କଣିହାଁ, ୧୩ା୧(ଡି.ଏନ.ଏ.): ପାଲଲହଡ଼ା ବିଧାନସଭା ନିର୍ବାଚନମଣ୍ଡଳୀ ରେଙ୍ଗାଳି ଡ୍ୟାମ ସାଇଟ ଥାନା ଅଞ୍ଚଳକୁ ଶନିବାର ଏମପି ମହେଶ ସାହୁ ଗସ୍ତ କରି ବିଭିନ୍ନ ଉନ୍ନୟନମୂଳକ ପ୍ରକଳ୍ପ ଉଦ୍ଘାଟନ କରିଛନ୍ତି। ଏଥିସହ ବିଭିନ୍ନ ବିକାଶମୂଳକ ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ କରିଥିଲେ। ଏମ୍ପି ରେଙ୍ଗାଳି ପଞ୍ଚାୟତ ମାର୍କେଟ କମ୍ପେକ୍ସ, ସରପଞ୍ଚଙ୍କ ବିଶ୍ରାମ ପ୍ରକୋଷ୍ଠ, ନିର୍ବାହୀ ଅଧିକାରୀଙ୍କ କାର୍ଯ୍ୟାଳୟ, କୁଳୁମା ପଞ୍ଚାୟତ ଚିତ୍ତବିନୋଦନ କେନ୍ଦ୍ର, ଖିଣ୍ଡୋ ମାର୍କେଟ କମ୍ପେକ୍ସ, କୋଠ ଘର, ନୀଳାପଶି ଗୋଷ୍ଠୀକେନ୍ଦ୍ରକୁ ଉଦ୍ଘାଟନ କରିଥିଲେ। ଏଥିସହ ରେଙ୍ଗାଳି କଲ୍ୟାଣ ମଣ୍ଡପ, କୁଳୁମା ମାର୍କେଟ କମ୍ପେକ୍ସ, ତେଲିପଶି କ୍ଷୁଦ୍ର ଜଳସେଚନ ପ୍ରକଳ୍ପ, ରବିଚନ୍ଦ୍ର ହାଇସ୍କୁଲ ଫାଟକ ଏବଂ ପାଚେରି ନିର୍ମାଣ ପାଇଁ ଭିତ୍ତିପ୍ରସ୍ତର ସ୍ଥାପନ କରିଥିଲେ। ଏହି ଅବସରରେ ସେ ଜନସାଧାରଣଙ୍କ ସହ ବିଭିନ୍ନ ବିଷୟରେ ଆଲୋଚନା କରି ସମସ୍ୟା ପଚାରି ବୁଝିଥିଲେ। ଅଧ୍ୟକ୍ଷା ନମିତା ସାହୁ, ସରପଞ୍ଚ ରଶ୍ମିତା ସେଠୀ, ନିଶାକର ବିଶ୍ୱାଳ, ସମିତିସଭ୍ୟା ରୀନା ପାତ୍ର, ବାସନ୍ତୀ ପ୍ରଧାନ, ନାଏବ ସରପଞ୍ଚ ମନୋରମା ପ୍ରଧାନ, ବୀଣାପାଣି ପ୍ରଧାନଙ୍କ ସମେତ ବିଭାଗୀୟ ଅଧିକାରୀ ଉପସ୍ଥିତ ଥିଲେ। ସୁନୀଲ ପ୍ରଧାନ, ନିର୍ମଳ ସାହୁ, ଶଶିଶେଖର ସିଂ, ଶୁରେଶ ଧଳ ପ୍ରମୁଖ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ।
ଏହି ପରିପ୍ରେକ୍ଷୀରେ ଏମ୍ପି ନୀଳାପଶି ରବିଚନ୍ଦ୍ର ହାଇସ୍କୁଲରେ ଚାଲିଥିବା ବାର୍ଷିକ କ୍ରୀଡ଼ା ଉତ୍ସବର ଉଦ୍ଯାପନୀ କାର୍ଯ୍ୟକ୍ରମରେ ଯୋଗଦେଇଥିଲେ। ବ୍ଲକ ଅଧ୍ୟକ୍ଷା, ଏବିଡିଓ ରାହାସ ଚନ୍ଦ୍ର ନାଏକ ପ୍ରମୁଖ ଅତିଥି ଭାବେ ଯୋଗଦେଇ କୃତୀ ପ୍ରତିଯୋଗୀଙ୍କୁ ପୁରସ୍କୃତ କରିଥିଲେ। ପ୍ରଧାନ ଶିକ୍ଷକ ପ୍ରସନ୍ନ କୁମାର ବାରିକଙ୍କ ସଭାପତିତ୍ୱରେ କୃତୀ ପ୍ରତିଯୋଗୀଙ୍କୁ ପୁରସ୍କୃତ କରାଯାଇଥିଲା। ଶିକ୍ଷକ ବସନ୍ତ ସାହୁ ଅତିଥି ପରିଚୟ ଏବଂ ଅନନ୍ତ ଚରଣ ପ୍ରଧାନ ଧନ୍ୟବାଦ ଅର୍ପଣ କରିଥିଲେ।
