ନୂଆଦିଲ୍ଲୀ, ୩୧।୫: ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନୀଙ୍କୁ ଶ୍ରେୟ ଦେଇଛନ୍ତି କ୍ରିକେଟ ସୁପରଷ୍ଟାର ବିରାଟ କୋହଲି। ଭାରତୀୟ ଦଳର ଅଧିନାୟକ ହେବା ପଛରେ ଧୋନୀଙ୍କ ଭୂମିକା ଗୁରୁତ୍ୱପୂର୍ଣ୍ଣ ଥିଲା ବୋଲି କୋହଲି କହିଛନ୍ତି। ଦଳରେ ସ୍ଥାନ ପକ୍କା କରିବା ପରେ ଧୋନୀଙ୍କୁ ବିଭିନ୍ନ ରଣନୀତି ଓ ଯୋଜନା ସମ୍ପର୍କରେ ପ୍ରଶ୍ନ ପଚାରିଥାଏ। ବୋଧ ହୁଏ ଏହି କାରଣରୁ ତାଙ୍କ ଉତ୍ତରାଧିକାରୀ ହେବା ପାଇଁ ଧୋନୀଙ୍କ ବିଶ୍ୱାସ ହାସଲ କରିଥିଲି। ସବୁବେଳେ ଦାୟିତ୍ୱ ନେବା ପାଇଁ ଉତ୍ସୁକ ଥିଲି ବୋଲି ଏକ ଇନ୍ଷ୍ଟାଗ୍ରାମ୍ରେ ଲାଇଭ୍ ଚାଟ୍ରେ ଅଂଶଗ୍ରହଣ କରି କୋହଲି ଅଶ୍ୱିନଙ୍କୁ କହିଛନ୍ତି। ପଦାର୍ପଣ କରିବା ପରେ ଦଳର ନିୟମିତ ସଦସ୍ୟ ହେବାକୁ ପ୍ରୟାସ କରିଥିଲି। ଏହାପରେ ଧୋନୀଙ୍କ ସହିତ ସବୁବେଳେ ଆଲୋଚନା କରିଆସୁଥିଲି। ଫଳରେ ମୋ ଉପରେ ତାଙ୍କ ବିଶ୍ୱାସ ଓ ଭରସା ବଢିଥିଲା। ତାଙ୍କ ନେତୃତ୍ୱ ନେବାର ପ୍ରକ୍ରିୟା ଓ କଳା କୌଶଳଙ୍କୁ ମଧ୍ୟ ଦୀର୍ଘ ସମୟଧରି ନିରୀକ୍ଷଣ କରିଆସୁଥିଲି। ଜଣେ ଅଧିନାୟକଙ୍କଠାରୁ ରାତାରାତି ଦାୟିତ୍ୱ ନିଆଯାଇ ନ ଥାଏ। ସମସ୍ତଙ୍କ ବିଶ୍ୱାସଭାଜନ ହେବା ସହ ନେତୃତ୍ୱ ନେବାକୁ ନିଜର ସାମର୍ଥ୍ୟକୁ ମଧ୍ୟ ପ୍ରମାଣ କରିବାକୁ ହୋଇଥାଏ ବୋଲି ସେ ମୋତେ କହିଥିଲେ। ତେଣୁ ମୋତେ ଅଧିନାୟକ ଦାୟିତ୍ୱ ମିଳିବାରେ ତାଙ୍କର ପ୍ରଚ୍ଛନ୍ନ ଭୂମିକା ରହିଛି ବୋଲି କୋହଲି କହିଛନ୍ତି।
