କେନ୍ଦ୍ରାପଡ଼ା ଅଫିସ୍, ୩।୧୨: କେନ୍ଦ୍ରାପଡ଼ା ବ୍ଲକ ଗରାପୁର ଗ୍ରାମର ଦିବାକର ଗୋଚ୍ଛାୟତ ବେଙ୍ଗାଲୁର ସେଣ୍ଟ୍ରାଲ କଲେଜର ଜ୍ଞାନଜ୍ୟୋତି ଅଡିଟୋରିୟମ ହଲ୍ରେ ଇତିମଧ୍ୟରେ ଆୟୋଜିତ ଏସିଆ ପାସିଫିକ କାର୍ଯ୍ୟକ୍ରମର ସୁନ୍ଦର ସ୍ବାସ୍ଥ୍ୟ ପ୍ରତିଯୋଗିତାରେ ଭାରତରୁ ପ୍ରତିନିଧିତ୍ୱ କରି ପ୍ରଥମ ହୋଇଛନ୍ତି। ଏଥିସହିତ ପୁରୁଷ ବର୍ଗରେ ଫିଜିକ୍ ପ୍ରତିଯୋଗିତାରେ ତୃତୀୟ ସ୍ଥାନ ଅଧିକାର କରିଛନ୍ତି। ଏହି କୃତିତ୍ୱ ପାଇଁ ଜିଲା ଖେଳାଳି ଓ ବୁଦ୍ଧିଜୀବୀ ମହଲରେ ଦିବାକରଙ୍କୁ ପ୍ରଶଂସା କରାଯାଇଛି। ୱାର୍ଲଡ ଫିଟନେସ୍ ପକ୍ଷରୁ ଆୟୋଜିତ ପ୍ରତିଯୋଗିତାରେ ବିଶ୍ୱର ୪୮ଟି ଦେଶର ପ୍ରତିଯୋଗୀ ଥିଲେ। ଏଥିରେ ଦିବାକର ପ୍ରଥମ ହୋଇ ସ୍ବର୍ଣ୍ଣ ପଦକ ହାସଲ କରିଛନ୍ତି। ଗରାପୁର ଗ୍ରାମର ରଙ୍ଗଲତା ଗୋଚ୍ଛାୟତ ଓ ବାବାଜୀ ଗୋଚ୍ଛାୟତଙ୍କର କନିଷ୍ଠ ପୁତ୍ର ଦିବାକର ଏହି ଦୁଇଟି ପଦକ ସହ ଜାତୀୟସ୍ତରରେ ମୋଟ ପାଞ୍ଚଟି ପଦକ ହାସଲ କରିଛନ୍ତି। ଗତ ମେ‘ରେ କେରଳର କୋଚିଠାରେ ଆୟୋଜିତ ମିଷ୍ଟର ଇଣ୍ଡିଆ ପ୍ରତିଯୋଗିତାରେ ସେ ବ୍ରୋଞ୍ଜ ପଦକ ହାସଲ କରିଛନ୍ତି। ସେହିପରି ୨୦୧୭ରେ ଝାଡ଼ଖଣ୍ଡର ରାଞ୍ଚି ଓ ୨୦୧୮ରେ ମହାରାଷ୍ଟ୍ରର ପୁଣେଠାରେ ଆୟୋଜିତ ଶକ୍ତି ଉତ୍ତୋଳନ ପ୍ରତିଯୋଗିତାରେ ଦୁଇଟି ପଦକ ହାସଲ କରିଥିବା କଟକସ୍ଥିତ ଷ୍ଟାର୍କ ଜିମ୍ର କୋଚ୍ ସୁବ୍ରତ ସାହୁ ଓ ଅଭିଯୋଗ ମହାନ୍ତି ସୂଚନା ଦେଇଛନ୍ତି।
