ବାଲେଶ୍ୱର ଅଫିସ, ୧୯।୪-ଲକ୍ଡାଉନ ଯୋଗୁ ଦୈନନ୍ଦିନ ରୋଜଗାର କରି ଜୀବିକା ନିର୍ବାହ କରୁଥିବା ବ୍ୟକ୍ତିମାନେ ବିଶେଷ ଭାବେ ପ୍ରଭାବିତ ହୋଇଛନ୍ତି। ବାଲେଶ୍ୱର ସହରର ବିଭିନ୍ନ ଛକ ସ୍ଥାନରେ ରହି ଦୈନନ୍ଦିନ ଯାତ୍ରୀ ପରିବହନ କରି ପରିବାର ପ୍ରତିପୋଷଣ କରୁଥିବା ୬୦୦ ଅଟୋ ଚାଳକଙ୍କୁ ବିଭିନ୍ନ ସଂଘ ମାଧ୍ୟମରେ ସହାୟତାର ହାତ ବଢ଼ାଇଛନ୍ତି ବାଲେଶ୍ୱରର ପୂର୍ବତନ ଏମ୍ପି ଇଂ. ରବୀନ୍ଦ୍ର କୁମାର ଜେନା। ଶନିବାର ସେମାନଙ୍କ ପାଇଁ ଅତ୍ୟାବଶ୍ୟକ ଖାଦ୍ୟ ସାମଗ୍ରୀ ବଣ୍ଟନ ବ୍ୟବସ୍ଥା କରାଯାଇଛି। ସହରର ଅର୍ଦ୍ଧାଧିକ ଲୋକ ଦୈନନ୍ଦିନ ଗୁଜୁରାଣ ମେଣ୍ଟାଇବା ପାଇଁ ସକାଳଠାରୁ ସନ୍ଧ୍ୟା ଯାଏ ବିଭିନ୍ନ କ୍ଷେତ୍ରରେ କାର୍ଯ୍ୟ କରୁଥିଲେ। ଏବେ କଟକଣା ଚାଲିଥିବାରୁ ସେମାନଙ୍କର ସବୁ ରୋଜଗାର ପନ୍ଥା ବନ୍ଦ ହୋଇଯାଇଛି। ଫଳରେ ସେମାନଙ୍କର ଆର୍ଥିକ ଅବସ୍ଥା ସଙ୍ଗୀନ ହୋଇପଡ଼ିଛି। ସେମାନଙ୍କୁ ଏହି କିଞ୍ଚତ୍ତ ସହାୟତା ନିଶ୍ଚିତ ଭାବେ ମୁହଁରେ ହସ ଫୁଟାଇବ ବୋଲି ଜେନା କହିଛନ୍ତି।
