ଦିଗପହଣ୍ଡି,୬ା୪(ଡି.ଏନ୍.ଏ.): ଦିଗପହଣ୍ଡି ସହର ସମେତ ଗ୍ରାମାଞ୍ଚଳଗୁଡିକରେ ଶଟଡାଉନ ସମୟରେ ବିନା କାରଣରେ କେହି ବ୍ୟକ୍ତି ଘରୁ ବାହାରିଲେ ଫୌଜଦାରୀ ମକଦ୍ଦମା ରୁଜୁ କରାଯିବ ବୋଲି ପକ୍ଷରୁ ଚେତାବନୀ ଦିଆଯାଇଛି। ଅନ୍ୟପକ୍ଷରେ ସୋମବାର ଦିଗପହଣ୍ଡି ତହସିଲଦାର ଅଦ୍ୱୈତ କୁମାର ସ୍ବାଇଁ, ବିଡ଼ିଓ ହଳଧର ଶବର, ଏନଏସି କାର୍ଯ୍ୟନିର୍ବାହୀ ଅଧିକାରୀ ପ୍ରଫୁଲ୍ଲ ଚନ୍ଦ୍ର ଡାକୁଆ ପ୍ରମୁଖ ସହରର ପ୍ରତି ସାହି ବସ୍ତି ବୁଲିବା ସହ କରୋନା ଭୟାବହତା ସମ୍ପର୍କରେ ଲୋକଙ୍କୁ ସଚେତନ କରାଇଛନ୍ତି। ବଜାର ବସଷ୍ଟାଣ୍ଡ ଇଲାକାରେ ବିଭିନ୍ନ ତେଜରାତି ଦୋକାନ ଆଗରେ ସାମାଜିକ ଦୂରତା ରକ୍ଷା କରାଯାଉ ନ ଥିବା ଦେଖି ଦୋକାନୀଙ୍କୁ ତାଗିଦ କରିଥିଲେ। କେତେଜଣ ବରିଷ୍ଠ ନାଗରିକ ବସଷ୍ଟାଣ୍ଡ ଓ ବଜାରକୁ ଆସିଥିବାରୁ ସେମାନଙ୍କୁ ଘରୁ ନ ବାହାରିବାକୁ ପରାମର୍ଶ ଦେଇଥିଲେ। ଗ୍ରାମାଞ୍ଚଳରେ କିଛି ଯୁବକ ବାଇକ ଯୋଗେ ଘୁରି ବୁଲୁଥିବା ଖବରପାଇ ତହସିଲଦାରଙ୍କ ସମେତ ରାଜସ୍ବ ନିରୀକ୍ଷକ ଫକୀର ମୋହନ ରାଉତଙ୍କ ନେତୃତ୍ୱରେ ଏନଫୋର୍ସମେଣ୍ଟ ସ୍କ୍ବାର୍ଡ ସମ୍ପୃକ୍ତ ଗାଁ ରେ ଅତର୍କିତ ଚଢ଼ାଉ କରି ଯୁବକମାନଙ୍କୁ କାର୍ଯ୍ୟାନୁଷ୍ଠାନ ପାଇଁ ଚେତାବନୀ ଦେଇଥିବା ଜଣାପଡିଛି।
