସାଇଟ ବ୍ୟବହାର କରି ଆସୁଥିବା ବେଳେ ଏହାର ପୁନଃ ସଂପ୍ରସାରଣ କ୍ରମରେ ନାଲ୍କୋକୁ ପଟ୍ଟାଙ୍ଗି ବକ୍ସାଇଟ ଖଣି ଖନନ ପାଇଁ ଅନୁମୋଦନ ମିଳିଛି। ଏହି ଖଣି ୩.୫ ମିଲିଅନ କ୍ଷମତା ବିଶିଷ୍ଟ ହେବ। ଏଥିପାଇଁ ଜିଲା ପ୍ରଶାସନ ୧୭ ତାରିଖରେ ପଟ୍ଟାଙ୍ଗିରେ ଏକ ଜନଶୁଣାଣି କାର୍ଯ୍ୟକ୍ରମ ଆୟୋଜିତ କରିବ।
ଉଲ୍ଲେଖନୀୟ, ଗତ ନଭେମ୍ବରରେ ନାଲକୋ କୋରାପୁଟ ଜିଲା ପ୍ରଶାସନକୁ ବ୍ୟବସାୟିକ ସାମାଜିକ ପ୍ରତିବଦ୍ଧତା ପାଣ୍ଠି (ଏଣ୍ଟ୍ରପ୍ରାଇଜ୍ ସୋସିଆଲ କମିଟମେଣ୍ଟ ଫଣ୍ଡ)କୁ ୫୩.୫୦ କୋଟି ଟଙ୍କା ପ୍ରଦାନ କରିଛି, ଯାହା କୋରାପୁଟ ଜିଲା ବିଶେଷକରି ପଟ୍ଟାଙ୍ଗି ଅଞ୍ଚଳରେ ଖର୍ଚ୍ଚ କରାଯିବ। ଦୀର୍ଘ ୩୮ ବର୍ଷ ଧରି ନାଲ୍କୋ ଯେଉଁ ବିକାଶମୂଳକ କାର୍ଯ୍ୟ ଦାମନଯୋଡ଼ି ତଥା ଏହାର ପାରିପାର୍ଶ୍ୱିକ ଅଞ୍ଚଳରେ କରିଆସିଛି, ପଟ୍ଟାଙ୍ଗିରେ ମଧ୍ୟ ସେହି ବିକାଶ ଧାରା ଜାରି ରହିବ ବୋଲି ଆଶା କରାଯାଉଛି। ନାଲକୋ ସର୍ବନିମ୍ନ ଖର୍ଚ୍ଚରେ ବକ୍ସାଇଟ ଉତ୍ପାଦନକାରୀ ଉଦ୍ୟୋଗ ଭାବେ ବିଶ୍ୱରେ ମାନ୍ୟତା ହାସଲ କରିଛି। ପର୍ଯ୍ୟାବରଣ ସଂରକ୍ଷଣ କ୍ଷେତ୍ରରେ ମଧ୍ୟ କଂପାନୀ ଦ୍ୱାରା ନିଆଯାଇଥିବା ପଦକ୍ଷେପ ସବୁ ଉଚ୍ଚ ପ୍ରଶଂସିତ। ନାଲ୍କୋର ଶୂନ୍ୟ ପ୍ରଦୂଷଣ, ଜଳ ପୁନଃଚକ୍ରଣ, ଜମିର ରିକ୍ଲେମେଶନ ଓ ବନୀକରଣ ଉତ୍କୃଷ୍ଟ ଖଣି ପରିଚାଳନାର ମାନ୍ୟତା ପାଇଛି। କମ୍ପାନୀର ୩୫ ବର୍ଷର ମାଇନିଂ ଅପରେଶନ ଅଭିଜ୍ଞତା ଦୃଷ୍ଟିରୁ ଆଶା କରାଯାଉଛି, ପଟ୍ଟାଙ୍ଗିଠାରେ ଏହି ଖଣି ହେବା ଦ୍ୱାରା ସ୍ଥାନୀୟ ଲୋକଙ୍କ ଆର୍ଥତ୍କ ଉନ୍ନତି ସହ ସାମଗ୍ରିକ ବିକାଶ ହୋଇପାରିବ। ଶିକ୍ଷିତ ବେକାର ଯୁବତୀ ଯୁବକଙ୍କ ପାଇଁ ପ୍ରତ୍ୟକ୍ଷ ଓ ପରୋକ୍ଷ ଭାବେ କର୍ମନିଯୁକ୍ତିର ସୁଯୋଗ ସୃଷ୍ଟି ହେବା ସହ ବ୍ୟବସାୟ ପରିସର ବୃଦ୍ଧି, ଗମନାଗମନ, ଦୈନନ୍ଦିନ ସେବା କ୍ଷେତ୍ରରେ ବିକାଶ ଆଶା କରିଛନ୍ତି ସ୍ଥାନୀୟ ବାସିନ୍ଦା। ଅନ୍ୟପକ୍ଷରେ ଉପରୋକ୍ତ ବକ୍ସାଇଟ ପାହାଡ଼କୁ ବଞ୍ଚାଇବା ଓ ଏହାର ସୁରକ୍ଷା ପାଇଁ ଉପରୋକ୍ତ ଚାରି ପଞ୍ଚାୟତ ବାସିନ୍ଦାଙ୍କ ନିକଟରେ ପହଞ୍ଚତ୍ ସଚେତନତା ସୃଷ୍ଟି କରୁଛି ସେରୁବନ୍ଧ ସୁରକ୍ଷା ସମିତି। ଆସନ୍ତା୧୭ରେ ବ୍ଲକ ସଦରସ୍ଥିତ ମିନି ଷ୍ଟାଡିୟମରେ ପରିବେଶ ପ୍ରଦୂଷଣ ପରିଚାଳନା ବୋର୍ଡ ପକ୍ଷରୁ ହେବାକୁ ଥିବା ଜନଶୁଣାଣି କାର୍ଯ୍ୟକ୍ରମ ଉପରେ ଏବେ ସମସ୍ତଙ୍କର ଦୃଷ୍ଟି ରହିଛି। ଶୁଣାଣି ପୂର୍ବରୁ ଜିଲା ପ୍ରଶାସନ ନିର୍ଦ୍ଦେଶ କ୍ରମେ ଉପରୋକ୍ତ ୪ଟି ପଞ୍ଚାୟତରେ ବ୍ଲକ ପ୍ରଶାସନ ପକ୍ଷରୁ ଗତ ଜୁନ ୧୯ରୁ ୨୨ ଯାଏ ଗ୍ରାମସଭା ହୋଇସାରିଛି।
