ଛତିଶଗଡ଼ର ମାଓପ୍ରବଣ ଅଞ୍ଚଳ ବସ୍ତର ଓ ଦାନ୍ତଓ୍ବୋଡାରେ ଶିକ୍ଷା ଓ ଗମନାଗମନର ସୁବିଧା କମ୍। ଦୁର୍ଗମ ଗାଁଗୁଡ଼ିକରେ ରହୁଥିବା ପିଲାମାନେ ବି ଶିକ୍ଷାରୁ ବଞ୍ଚିତ ହେଉଛନ୍ତି। ସେଭଳି ଅଞ୍ଚଳରୁ ଭଲ ପଢ଼ି ମେଡିକାଲ ପାଇଁ ନିଟ୍ କିମ୍ବା ଜେଇଇରେ କୃତକାର୍ଯ୍ୟ ହେବା ଛାତ୍ରୀଛାତ୍ରଙ୍କ ସଂଖ୍ୟା ନଗଣ୍ୟ। ଏଣୁ ଏଭଳି ପରିସ୍ଥିତିକୁ ସାମ୍ନାକରି ବସ୍ତର ଭଳି ଅନୁନ୍ନତ ଅଞ୍ଚଳରୁ ଆଇଏଏସ୍ ଅଧିକାରୀ ହୋଇଥିବା ବିନିତ ନନ୍ଦନଓ୍ବାର ଗରିବ ପିଲାମାନଙ୍କୁ ଜେଇଇ ଓ ନିଟ୍ ପରୀକ୍ଷା ପାଇଁ ମାଗଣାରେ କୋଚିଂ ଦେଉଛନ୍ତି। ବସ୍ତର ଜିଲାପାଳ ଭାବେ କାର୍ଯ୍ୟରତ ବିନିତ ଏଥିପାଇଁ ‘ସେକେଣ୍ଡ ଚାନ୍ସ’ ଅଭିଯାନ ଆରମ୍ଭ କରିଛନ୍ତି। ଅର୍ଥାତ୍ ପ୍ରଥମ ପ୍ରୟାସରେ ଯେଉଁମାନେ ଏହିସବୁ ପରୀକ୍ଷାରେ କୃତକାର୍ଯ୍ୟ ହେଉନାହାନ୍ତି ସେମାନଙ୍କ ପାଇଁ ଆଉ ଏକ ବର୍ଷ ମାଗଣା କୋଚିଂ ଯୋଗାଇ ଦେଉଛନ୍ତି ବିନିତ। ଏହାକୁ ସେ ସରକାରୀ ଯୋଜନା ‘ଟଚ୍ ଦି ସ୍କାଏ’ ମାଧ୍ୟମରେ ସଞ୍ଚାଳନ କରୁଛନ୍ତି। ତାଙ୍କର ଏହି ପ୍ରୟାସ ବହୁ ଛାତ୍ରୀଛାତ୍ରଙ୍କ ଜୀବନରେ ବିରାଟ ପରିବର୍ତ୍ତନ ଆଣିପାରିଛି ଓ ପିଲାମାନଙ୍କର ଡାକ୍ତର କିମ୍ବା ଇଞ୍ଜିନିୟର ହେବା ସ୍ବପ୍ନ ସାକାର ହୋଇପାରୁଛି। ବସ୍ତରରେ ଜିଲାପାଳ ଭାବେ ଅବସ୍ଥାପିତ ହେବା ପରେ ବିନିତ ତୁରନ୍ତ ପିଲାମାନଙ୍କ ସମସ୍ୟାକୁ ହୃଦୟଙ୍ଗମ କରିବା ସହ ଏଭଳି ସୁବିଧା ଦେଶ ଲାଗି ଯୋଗାଇବାକୁ ନିଷ୍ପତ୍ତି ଗ୍ରହଣ କରିଥିଲେ। କାରଣ ବିନିତଙ୍କ ପିଲାଦିନ ଅଭାବରେ କଟିଥିଲା ଓ କୋଚିଂ ନେଇ ଜଣେ ଡାକ୍ତର କିମ୍ବା ଇଞ୍ଜିନିୟର ହେବାରୁ ସେ ବଞ୍ଚିତ ହୋଇଥିଲେ। କିନ୍ତୁ ୩ଥର ଚେଷ୍ଟା କରି ସିଭିଲ ସର୍ଭିସ ପରୀକ୍ଷାରେ ସଫଳତା ପାଇଥିଲେ ବିନିତ।
