ଭଦ୍ରକ ଅଫିସ, ୧୩।୧୦- ଭଦ୍ରକ ଜିଲାରେ ଚୋରା କାଠ ବେପାରୀଙ୍କ ପ୍ରାଦୁର୍ଭାବ ଦିନକୁ ଦିନ ବଢ଼ିବାରେ ଲାଗିଛି। ଜିଲାର ବିଭିନ୍ନ ଅଞ୍ଚଳରେ ବେଆଇନ କାଠ ମିଲ୍ ଓ ଡିପୋ ଅବାଧରେ ଚାଲିଥିବା ବେଳେ ବନ ବିଭାଗ ବେପାରୀଙ୍କୁ କାବୁ କରିପାରୁ ନ ଥିବା ଅଭିଯୋଗ ହେଉଛି। ବନ ବିଭାଗର କେତେକ ଅସାଧୁ ଅଧିକାରୀଙ୍କ ସହ କାଠ ବେପାରୀଙ୍କ ମଧୁଚନ୍ଦ୍ରିକା ଯୋଗୁ ଗଛ ସଂଖ୍ୟା କମିବାରେ ଲାଗିଛି। କାଠ ମିଲ୍ ଓ ଡିପୋଗୁଡ଼ିକ ଦୃଷ୍ଟି ଆଢୁଆଳରେ ରହିଛି। ଭଦ୍ରକ ସହରରେ ବେଆଇନ କାଠ ମିଲ୍ ଦିନରାତି କାର୍ଯ୍ୟ କରୁଛି। ସହରର ଠାଏ ଠାଏ ବେଆଇନ କାଠ ଡିପୋ ସତେ ଯେପରି କୁଟୀରଶିଳ୍ପ ପାଲଟିଛି ବୋଲି କୁହାଯାଉଛି। ହେଲେ ଏ ସମ୍ପର୍କରେ ବନ ବିଭାଗ ପାଖରେ କୌଣସି ଖବର ନ ଥିବା ନେଇ ସ୍ଥାନୀୟ ବୁଦ୍ଧିଜୀବୀ ମହଲରେ ଅସନ୍ତୋଷ ପ୍ରକାଶ ପାଇଛି।
କରତ କଳ ଉପରେ ସରକାରୀ ସ୍ତରରେ କଟକଣା ରହିଥିଲେ ମଧ୍ୟ ଜିଲା ପ୍ରଶାସନ ଓ ପୋଲିସ ମୁଖ୍ୟାଳୟ ଆଗ ଦେଇ ଦୈନିକ ବେଆଇନ ଭାବେ କାଠ ଚାଲାଣ ସାଙ୍ଗକୁ କାଠ କଟାଯାଇ ଜିଲା ବାହାରକୁ ପଠାଯାଉଛି। ବନ ବିଭାଗର ଛତ୍ରଛାୟା ତଳେ ରହିଛନ୍ତି କାଠ ବେପାରୀ ଓ ବେଆଇନ କାଠ ଡିପୋ। ସହରରେ ଶତାଧିକ କାଠ ଡିପୋ ଓ ୧୦ରୁ ଊର୍ଦ୍ଧ୍ୱ କରତକଳ ଚାଲୁଥିବା ବେଳେ ପୋଲିସ କିମ୍ବା ବନ ବିଭାଗ ଚଢ଼ାଉ ନ କରିବା କାଠ ବେପାରୀଙ୍କ ସହ ସଲାସୁତରାକୁ ପଦାରେ ପକାଉଥିବା ଚର୍ଚ୍ଚା ହେଉଛି। କାଠ ଡିପୋଗୁଡ଼ିକ ଦୈନିକ ଲକ୍ଷାଧିକ ଟଙ୍କାର ବ୍ୟବସାୟ କରିଆସୁଥିବା, ବେଆଇନ କାଠ ମିଲ୍ଗୁଡ଼ିକ କାହା ଇଙ୍ଗିତରେ କାର୍ଯ୍ୟ କରୁଛି ସେ ନେଇ ତଦନ୍ତ କରାଯାଉ ବୋଲି ଦାବି ହେଉଛି। ଉଲ୍ଲେଖନୀୟ ଯେ, ଯେଉଁ ମିଲ୍ରେ ଥରେ ଚଢ଼ାଉ ହେଉଛି ତାହାର ୬ ମାସ ପରେ ପୁଣି ପୂର୍ବଭଳି ଚାଲୁଛି। ସେହିପରି ଦୈନିକ ଜିଲା ବାହାରୁ ୨୦ରୁ ଊର୍ଦ୍ଧ୍ୱ ଟ୍ରିପ୍ କାଠ ସହରରେ ଥିବା ବିଭିନ୍ନ ମିଲ୍କୁ ବେଆଇନ ଭାବେ ଆସୁଛି ଓ ସାଇଜ କାଠ କଟାଯାଇ ନିଆଯାଉଛି। ଏ ସମ୍ପର୍କରେ ଭଦ୍ରକ ବନାଞ୍ଚଳ ଅଧିକାରୀ ରଞ୍ଜିତ ମହାନ୍ତିଙ୍କୁ ପଚାରିବାରୁ ପ୍ରଶାସନ, ପୋଲିସ ଓ ବନ ବିଭାଗର ସମନ୍ବୟ ରହିଲେ ଚୋରା କରତକଳ ଓ କାଠ ଡିପୋଗୁଡ଼ିକୁ ସିଲ୍ କରାଯାଇପାରିବ ବୋଲି କହିଛନ୍ତି।
