ଭୁବନେଶ୍ୱର, ୧ା୯(ବ୍ୟୁରୋ): ଉଦ୍ଧାର ହୋଇଥିବା ଚୋରି ଗାଡ଼ି ଦେବା ପାଇଁ ମାଲିକଠାରୁ ୭ହଜାର ଟଙ୍କା ଲାଞ୍ଚ ଦାବି କରି ନିଲମ୍ବିତ ହୋଇଛନ୍ତି ନୟାପଲ୍ଲୀ ଥାନାର ଏସ୍ଆଇ ସୁଧାଂଶୁ ଶେଖର ପରିଡ଼ା। ଏନେଇ ଶନିବାର କମିଶନରେଟ ପୋଲିସ ମୁଖ୍ୟାଳୟ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି। ମିଳିଥିବା ସୂଚନାନୁଯାୟୀ, ନିକଟରେ ନୟାପଲ୍ଲୀ ଥାନା ପୋଲିସ ବାଇକ ଚୋରି ରାକେଟ ଠାବ କରିବା ସହ ଅଭିଯୁକ୍ତଙ୍କୁ ଗିରଫ କରିଥିଲା। ଏଥିସହ ସେମାନେ ଚୋରି କରିଥିବା ବାଇକ୍କୁ ମଧ୍ୟ ପୋଲିସ ଉଦ୍ଧାର କରିଥିଲା। ହେଲେ ଏକ ଚୋରା ବାଇକର ମାଲିକ ଏ ସମ୍ପର୍କରେ ଜାଣିବା ପରେ ଥାନାକୁ ଆସିଥିଲେ। ମାମଲାର ତଦନ୍ତ କରୁଥିବା ଅଧିକାରୀ ସୁଧାଂଶୁଙ୍କୁ ଭେଟି ତାଙ୍କ ବାଇକ୍ ନେବାକୁ କହିଥିଲେ। ହେଲେ ସୁଧାଂଶୁ ଏଥିପାଇଁ ୭ ହଜାର ଟଙ୍କା ମାଗିଥିଲେ। ଏ ନେଇ ସମ୍ପୃକ୍ତ ବ୍ୟକ୍ତି ପୋଲିସ କମିଶନରଙ୍କୁ ଭେଟି ଜଣାଇଥିଲେ। କମିଶନର ଅଭିଯୋଗର ସତ୍ୟତା ଜାଣିବା ପରେ ଏସ୍ଆଇ ସୁଧାଂଶୁଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି।
