କଲେଜ ଅଧ୍ୟକ୍ଷଙ୍କୁ ରିପୋର୍ଟ ଦେଉନି ପୋଲିିସ: ମହିଳା ଫରେଷ୍ଟରଙ୍କୁ ବ୍ଲାକମେଲ, ବଳାତ୍କାର ଅଭିଯୋଗ ଘଟଣା
7:41 amJanuary 17, 2020 / 21

ଅନୁଗୋଳ ଅଫିସ, ୧୭।୧ – ଜଣେ ମହିଳା ଫରେଷ୍ଟରଙ୍କୁ ବ୍ଲାକମେଲ ଓ ବଳାତ୍କାର ଅଭିଯୋଗରେ ଅନୁଗୋଳସ୍ଥିତ ଫରେଷ୍ଟ ରେଞ୍ଜର କଲେଜର କନିଷ୍ଠ କିରାଣି ବିଶ୍ୱଜିତ ନାଏକଙ୍କୁ ଗତ ୩ ତାରିଖରେ ପୋଲିସ ଗିରଫ କରି କୋର୍ଟ ଚାଲାଣ କରିଛି। କିନ୍ତୁ ଏ ନେଇ କୌଣସି ସୂଚନା ଏ ଯାଏ ଫରେଷ୍ଟ ରେଞ୍ଜର କଲେଜକୁ ପୋଲିସ ପକ୍ଷରୁ ପଠାଯାଇନାହିଁ। ଫଳରେ ସମ୍ପୃକ୍ତ କିରାଣିଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବା ତ ଦୂରର କଥା ଏଯାଏ କର୍ମଚାରୀ ଜଣକ କୁଆଡ଼େ ଯାଇଛନ୍ତି ସେ ନେଇ କଲେଜ ଅଧ୍ୟକ୍ଷ ଅବଗତ ହୋଇପାରୁନାହାନ୍ତି। ଏପରି କି କନିଷ୍ଠ କିରାଣିଙ୍କ ସମ୍ପର୍କରେ ଗଣମାଧ୍ୟମରେ ପ୍ରକାଶିତ ଖବରକୁ ଭିତ୍ତିକରି ସେ ଗତ ୬ ତାରିଖରେ ଅନୁଗୋଳ ଥାନାକୁ ଚିଠି ଲେଖି ଜାଣିବାକୁ ଚାହିଁଥିଲେ। କିନ୍ତୁ ଥାନାକୁ ପଠାଯାଇଥିବା ଚିଠିର ଉତ୍ତର ତାଙ୍କୁ ଅଦ୍ୟାବଧି ମିଳି ନ ଥିବା କଲେଜ ଅଧ୍ୟକ୍ଷ ଭି. କାର୍ତ୍ତିକ ଅଭିଯୋଗ କରିଛନ୍ତି। ଏ ନେଇ ଏସ୍‌ପିଙ୍କ ଦୃଷ୍ଟି ଆକର୍ଷଣ କରିଥିବା ଅଧ୍ୟକ୍ଷ ପ୍ରକାଶ କରିଛନ୍ତି।
ସରକାରୀ ନିମୟ ଅନୁଯାୟୀ କୌଣସି ସରକାରୀ କର୍ମଚାରୀଙ୍କୁ ଗିରଫ କରାଗଲେ ତୁରନ୍ତ ଉକ୍ତ ବିଭାଗୀୟ ମୁଖ୍ୟଙ୍କୁ ପୋଲିସ ଅବଗତ କରିବ। କିନ୍ତୁ ଫରେଷ୍ଟ ରେଞ୍ଜର କଲେଜର କନିଷ୍ଠ କିରାଣିଙ୍କୁ ଗତ ୩ ତାରିଖରୁ ପୋଲିସ ଗିରଫ କରିଥିଲେ ମଧ୍ୟ ଅଦ୍ୟାବଧି ବିଭାଗୀୟ ଅଧିକାରୀଙ୍କୁ ଅବଗତ କରାଯାଇ ନାହିଁ। ଫଳରେ ସମ୍ପୃକ୍ତ କନିଷ୍ଠ କିରାଣିଙ୍କୁ ସସ୍‌ପେଣ୍ଡ କରିବାରେ ସମସ୍ୟା ଉପୁଜୁଥିବା କଲେଜ ଅଧ୍ୟକ୍ଷ ସୂଚନା ଦେଇଛନ୍ତି। ଅନ୍ୟପକ୍ଷରେ ଥାନାରେ ଅଟକ ଥିବାବେଳେ କନିଷ୍ଠ କିରାଣି କଲେଜକୁ କିପରି ଛୁଟି ଦରଖାସ୍ତ ପଠାଇଲେ ତାହାର ଖୋଳତାଡ଼ କରା ନ ଯିବା ବୁଦ୍ଧିଜୀବୀ ମହଲକୁ ଆଶ୍ଚର୍ଯ୍ୟ କରିଛି।
ଏ ନେଇ ଅନୁଗୋଳ ଏସ୍‌ପି ଜଗମୋହନ ମୀନା କହିଛନ୍ତି, ଫରେଷ୍ଟ ରେଞ୍ଜର କଲେଜ ଅଧ୍ୟକ୍ଷଙ୍କୁ ଥାନା ପକ୍ଷରୁ ଚିଠି ପ୍ରଦାନ କରାଯିବ।