ପର୍ଲା, ୨୯।୧ (ଡି.ଏନ୍.ଏ.)-ସିଏଏ ଆର ଏନ୍ଆରସିକେ ନେଇ ଏହେଦେ ଦେଶ୍ ଉଠୁଛେ ପଡ଼ୁଛେ। ଇଆଡ଼େ ଦେଶ୍ ସୁଆଧୀନ ହେବାର ୭୦ ବଛର ବିତିଯାଇଥିଲେ ବି ଲୋକ୍ ଜାଗାବାଡ଼ି ଅଭାବୁ ବାରବୁଲା ଜୀବନ୍ ବିତଉଛନ୍। ଆଏଜ୍ ବି ସେମାନେ କେନ୍ଦ୍ର ଆର ରାଏଜ୍ ସରକାରକଁର ଜନହିତକର ଯୋଜନାରୁ ବଁଚିତ୍। ବଛର ବଛର ହେଲା ସେମାନେ ନିଜର ଠିକାନା ଖୁଜୁଛନ୍। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ କଳାହାଣ୍ଡି ଜିଲା ଧର୍ମଗଡ଼ ବ୍ଲକ ପର୍ଲାରେ।
ସୂଚନା ଅନ୍ସାରେ ବଲାଙ୍ଗୀର ଜିଲା ମୁରିବାହାଲ ବ୍ଲକ ଅଂଚଲର ବାଞ୍ଛାନିଧି ନାଗ(୪୫)। ପରିବାର କହେଲେ ମାଏକିନା ଗୁଣମତୀ(୪୦), ୫ ଝି’ପୁଷ୍ପାଞ୍ଜଳି(୧୫), ପ୍ରଜ୍ଞାଞ୍ଜଳି(୧୧), ସନ୍ଧ୍ୟାଞ୍ଜଳି(୯), ସ୍ନେହମୟୀ(୬), ଜ୍ୟୋତ୍ସ୍ନାମୟୀ(୪) ଆର ପୁଓ ମହାବାହୁ(୨)କୁଁ ନେଇ ସଁସାର। ପରିବାରଟା ନିହାତି ଗରିବ୍ ଆର ବାରବୁଲା। ଆଏଜ୍କେ ୧୨ ବଛର ତଲେ ବାଞ୍ଛା ପର୍ଲା ଗଁାକେ ଆସି ଗୁଟେ ପଡ଼ିଆରେ କୁରିଆଟେ କରି କୁଟୁମ୍ବସିଆ ରହିଆସୁଛନ୍। ଆଗ୍ରୁ ଇ ଗଁାରୁ ସେ ଗଁା ପରିବାର ଧରି ବୁଲୁଥିଲେ। ବାଞ୍ଛା ଟିନ୍ରେ ଡବା, ମାନ, ଅଡ଼ା, ଚାଲ୍ନି ତିଆର କରି ବିକାଭଂଗା କରି ସେଥ୍ରେ ନିଜର କୁଟୁମ୍ ପୁଷୁଛନ୍। ଏହେଦେ ପର୍ଲାରେ ଝି’ ପ୍ରଜ୍ଞାଞ୍ଜଳି, ସନ୍ଧ୍ୟାଞ୍ଜଳି, ସ୍ନେହମୟୀ ସରକାରୀ ସ୍କୁଲରେ ପଢ଼ୁଥିଲାବେଲେ ଝି’ ଜ୍ୟୋତ୍ସ୍ନାମୟୀ ଆର ପୁଓ ମହାବାହୁ ଅଙ୍ଗଓ୍ବାଡିରେ ପଢ଼ୁଛନ୍। ସେନ୍ତା ବଡ଼ ଝି’ ପୁଷ୍ପାଞ୍ଜଳି ଆର ମାଏକିନା ଗୁଣମତି କୁଲିମଜୁରି କରବାର ସଂଗେ ବାଞ୍ଛାକୁଁ କଉଲିକ୍ ବୁରତିରେ ସାହାଯ୍ କରୁଛନ୍। ପରିବାରର ଜମିବାଡ଼ି, ଘରଡ଼ିହ ବଲି କିଛି ନଁାଇଁନ। ଏନ୍ତାଥି ଥାଇ ଠିକାନା ଆଶ୍ରେ ବାଞ୍ଛା ଘରଡ଼ିହ ଖଁଡ଼େ ପାଏବାର ଲାଗି ରାଜସ୍ବ ନିରୀକ୍ଷକଁର ଜରିଆରେ ଧର୍ମଗଡ଼ ତହସିଲଦାରକୁଁ ଆବେଦନ କରିଥିବାର କହିଛନ୍। ସେନ୍ତା ବାଞ୍ଛାକଁର ପରିବାର ଏହେଦେ ପର୍ଲାରେ ଅନେକ ସରକାରୀ ସୁବିଧା ସୁଯୋଗ ବି ପାଇସାରିଛନ୍। ପରିବାରର ସମକର ଆଧାରକର୍ଡ, ଭୋଟ ପରିଚଏପତର, ବ୍ୟାଙ୍କ ପାସବହି ଥିଲାବେଲେ ବାଞ୍ଛା ଭୂମିହୀନ ହିସାବେ କାଳିଆ ଯୋଜନାରେ ୧୦ ହଜାର ଟଁକା ପାଇଥିବାର ଜନାଯାଇଛେ। ଏନ୍ତା କି ପରିବାରରଟା ପଁଚେତ୍, ବିଧାନସଭା, ଲୋକ୍ସଭା ନିରବାଚନ ବେଲେ ଭୋଟ୍ ବି ଦେଉଛନ୍। ହେଲେ ସରକାରୀ ଯୋଜନାରେ ଡିହ ଆର ଘରଖଁଡ଼େ ମିଲ୍ଲେ ଆମର ଥାଇ ଠିକାନା ସଂଗେ କୁଟୁମ୍ଟା ବଁଚିପାରତୁଁ ବଲି ବାଞ୍ଛା କହିଛନ୍। ଇ ବାବ୍ଦେ ପର୍ଲା ରାଜସ୍ବ ନିରୀକ୍ଷକ ରତିନ୍ଦ୍ର ନିଆଲକୁଁ ପଚ୍ରାଲାରୁ ନିହାତି ଭାବେ ତାହାକୁ ଘରଡିହ ଯୁଗେଇ ଦିଆଯିବା ବଲି ସେ କହିଛନ୍। ସେନ୍ତା ଇ ବାବ୍ଦେ ଧର୍ମଗଡ଼ ବିଡିଓ ଗୋପାଳକୃଷ୍ଣ ମିଶ୍ରକୁଁ ପଚ୍ରାଲାରୁ ନିହାତି ଭାବେ ତାହାକୁ ଆବାସ ଯୋଜନାରେ ସାମିଲ କରି ଘର ଯୁଗେଇ ଦିଆଯିବା ବଲି କହିଛନ୍। ଇ ବାବ୍ଦେ ଧର୍ମଗଡ଼ ତହସିଲଦାର ଚିନ୍ମୟ କୁମାର ନାୟକକୁଁ ପଚ୍ରାଲାରୁ ସରକାରୀ ଯୋଜନାରେ ବାଞ୍ଛାକୁଁ ଘରଡ଼ିହ ଯୁଗେଇ ଦେବାର ବେବସ୍ତା କରାଯିବା ବଲି ସେ କହିଛନ୍।
