କଟକ ଅଫିସ,୨୧ା୩: ରେଭେନ୍ଶା ବିଶ୍ୱବିଦ୍ୟାଳୟରେ କୁଳସଚିବ ଭାବେ କାର୍ଯ୍ୟ କରୁଥିବା ଅଶୋକ କୁମାର ଦାଶଙ୍କୁ ରାଜ୍ୟ ସରକାରଙ୍କ ଜେନେରାଲ ଆଡମିନିଷ୍ଟ୍ରେଶନ ଆଣ୍ଡ ପର୍ସନାଲ ଗ୍ରିଭାନ୍ସ ବିଭାଗକୁ ବଦଳି କରାଯାଇଛି। ଏ ନେଇ ଶୁକ୍ରବାର କୁଳାଧିପତି ତଥା ରାଜ୍ୟପାଳଙ୍କ କାର୍ଯ୍ୟାଳୟରୁ ନୋଟିସ ଜାରି ହୋଇଛି। ବିଶ୍ୱବିଦ୍ୟାଳୟର କମ୍ପ୍ଟ୍ରୋଲର ଅଫ ଫାଇନାନ୍ସ(ସିଓଏଫ୍) ଶୁଭେନ୍ଦୁ ସୁବର୍ଣ୍ଣେଶ୍ୱର ରଏ ଏବେ ଅସ୍ଥାୟୀ ଭାବେ କୁଳସଚିବ ଦାୟିତ୍ୱ ତୁଲାଇବେ। ତେବେ ଅଶୋକଙ୍କ ଅଚାନକ ବଦଳିକୁ ନେଇ ଅନେକ ପ୍ରଶ୍ନବାଚୀ ସୃଷ୍ଟି ହୋଇଛି। ବିଶ୍ୱବିଦ୍ୟାଳୟର କେତେଜଣ ବରିଷ୍ଠ ପଦାଧିକାରୀଙ୍କ ସହିତ ଅଶୋକଙ୍କ ମନୋମାଳିନ୍ୟ ଓ କାର୍ଯ୍ୟ କରିବାର ତରିକା ଖାପ ଖାଉ ନ ଥିବାରୁ ତାଙ୍କ ନାମରେ କୁଳାଧିପତିଙ୍କ ନିକଟକୁ କିଛିଦିନ ତଳେ ଚିଠି ଲେଖାଯାଇଥିଲା। ଏହାର ପରିଣାମ ସ୍ବରୂପ ଅଶୋକଙ୍କୁ ବଦଳି ନିର୍ଦ୍ଦେଶ ମିଳିଥିବା ଆଲୋଚନା ହେଉଛି। ଏହା ପୂର୍ବରୁ କୁଳସଚିବ ଦାୟିତ୍ୱରେ ଥିବା ମହେଶ୍ୱର ଅଗସ୍ତିଙ୍କୁ ମଧ୍ୟ ଅଚାନକ ବଦଳି ଆଦେଶ ମିଳିଥିଲା। ଏହି ବିଶ୍ୱବିଦ୍ୟାଳୟର କୁଳସଚିବଙ୍କ କାର୍ଯ୍ୟକାଳ ଅବଧି ୩ ବର୍ଷ ରହିଛି। କାର୍ଯ୍ୟକାଳ ପୂରଣ ହେବା ପୂର୍ବରୁ ଦୁଇ ଦୁଇ ଜଣ କୁଳସଚିବ ବଦଳି ହୋଇ ସାରିଲେଣି। ଏହା ପଛରେ ନିର୍ଦ୍ଦିଷ୍ଟ ଗୋଷ୍ଠୀଙ୍କ ବିରୋଧ ହିଁ ମୁଖ୍ୟ କାରଣ ବୋଲି କୁହାଯାଉଛି। ବିଶ୍ୱବିଦ୍ୟାଳୟର କିଛି ନିର୍ଦ୍ଦିଷ୍ଟ ଗୋଷ୍ଠୀଙ୍କ ସହ କୁଳସଚିବଙ୍କ କାର୍ଯ୍ୟଧାରା ଖାପ ଖାଉ ନ ଥିବାରୁ ଏଭଳି ଘଟଣା ପୁନରାବୃତ୍ତି ହେଉଛି ବୋଲି ବିଶ୍ୱବିଦ୍ୟାଳୟର ଜଣେ ବରିଷ୍ଠ ଅଧିକାରୀ ନାମ ଗୋପନ ରଖି କହିଛନ୍ତି।
