ପାଟଣା,୧୯।୧୦(ସ୍ବ.ପ୍ର.)- ଏକ ଅର୍ଥ ଲଗାଣକାରୀ ସଂସ୍ଥାର ଫିଲ୍ଡ ଅଫିସର ଅଜୟ କୁମାର ସାହଙ୍କଠାରୁ ରାସ୍ତାରେ ଟଙ୍କା ଲୁଟ୍ ଘଟଣାରେ କେନ୍ଦୁଝର ଜିଲା ପାଟଣା ଥାନା ପୋଲିସ ପର୍ଦ୍ଦାଫାଶ କରିଛି। କେହି ଲୁଟେରା ନୁହେଁ ନିଜେ ଅଭିଯୁକ୍ତ ଅଜୟ ଲୁଟ୍ ବାହାନା କରି ଟଙ୍କା ଆତ୍ମସାତ କରିବାକୁ ଉଦ୍ୟମ କରିଥିବା ତଦନ୍ତରୁ ଜଣାପଡିଛି। ସେ ଟଙ୍କା ଲୁଚାଇ ରଖିଥିବା ତାଙ୍କର ଜଣେ ସମ୍ପର୍କୀୟଙ୍କ ଘରୁ ପୋଲିସ ୧ଲକ୍ଷ ୫୯ ହଜାର ୯୭୩ ଟଙ୍କା, ବାଇକ, ସ୍ମାର୍ଟ ଫୋନ ଓ କାଗଜ ପତ୍ର ଜବତ କରିଛି। ଏ ନେଇ ଅଧିକ ତଦନ୍ତ ଚାଲୁ ରହିଥିବା ଘଟଗାଁ ଏସ୍ଡିପିଓ ରବୀନ୍ଦ୍ର କୁମାର ମଲ୍ଲିକ ସୂଚନା ଦେଇଛନ୍ତି।
ଅଭିଯୁକ୍ତ ଅଜୟ ମୟୂରଭଞ୍ଜ ଜିଲା କରଞ୍ଜିଆ ସ୍ଥିତ ଭାରତ ଫାଇନାନ୍ସ ଇନକ୍ଲୁଜନ ଲିମିଟେଡ କମ୍ପାନୀ ନାମକ ଏକ ଅର୍ଥ ଲଗାଣକାରୀ ସଂସ୍ଥାରେ ଫିଲ୍ଡ ଅଫିସର ଭାବେ କାର୍ଯ୍ୟ କରୁଥିଲେ। ଗତ ବୁଧବାର ସେ ସାହାରପଡା ବ୍ଲକ ମାଛଗଡ଼ ଓ ରାଇଡିହା ଅଞ୍ଚଳକୁ ଯାଇ ମହିଳାମାନଙ୍କଠାରୁ ଋଣ ବାବଦ ଅର୍ଥ ଆଦାୟ କରି ଫେରୁଥିବାବେଳେ ତାଙ୍କୁ ରାଇଡ଼ିହା -ସାହାରପଡା ରାସ୍ତାର ଚଢେଇଘୁଳ ଶାଳ ଜଙ୍ଗଲ ନିକଟରେ ୪ଦୁର୍ବୃତ୍ତ ୨ଟି ବାଇକରେ ଆସି ଖଣ୍ଡା ଦେଖାଇ ୧ଲକ୍ଷ ୫୦ହଜାର୧୯୩ଟଙ୍କା ଲୁଟିନେଇଥିବା ସେ କମ୍ପାନୀର ଶାଖା ପରିଚାଳକ ରଞ୍ଜନକୁମାର ସାହୁଙ୍କୁ ଜଣାଇଥିଲେ। ପରେ ଏନେଇ ରଞ୍ଜନ ଗୁରୁବାର ପାଟଣା ଥାନାରେ ଲିଖିତ ଅଭିଯୋଗ କରିଥିଲେ। ଥାନ ଅଧିକାରୀ ସାରାଣୀ ଜେନା ଘଟଣାର ତଦନ୍ତ କରିବା ବେଳେ ପ୍ରକୃତରେ ଅଜୟଙ୍କଠାରୁ ଟଙ୍କା ଲୁଟ୍ ହୋଇନାହିଁ ବରଂ ସେ ନିଜେ କମ୍ପାନୀର ଟଙ୍କା ଆତ୍ମସାତ କରିବା ଉଦ୍ଦେଶ୍ୟରେ ବାଟରେ ଟଙ୍କା ଲୁଟ୍ ବାହାନା କରିଥିବା ଜଣାପଡିଥିଲା। ଶେଷରେ ସେ ଆନନ୍ଦପୁର ଥାନା ମୁଗୁପୁର ଗ୍ରାମ ନୀଳାପୁର ସାହିରେ ତାଙ୍କ ଭିଣୋଇଙ୍କ ଘରେ ଏହି ଟଙ୍କା ଲୁଚାଇ ରଖିଥିବା ଜଣାପଡିବାରୁ ପାଟଣା ଥାନାଧିକାରୀ ସନ୍ଧ୍ୟାରାଣୀଙ୍କ ନେତୃତ୍ୱରେ ସାହାରପଡା ଫାଣ୍ଡି ଅଧିକାରୀ ମୋନହର ମହାନ୍ତ ଓ କନଷ୍ଟେବଳ ଲକ୍ଷ୍ମୀପ୍ରିୟା ବଳ ପ୍ରମୁଖ ନୀଳାପୁର ସାହିରେ ସୁଦର୍ଶନ ସାହୁଙ୍କ ଘରେ ଚଢ଼ାଉକରି ସମସ୍ତ ଟଙ୍କା ଜବତ କରିଥିଲେ। ଥାନାରେ ପ୍ରଦତ୍ତ ଏତଲାରେ ଦର୍ଶାଯାଥଥିବା ଅର୍ଥଠାରୁ ଅଧିକ ଟଙ୍କା ଜବତ ହୋଇଥିବା ଜଣାପଡିଛି। ଏନେଇ ଭାରତୀୟ ପିଙ୍ଗଳ କୋଡ ୪୦୮, ୪୨୦ ଓ ୨୦୧ ଧାରା ଅନୁଯାୟୀ ପାଟଣା ଥାନାରେ ଏକ ମାମଲା (ନଂ. ୧୪୭/୧୯) ରୁଜୁ କରି ପୋଲିସ ଅଭିଯୁକ୍ତ ଅଜୟଙ୍କୁ ଗିରଫ କରି କୋର୍ଟଚାଲାଣ କରିଥିବା କହିଛି। ତାଙ୍କ ଘର ଭଦ୍ରକ ଜିଲା ବନ୍ତ ଥାନା ଅପଣ୍ଡା ଗ୍ରାମରେ ବୋଲି ପୋଲିସ କହିଛି।
