ବର୍ତ୍ତମାନ ବିଭିନ୍ନ ପ୍ୟାକେଜ୍ଡ ଫୁଡ୍ ଯେମିତି ଅଧିକାଂଶଙ୍କ ଦୈନନ୍ଦିନ ଖାଦ୍ୟ ତାଲିକାରେ ସାମିଲ ହୋଇଗଲାଣି। ବିଶେଷକରି ପିଲାମାନେ ଏବଂ ଯୁବପିଢ଼ି ଏଭଳି ଖାଦ୍ୟ ପ୍ରତି ଅଧିକ ଆଗ୍ରହୀ ହେଉଥିବା ଦେଖିବାକୁ ମିଳୁଛି। ହେଲେ ପାଟିକୁ ସ୍ବାଦିଷ୍ଟ ଲାଗୁଥିବା ଏହି ଖାଦ୍ୟଗୁଡ଼ିକ ସ୍ବାସ୍ଥ୍ୟ ପ୍ରତି ହାନିକାରକ …
ପ୍ୟାକେଟ୍ରେ ଦୀର୍ଘ ଦିନ ପର୍ଯ୍ୟନ୍ତ ନଷ୍ଟ ନ ହେବା ପାଇଁ ଅଧିକ ଲୁଣ, ତେଲ, ରଙ୍ଗ ଏବଂ ପ୍ରିଜର୍ଭେଟିଭ୍ ବ୍ୟବହାର କରାଯାଇଥାଏ, ଯାହାକି ସ୍ବାସ୍ଥ୍ୟ ପ୍ରତି ଆଦୌ ହିତକର ନୁହେଁ। ବିଶେଷକରି ଏଭଳି ଖାଦ୍ୟର ପ୍ରାକୃତିକ ଫ୍ଲେଭର ବଜାୟ ରଖିବା ଲାଗି ବ୍ୟବହାର ହେଉଥିବା ମନୋସୋଡିଅମ ଗ୍ଲୁକାମେଟ୍ ଅନେକଙ୍କଠାରେ ମାଇଗ୍ରେନ୍ ସମସ୍ୟା ସୃଷ୍ଟି କରୁଛି।
ଖାଦ୍ୟ ଅଧିକ ଖାଇବା ଦ୍ୱାରା ଶରୀରରେ ଅଧିକ ଚର୍ବି ଜମା ହୋଇଥାଏ। ଫଳରେ ଅଳ୍ପ ବୟସରୁ ମେଦବହୁଳତା ସମସ୍ୟା ଦେଖାଦେଇଥାଏ। ଧୀରେ ଧୀରେ ଧମନୀ ଭିତରେ ଚର୍ବି ଜମାହେବାରୁ ତାହା ସଙ୍କୁଚିତ ହୋଇ ରକ୍ତ ସଞ୍ଚାଳନରେ ବାଧା ସୃଷ୍ଟି କରେ। ଏମିତିକି ଏହା ଯୋଗୁ ହୃଦ୍ଘାତର ଆଶଙ୍କା ବୃଦ୍ଧି ପାଇଥାଏ।
ଏତିକି ନୁହେଁ; ଏସବୁ ଖାଦ୍ୟରେ ମିଶାଯାଉଥିବା ଆର୍ଟିଫିସିଆଲ୍ ସୁଗାର, ସୋଡିଅମ୍ ନାଇଟ୍ରେଟ୍, ମନୋସୋଡିଅମ ଗ୍ଲୁକାମେଟ୍ ବର୍ତ୍ତମାନ ଅନେକଙ୍କଠାରେ ସ୍କିନ୍ ଆଲର୍ଜି, କେଶ ଝଡ଼ିବା ବା ଚନ୍ଦାପଣ, ଡାଇବେଟିସ୍, ବ୍ଲଡ୍ପ୍ରେସର, ଲିଭର ସମସ୍ୟା, ପେଟ ସମସ୍ୟା, ମାନସିକ ଅନଗ୍ରସରତା ଏବଂ ସର୍ବୋପରି ହୃଦ୍ରୋଗ ସମସ୍ୟା ଉପୁଜାଉଥିବା ଦେଖିବାକୁ ମିଳୁଛି।
ଅନେକ ପ୍ୟାକେଜ୍ଡ ଫୁଡ୍ରେ ସ୍ବାଦ ବୃଦ୍ଧି ପାଇଁ ମିନେରାଲ୍ସ, ଫାଇବର ଏବଂ ଭିଟାମିନ୍ସର ପରିମାଣ କମ୍ ହୋଇ ସ୍ୟାଚୁରେଟେଡ ଫ୍ୟାଟ୍, କ୍ୟାଲୋରି, ସୋଡିଅମ୍ ଆଦି ମିଶାଯାଉଛି; ଯାହାକି ସ୍ବାସ୍ଥ୍ୟ ପ୍ରତି କ୍ଷତିକାରକ।
ଏକ ଗୁରୁତ୍ୱପୂର୍ଣ୍ଣ କଥା ହେଉଛି, ଏଭଳି କେତେକ ଖାଦ୍ୟରେ ଗ୍ଲୁକୋଜ୍ ବଦଳରେ ଫ୍ରୁକ୍ଟୋଜ୍ ବ୍ୟବହାର କରାଯାଉଛି। ଏହାକୁ ଖାଇବା ଦ୍ୱାରା ଶରୀରରେ ଆର୍ଟିଫିସିଆଲ୍ ସୁଗାର ଯାଇ ମଧ୍ୟ ବିଭିନ୍ନ ସମସ୍ୟା ସୃଷ୍ଟି କରିବାର ଆଶଙ୍କା ରହିଛି। ତେଣୁ ଯେଉଁ ଖାଦ୍ୟ ପ୍ୟାକେଟ୍ରେ ଇନ୍ଗ୍ରେଡିଏନ୍ସ ଲିଷ୍ଟରେ କର୍ନ ସିରପ୍, କର୍ନ ସିରପ୍ ସଲିଡ୍ସ, ହାଇ ଫ୍ରୁକ୍ଟୋଜ୍ କର୍ନ ସିରପ୍ ଆଦି ମଧ୍ୟରୁ କିଛି ଲେଖାଥାଏ, ତେବେ ତାହା ନ ଖାଇବା ଭଲ।
