ପିପିଲି,୨୭।୪(ଡି.ଏନ୍.ଏ.): ନିଜ ଦୁଃଖ ଓ ସମସ୍ୟାକୁ ପଛରେ ପକାଇ ମହାମାରୀ କରୋନା ମୁକାବିଲାରେ ଦେଶ ପାଇଁ ସେବା ପ୍ରଦାନ କରି ଅନେକ ପୋଲିସ କର୍ମଚାରୀ ବେଶ ପ୍ରଶଂସିତ ହୋଇଛନ୍ତି। ଏହି କ୍ରମରେ ପୁରୀ ଜିଲା ପିପିଲି ଥାନାର ମହିଳା ହୋମଗାର୍ଡ ଗୌରୀ ବେହେରା ମଧ୍ୟ ନିଜ ଝିଅକୁ ହରାଇବା ସତ୍ତ୍ୱେ କର୍ତ୍ତବ୍ୟ ଆଗରେ ହାର ମାନି ନାହାନ୍ତି। ଗୌରୀଙ୍କ ୧୩ବର୍ଷୀୟା ଝିଅ ଲୋପାମୁଦ୍ରାଙ୍କର ସୋମବାର ପୂର୍ବାହ୍ନରେ ଅକାଳ ବିୟୋଗ ଘଟିଛି। ସେ କର୍କଟ ରୋଗରେ ପୀଡ଼ିତ ହୋଇ କିଛିଦିନ ହେଲା ଶଯ୍ୟାଶାୟୀ ଥିଲେ। ଏଭଳି ସ୍ଥିତିରେ ଗୌରୀ ତାଙ୍କୁ ଘରେ ଛାଡି ଲୋକଙ୍କୁ ସେବା ଯୋଗାଇ ଦେଉଥିଲେ। ତେବେ ସୋମବାର ଝିଅର ମୃତ୍ୟୁ ଖବର ଶୁଣି ସେ ଭାଙ୍ଗିପଡ଼ିଥିଲେ ବି କର୍ତ୍ତବ୍ୟରୁ ଓହରି ନ ଥିଲେ। କରୋନା ଭଳି ପରସ୍ଥିତିରେ କର୍ତ୍ତବ୍ୟ ତାଙ୍କ ପାଇଁ ଅଧିକ ଗୁରୁତ୍ୱପୂର୍ଣ୍ଣ ବୋଲି ସେ ଉଚିତ୍ ମନେ କରି ନିଜ କାର୍ଯ୍ୟ ଜାରି ରଖିଛନ୍ତି। ଏଥିପାଇଁ ତାଙ୍କୁ ଥାନା ଅଧିକାରୀଙ୍କ ସମେତ ଅଞ୍ଚଳବାସୀ ପ୍ରଶଂସା କରିଛନ୍ତି।
