ଲକ୍ଷ୍ନୌ,୨୩।୪: ଉତ୍ତରପ୍ରଦେଶ ସରକାର ରାଜ୍ୟରେ ୩୪ଟି ଅସ୍ଥାୟୀ ଜେଲ ସ୍ଥାପନା କରିଛନ୍ତି। ଲକ୍ଷ୍ନୌର କଶ୍ମୀରି ମୋହଲ୍ଲା ମ୍ୟୁନସିପାଲ ବାଳିକା ଇଣ୍ଟର କଲେଜ ଓ ସହରର ବିଭିନ୍ନ ସ୍କୁଲରେ ଏହି ଅସ୍ଥାୟୀ ଜେଲ ତିଆରି କରାଯାଇଥିବା ସୂଚନା ମିଳିଛି। ଏଠାରେ ୧୫୬ଜଣ ବିଦେଶୀ ନାଗରିକଙ୍କ ସହ ପ୍ରାୟ ୨୮୮ଲୋକଙ୍କୁ ବନ୍ଦୀ କରି ରଖାଯାଇଛି। ଏହି ଜେଲରେ ସେମାନେ ରହିଛନ୍ତି, ଯେଉଁମାନେ ଟୁରିଷ୍ଟ ଭିଜାରେ ଭାରତକୁ ଆସିଥିଲେ କିନ୍ତୁ ତବଲିଘି ଜମାତରେ ସାମିଲ ହୋଇ ଧର୍ମ ପ୍ରଚାର କାମ କରିଥିଲେ। ଏତଦ୍ ବ୍ୟତୀତ ଯେଉଁମାନେ ତବଲିଘି ଜମାତ ସହ ଜଡିତ ଅଛନ୍ତି ଏବଂ ବିଦେଶୀ ନାଗରିକଙ୍କୁ ଲୁଚିବାରେ ସାହାଯ୍ୟ କରିଥିଲେ ସେମାନଙ୍କୁ ଏହି ଜେଲରେ ରଖାଯାଇଥିବା ଜଣାପଡ଼ିଛି। ସେହିପରି ହଟ୍ସ୍ପଟ ଅଞ୍ଚଳରେ ଲକ୍ଡାଉନ ନିୟମ ଉଲ୍ଲଂଘନ କରିଥିବା ବ୍ୟକ୍ତି, ଏବଂ ସ୍ବାସ୍ଥ୍ୟକର୍ମୀ ଓ ପୋଲିସଙ୍କୁ ଆକ୍ରମଣ କରିଥିବା ଅଭିଯୁକ୍ତଙ୍କୁ ଏଠାରେ ରଖାଯାଇଛି। ତେବେ ଏହି ଅସ୍ଥାୟୀ ଜେଲରେ ବନ୍ଦୀ ହୋଇଥିବା ବିଦେଶୀ ନାଗରିକଙ୍କ ମଧ୍ୟରେ ଫ୍ରାନ୍ସ, ମୋରୋକୋ, ମାଲେସିଆ, ଥାଇଲାଣ୍ଡ, କିର୍ଗିସ୍ତାନ, କାଜାକିସ୍ତାନ, ବାଲାଂଦେଶ, ସୁଡାନ, ପାଲେଷ୍ଟାଇନ୍, ସିରିଆ ଓ ମାଲିର ନାଗରିକ ସାମିଲ ହୋଇଛନ୍ତି।
