ଜାମଟିକ୍ରା, ୧୮।୧୨ (ଡି.ଏନ୍.ଏ.)-ବରଗଡ଼ ଜିଲା ଅତାବିରା ବ୍ଲକ ବୁଗବୁଗା ପଁଚେତ୍ ଖଲିଆପାଲି ଗଁାର ନିରଞ୍ଜନ ପାଣ୍ଡେ ଆର ଚନ୍ଦ୍ରକାନ୍ତିକଁର ବଡ଼ ପୁଓ ସଞ୍ଜୀବ ପାଣ୍ଡେ(୨୧)। ସେ ଅନେକ ବଛର ହେଲା କେହେନ୍ସି ଗୁଟେ ଅଜନା ରୋଗ୍ରେ ପୀଡ଼ିତ ଅଛନ୍। ଗରିବ୍ ମା’ବାପ୍ ଯାହା ପାରଲେ ଚିକିଛା କରି ସରବ୍ସୁଅଁାତ ହେଇଛନ୍। ଏହେଦେ ଟଁକା ପଏସା ଅଭାବୁ ମା’ବାପ୍ ପୁଓର ଉଚ ଚିକିଛା କରେଇ ନାଇଁପାରି କରି ଭଗବାନ ଭରସାରେ ରହିଛନ୍।
ସୂଚନା ଅନ୍ସାରେ ସଞ୍ଜୀବ ୮ମ ଶ୍ରେଣୀରେ ପଢ଼ଲାବେଲେ କେହେନ୍ସି ଗୁଟେ ଅଜନା ରୋଗ୍ରେ ପଡ୍ଲେ। ରୋଗ୍ ପରଭାବରେ ସେ ଚାଲବୁଲ କରି ନାଇଁପାରଲେ। ମା’ବାପ୍ ତାହାକୁ ପହେଲା ଅତାବିରା ଆର ପଛେ ବୁର୍ଲା ବଡ଼ ଡାକ୍ତରଖାନାକେ ନେଇ ଚିକିଛା କରାଲେ। ହେଲେ କିଛି ଲାଭ୍ ନାଇଁ ହେଲା। ଦିନୁ ଦିନ୍କେ ରୋଗ୍ ବଢ଼ତେଲ ଗଲା। ଏନ୍ତାଥି ସଞ୍ଜୀବ ଆଏଜ୍କେ ୩ ବଛର ହେଲା ମୂଲୁ ଚାଲବୁଲ କରି ନାଇଁପାରବାର, ଖଟେ ପଡ଼ି ରହିଛନ୍। କଥାବାରତା ବି କରି ନାଇଁପାରବାର। ଖଟେ ଗଧାମଖା, ଖିଆପିଆ, ଝାଡ଼ାଝପଟ କରୁଛନ୍। ମା’ ଚନ୍ଦ୍ରକାନ୍ତି ପୁଓର ସବୁ ସେବାଯତନ କରୁଛନ୍। ଇଆଡ଼େ ସଞ୍ଜୀବର ବାପା ନିରଞ୍ଜନ ସଖାଲ ପାଏଲେ ଦୁଖ୍ସୁଖ କଲେ ଯାଇ ଘରର ଚୁଲି ଜଲୁଛେ। ଏନ୍ତା ଅଭାବିଆ ପରିସ୍ଥିତିରେ ଗରିବ୍ ମା’ବାପ୍ ପୁଓର ଉଚ ଚିକିଛା କରେଇ ନାଇଁ ପାରିକରି ଦୁଖେ ଭାଂଗି ପଡ଼ିଛନ୍। ସରକାରୀ ସାହାଯ୍ ହିସାବେ ସଞ୍ଜୀବକେ ମାସିକ ୫ କେ.ଜି. ଚାଉଲ ଆର ଭତା ଟଁକା ମିଲୁଛେ। ହେଲେ ଆଏଜ୍ତକ ସଞ୍ଜୀବକେ ତିନ୍ଚକିଆ ସାଇକେଲ କି ଆବାସ ଯୋଜନାରେ ତାକର ପରିବାରକେ ଘରଖଁଡ଼େ ନାଇଁ ମିଲିପାରି। ଇଆଡ଼େ ସଞ୍ଜୀବର ବାପା ଗଲା ବଛର ଗୁଟେ ଦେଉଲରେ ରଂଗ ଦେଲାବେଲେ ହିଟିପଡଲାରୁ ଗୋଡ଼ ଭାଂଗି ଯାଇଥିଲା। ତାକର ବି ଅପରେଶନ କରି ଗୁଡ଼େ ଲୁହାରଡ୍ ଲଗାହେଇଛେ। ହେଲେ ଟଁକା ପଏସା ଅଭାବୁ ସେ ବି ଗୁଡେ ଲାଗିଥିବାର ଲୁହାରଡ୍ ଖୁଲେଇ ନାଇଁପାରବାର। ଏନ୍ତାଥି ଗରିବ୍ ଦମ୍ପତି ଗଣମାଧ୍ୟମ ଜରିଆରେ ମୁଖ୍ୟମନ୍ତ୍ରୀ ଆର ଜିଲା ପରଶାସନକେ ବାପ୍ପୁଓର ଚିକିଛା ସାହାଯ୍ ସଂଗେ ପରିବାରକେ ସରକାରୀ ସୁବିଧା ସୁଯୋଗ ଯୁଗେଇ ଦେବାକେ ଗୁହାରି କରିଛନ୍।