୨୦୧୮ ନଭେମ୍ବର ୧ ତାରିଖରେ ବିଶ୍ୱବିଦ୍ୟାଳୟର କୁଳସଚିବ ଭାବେ ଦାୟିତ୍ୱ ଗ୍ରହଣ କରିଥିଲେ ଅଶୋକ କୁମାର ଦାଶ। ରାଜ୍ୟର ଜଣେ ବରିଷ୍ଠ ପ୍ରଶାସକ ଭାବେ ଅଶୋକଙ୍କ ଖ୍ୟାତି ଥିଲା। କେନ୍ଦ୍ରାପଡା ଜିଲା ପଟ୍ଟାମୁଣ୍ଡାଇରେ ଅତିରିକ୍ତ ତହସିଲଦାର, ମାଧ୍ୟମିକ ଶିକ୍ଷା ପରିଷଦ(ବୋର୍ଡ)ର ସମ୍ପାଦକ, ଖୋର୍ଦ୍ଧା ଉପଜିଲାପାଳ, ରାଜ୍ୟ ନିର୍ବାଚନ ଆୟୋଗର ସ୍ବତନ୍ତ୍ର ସଚିବ ଭାବେ ଅଶୋକ ପୂର୍ବରୁ କାର୍ଯ୍ୟ କରିଥିଲେ। ସେ ରେଭେନ୍ଶା ଶିକ୍ଷାନୁଷ୍ଠାନର ଜଣେ ପୂର୍ବତନ ଛାତ୍ର ହୋଇଥିବାରୁ ଏଠାରେ ଅନେକ ବିକାଶମୂଳକ କାର୍ଯ୍ୟ କରିବେ ବୋଲି ଦାୟିତ୍ୱ ଗ୍ରହଣ ସମୟରେ କହିଥିଲେ। ହେଲେ ଦାୟିତ୍ୱ ଗ୍ରହଣ ପରେ କିଛି ନିର୍ଦ୍ଦିଷ୍ଟ ଗୋଷ୍ଠୀଙ୍କ ବିରୋଧୀ ପାଲଟି ଯାଇଥିଲେ। ଅଶୋକଙ୍କ ନିଷ୍ପତ୍ତିକୁ ବିଭିନ୍ନ ସମୟରେ ବିରୋଧ କରାଯାଉଥିଲା। ବିଶ୍ୱବିଦ୍ୟାଳୟର ଅନେକ ଗୁରୁତ୍ୱପୂର୍ଣ୍ଣ ବୈଠକରେ କୁଳସଚିବଙ୍କ ଅନୁପସ୍ଥିତି ବଦଳିର ପୂର୍ବାଭାସ ବୋଲି ଜଣାପଡୁଥିଲା। ଏ ସମ୍ପର୍କରେ ଅଶୋକ କୁହନ୍ତି, ମୋ ନଁାରେ ଯେଉଁ ଅଭିଯୋଗ ହୋଇଛି ତାହା କେବଳ ପିଲାଳିଆମି। ବିଶ୍ୱବିଦ୍ୟାଳୟର ବିକାଶ ପାଇଁ ପଦକ୍ଷେପ ନିଆଯାଉ। ମୁଁ ମଧ୍ୟ ଏଠାରୁ ବିରତି ଚାହୁଁଥିଲି ବୋଲି ଅଶୋକ କହିଛନ୍ତି। କୁଳପତି ପ୍ରଫେସର ଇଶାନ କୁମାର ପାତ୍ରଙ୍କୁ ଏ ସମ୍ପର୍କରେ ପଚାରିବାରୁ କେବଳ ରାଜ୍ୟପାଳଙ୍କ ନିର୍ଦ୍ଦେଶକୁ କାର୍ଯ୍ୟକାରୀ କରାଯାଇଛି ବୋଲି କହିଥିଲେ।
