ପୁରୀ ଅଫିସ,୧୪ା୫: ଶୁକ୍ରବାର ଶ୍ରୀକ୍ଷେତ୍ର ଭଉଁରୀ। ଏହି ପବିତ୍ର ଦିନରେ ମହାପ୍ରଭୁଙ୍କ ତିନି ରଥର ୬ଟି ନାହାକା ଚକ ଡେରାଯିବାର ବିଧି ରହିଛି। ଏଥିଲାଗି ରଥଖଳାରେ ତିନିରଥର ୬ଟି ନାହାକା ଚକ ଏବଂ ୩ଟି ନାହାକା ଅଖ ନିର୍ମାଣ ସରିଛି। ଶୁକ୍ରବାର ଶ୍ରୀମନ୍ଦିରରୁ ମହାପ୍ରଭୁଙ୍କ ରଥ ଆଜ୍ଞାମାଳ ଆସି ଲାଗିହେବା ପରେ ଚକ ଡେରାଯିବ। ଅନ୍ୟପକ୍ଷରେ ଗୁରୁବାର ରଥକନା ଆସି ପହଞ୍ଚତ୍ଛି।
ଗୁରୁବାର ସୁଦ୍ଧା ୩୪ଟି ତୁମ୍ବର ବିନ୍ଧ କାର୍ଯ୍ୟ ଶେଷ ହୋଇଛି। ତିନିରଥର ୬ଟି ନାହାକା ଚକକୁ ବାଦ୍ ଦେଲେ ନନ୍ଦିଘୋଷ ରଥର ଗୋଟିଏ ଚକରେ ପଇ ଲାଗିହୋଇ ପଇଠ ହେଉଛି। ଆଉ ଗୋଟିଏ ପଇ ଲାଗି ସାରିଥିବାବେଳେ ପଇଠ ବାକି ଅଛି। ଦର୍ପଦଳନ ରଥର ଦୁଇଟି ଚକରେ ଅର ପଇ ସଂଯୋଗ ଚାଲିଛି। ୬ଟି ତୁମ୍ବରେ ବିନ୍ଧ କାର୍ଯ୍ୟ ଶେଷ ପର୍ଯ୍ୟାୟରେ ଥିବାବେଳେ ଦୁଇଟିର ବିନ୍ଧ କାମ ବାକି ଅଛି। ତାଳଧ୍ୱଜ ରଥର ଦୁଇଟି ଚକରେ ପଇ ଲାଗି ହେବାକୁ ଥିବାବେଳେ ଗୋଟିକରେ ଅର ସଂଯୋଗ ସରିଛି। ସେହିପରି ରୂପକାର ସେବକମାନେ ୧୧ଟି ଗୁଜରେ ସିଂହବିରାଳ ଖୋଦେଇ ସାରିଥିବା ବେଳେ ୯ଟି ଜଳଯନ୍ତ୍ର କାମ ସରିଛି । ଦୋଳବେଦି ପରିସର କମାର ଶାଳରେ କମାର ସେବକମାନେ ରଥର ବିଭିନ୍ନ ପ୍ରକାର କଣ୍ଟା ଏବଂ ଅନ୍ୟାନ୍ୟ ଆନୁଷଙ୍ଗିକ ଲୁହା ସାମଗ୍ରୀ ତିଆରି କରୁଛନ୍ତି।
ସକାଳେ ରଥଖଳାରେ କାମ ଆରମ୍ଭ ପୂର୍ବରୁ ୧୬୨ଜଣ ସେବକଙ୍କ ଥର୍ମାଲ ସ୍କ୍ରିନିଂ କରାଯାଇଥିଲା। ସମସ୍ତେ ସୁସ୍ଥ ଅଛନ୍ତି। କରୋନା ଟେଷ୍ଟ ପାଇଁ ସ୍ବାବ୍ ସଂଗ୍ରହ ଦ୍ୱିତୀୟ ଦିନରେ ପହଞ୍ଚତ୍ଛି। ଗୁରୁବାର ୭୫ଜଣ ରଥ ନିର୍ମାଣକାରୀଙ୍କ ସ୍ବାବ୍ ସଂଗ୍ରହ ହୋଇଛି।
