ବୁଲା କୁକୁରଙ୍କ ଉପରେ ସବୁଠି ଅତ୍ୟାଚାର କରାଯାଉଥିତ୍ବା ବେଳେ ସେମାନଙ୍କ ଦେଖାରଖା ପାଇଁ ଜଣେ ମହିଳା ନିଜର ଗହଣା ବିକିଦେବା ଭଳି ରୋଚକ ଖବର ଏବେ ସାମ୍ନାକୁ ଆସିଛି। ପଶ୍ଚିମବଙ୍ଗ ନଦୀୟା ଜିଲା ନିବାସୀ ନୀଳାଞ୍ଜନା ବିଶ୍ୱାସ ଏପରି କାର୍ଯ୍ୟରେ ଲାଗିଛନ୍ତି। ବିଶ୍ୱାସଙ୍କୁ ବର୍ତ୍ତମାନ ବୟସ ୪୫। ସେ ନଦୀୟା ସହରରେ ୪୦୦ କୁକୁରଙ୍କୁ ପ୍ରତିଦିନ ଖାଇବାକୁ ଦେଉଛନ୍ତି। ଅନେକ ସମୟରେ ସେମାନେ ରୋଗାକ୍ରାନ୍ତ ହୋଇପଡନ୍ତି ଏବଂ ବିଶ୍ୱାସ ସେମାନଙ୍କୁ ଓ୍ୟଷଧ ଓ ଟିକା ଦେବାର ବ୍ୟବସ୍ଥା ମଧ୍ୟ କରିଥାନ୍ତି। ଏ ବାବଦରେ ସମସ୍ତ ଖର୍ଚ୍ଚ ସେ ବହନ କରୁଛନ୍ତି। କୁକୁରଙ୍କୁ ଖାଇବାକୁ ଦେବା ପାଇଁ ବ୍ୟାଙ୍କରୁ ୩.୩ ଲକ୍ଷ ଟଙ୍କା ଋଣ ମଧ୍ୟ କରିଛନ୍ତି। ଏହି କାର୍ଯ୍ୟରେ ତାଙ୍କୁ ସହଯୋଗ କରିବା ପାଇଁ ତିନି ଜଣ ଲୋକଙ୍କୁ ବି ସେ ନିଯୁକ୍ତ କରିଛନ୍ତି। ଏମାନେ ଗୋଟିଏ ତିନିଚକିଆ ଯାନରେ ବସି ପୂରା ସହର ବୁଲି କୁକୁରଙ୍କୁ ଭୋଜନ ଦେଉଛନ୍ତି। ନୀଳାଞ୍ଜନା ଚିକେନ ଓ ଭାତ ନେଇ ସହକର୍ମୀଙ୍କ ସହ ପୂରା ସହର ବୁଲନ୍ତି ଏବଂ କୁକୁରଙ୍କୁ ଖାଇବାକୁ ଦେଇଥାନ୍ତି। ଏହି ଖାଦ୍ୟ ପ୍ରସ୍ତୁତ କରିବା ପାଇଁ ସେ ଏକ ରୋଷେଇଘର କରିଛନ୍ତି। ଫ୍ରିଜ୍ର ବ୍ୟବସ୍ଥା ମଧ୍ୟ ରଖିଛନ୍ତି। ନୀଳାଞ୍ଜନା କୁହନ୍ତି, ତାଙ୍କ ଘରେ ୧୪ଟି କୁକୁର ରହିଛନ୍ତି ଓ ସେଥି ମଧ୍ୟରୁ ୧୩ଟି ବୁଲା କୁକୁର। ଏମାନଙ୍କ ଦାୟିତ୍ୱ ସହ ସହରର ରାସ୍ତାରେ ବୁଲୁଥିବା ଅନ୍ୟ କୁକୁରଙ୍କ ଦାୟିତ୍ୱ ବି ତାଙ୍କର ବୋଲି ସେ ମନେକରନ୍ତି ଓ ସେଥିପାଇଁ ଏପରି କାର୍ଯ୍ୟ କରୁଛନ୍ତି। ଏହି କାର୍ଯ୍ୟକୁ ନୀଳାଞ୍ଜନାଙ୍କ ସ୍ବାମୀଙ୍କ ସମେତ ପଡୋଶୀମାନେ ବିରୋଧ କରୁଛନ୍ତି। କିନ୍ତୁ ତାଙ୍କ କଲେଜପଢୁଆ ଝିଅ ଓ ପଞ୍ଚମଶ୍ରେଣୀରେ ପଢୁଥିବା ପୁଅ ତାଙ୍କୁ ସମର୍ଥନ କରୁଛନ୍ତି।
