ଆଜି ଅନୁଗୋଳ ବ୍ଲକସ୍ତରୀୟ ମହୋତ୍ସବ
7:56 amJanuary 29, 2020

ଅନୁଗୋଳ ଅଫିସ୍‌, ୨୯।୧ – ଆସନ୍ତା ଫେବୃୟାରୀରେ ଜିଲା ମହୋତ୍ସବ ଆୟୋଜନ କରାଯିବ। ଏନେଇ ପ୍ରତି ବ୍ଲକ ସ୍ତରରେ ସଜବାଜ ଆରମ୍ଭ ହୋଇଛି। ଅନୁଗୋଳ ବ୍ଲକରେ ମଧ୍ୟ ପ୍ରସ୍ତୁତି ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚତ୍ଛି। ବୁଧବାର ପୂର୍ବାହ୍ନରେ ଅନୁଗୋଳ ବ୍ଲକ ବନ୍ତଳା ଉଚ୍ଚ ବିଦ୍ୟାଳୟ ପରିସରରେ ବ୍ଲକ ମହୋତ୍ସବ କରାଯାଇ ଜିଲା ମହୋତ୍ସବ ପାଇଁ ଦଳ ବଛାଯିବାର କାର୍ଯ୍ୟକ୍ରମ ରହିଛି। ସେହିପରି ୩୦ରୁ ସାତକୋଶିଆରୁ ହିଙ୍ଗୁଳା ମହୋତ୍ସବ ପାଇଁ ମଧ୍ୟ ପ୍ରସ୍ତୁତି ଶେଷ ହୋଇଛି। ଏ ନେଇ ଅନୁଗୋଳ ଅତିରିକ୍ତ ଜିଲାପାଳଙ୍କ ଅଧ୍ୟକ୍ଷତାରେ ମଙ୍ଗଳବାର ସନ୍ଧ୍ୟାରେ ଅନୁଷ୍ଠିତ ବୈଠକରେ ଶେଷ ପର୍ଯ୍ୟାୟ ଆଲୋଚନା ହୋଇଛି ବୋଲି ବିଡିଓ ମାୟାଧର ବେହେରା ସୂଚନା ଦେଇଛନ୍ତି। ଅନୁଗୋଳ ବ୍ଲକରେ ଥିବା ୩୪ଟି ପଞ୍ଚାୟତରୁ ୨ଟି ଲେଖାଏଁ ଦଳ ପ୍ରତିଯୋଗିତାରେ ଯୋଗଦେବେ ବୋଲି ଜଣାପଡିଛି।
ବ୍ଲକସ୍ତରୀୟ ମହୋତ୍ସବରେ ପାଲା, ଦାଶକାଠିଆ, ଦଣ୍ଡ, ସଂକୀର୍ତ୍ତନ ଓ ଓଡ଼ିଶୀ ନୃତ୍ୟ ଆଦି ପ୍ରତିଯୋଗିତା ଅନୁଷ୍ଠିତ ହେବ। ଏହି ପ୍ରତିଯୋଗିତା ଆୟୋଜନ କରିବାକୁ ବ୍ଲକ କଳା ସଂସ୍କୃତି ସଂଘର ଉପସଭାପତିଙ୍କୁ ଦାୟିତ୍ୱ ପ୍ରଦାନ କରାଯାଇଛି। ତେବେ ଏହି ପ୍ରତିଯୋଗିତାରେ ବିଭିନ୍ନ ଅଞ୍ଚଳରୁ ଅଂଶଗ୍ରହଣ କରିବାକୁ ଥିବା ପ୍ରତିଯୋଗୀମାନଙ୍କ ମଧ୍ୟରୁ ଶ୍ରେଷ୍ଠ ଗୋଟିଏ ଟ୍ରୁପ୍‌କୁ ବଛାଯାଇ ଜିଲା ମହୋତ୍ସବରେ ଭାଗ ନେବାକୁ ସୁଯୋଗ ପ୍ରଦାନ କରାଯିବ ବୋଲି ଅନୁଗୋଳ ଅତିରିକ୍ତ ଜିଲାପାଳ ତପନ କୁମାର ଶତପଥୀ, ପିଡି ଅତୁଲ୍ୟ କୁମାର ଚମ୍ପତ୍ତିରାୟ, ଅନୁଗୋଳ ଉପଜିଲାପାଳ ବାସୁଦେବ ଶତପଥୀ ଓ ବିଡିଓଙ୍କ ଉପସ୍ଥିତିରେ ଏହି ବୈଠକ ଆୟୋଜନ କରାଯାଇଥିଲା। ସେହିପରି ୩୦ରେ ସାତକୋଶିଆରୁ ଜିଲାପାଳ ମନୋଜ କୁମାର ମହାନ୍ତି ମଶାଲ ଯାତ୍ରାର ଦାୟିତ୍ୱ ନେଇଥିବାରୁ ଏଥିପ୍ରତି ସମସ୍ତ ଜିଲା ଅଧିକାରୀ ସ୍ବତନ୍ତ୍ର ଦୃଷ୍ଟି ରଖିଛନ୍ତି। ସାତକୋଶିଆରୁ ମଶାଲ ବାହାରି ହିଙ୍ଗୁଳା ପୀଠକୁ ଯିବ। ମଶାଲ ଶୋଭାଯାତ୍ରାରେ କିପରି ଅଧିକ ସଂଖ୍ୟାରେ ଲୋକ ସାମିଲ ହେବେ ସେନେଇ ମଧ୍ୟ ଆଲୋଚନା ହୋଇଥିଲା। ପ୍ରତି ଛକରେ ସ୍ବୟଂ ସହାୟକ ଗୋଷ୍ଠୀ, ଜନ ପ୍ରତିନିଧି ଓ ସାଧାରଣ ଲୋକେ ମଶାଲକୁ ସ୍ବାଗତ କରିବାର ବ୍ୟବସ୍ଥା କରାଯାଇଥିବା ସୂଚନା ମିଳିଛି। ସାତକୋଶିଆରୁ ବାହାରିବାକୁ ଥିବା ମଶାଲ ଶେଭାଯାତ୍ରା ବନ୍ତଳା ପର୍ଯ୍ୟନ୍ତ ଆସିବା ପରେ ବେଡ଼ାଶାସନ ଦେଇ ମହୀଧରପୁର ପରେ ଫୁଲପଡ଼ା ଦେଇ ଖଲାରି ଅଭିମୁଖେ ଆସିବ। ଏହାପରେ କଲେଜ ଛକ ଦେଇ ସର୍କିଟ ହାଉସ ଓ ପରେ ବଅଁରପାଳ ଦେଇ ହିଙ୍ଗୁଳା ଅଭିମୁଖେ ଯାତ୍ରା କରିବ ବୋଲି ସୂଚନା ମିଳିଛି।