ବରଗଡ଼ ଅଫିସ୍,୨୯।୩-ମାଲ୍ ପରିବହନ କାମ ପାଇଁ ବରଗଡ଼ ସହର ଉପକଣ୍ଠ ସିମେଣ୍ଟ କାରଖାନାକୁ ଆସିଥିବା ବାହ୍ୟ ରାଜ୍ୟର କେତେକ ଟ୍ରକ୍ ଚାଳକ ହଇରାଣ ହୋଇଛନ୍ତି। ଲକ୍ ଡାଉନ୍ ପରେ ନୂଆ ସାଇକେଲ କିଣି ସେଥିରେ ନିଜ ଗ୍ରାମକୁ ଫେରଛନ୍ତି। କାରଖାନା କର୍ତ୍ତୃପକ୍ଷଙ୍କଠାରୁ ଆରମ୍ଭ କରି ବିଭାଗୀୟ ଅଧିକାରୀଙ୍କୁ ସେମାନଙ୍କ ସମସ୍ୟା ସମ୍ପର୍କରେ ଅବଗତ କରିବା ସତ୍ତ୍ବେ କିଛି ସୁଫଳ ନ ମିଳିବାରୁ ଏଭଳି ପଦକ୍ଷେପ ନେଇଥିବା କହିଛନ୍ତି।
ଉତ୍ତରପ୍ରଦେଶ ସମେତ ବିଭିନ୍ନ ରାଜ୍ୟର ଟ୍ରକ୍ ଡ୍ରାଇଭରମାନେ ଟ୍ରକ୍ ଧରି ସିମେଣ୍ଟ ପରିବହନ ପାଇଁ ଏହି କାରଖାନାରେ ନିୟୋଜିତ ଥିଲେ । ଲକ୍ ଡାଉନ ପରେ କାରଖାନା ପାଖରେ ରହିଥିବା ରୋଷେଇ ଘରେ ରନ୍ଧାବଢ଼ା କରୁଥିଲେ। ତାହା ଖାଇ ଟ୍ରକ୍ ତଳେ ଜୀବନ ଅତିବାହିତ କରୁଥିଲେ । ମାତ୍ର କାରଖାନା କର୍ତ୍ତୃପକ୍ଷ ସେହି ରୋଷେଇ ଘର ସମେତ ସେଠାରେ ରହିଥିବା ପାଇଖାନା, ଗାଧୁଆଘର ଆଦିରେ ତାଲା ପକାଇ ଦେଇଥିଲେ । ଫଳରେ ପାଣି ଟିକିଏ ମଧ୍ୟ ସେମାନଙ୍କୁ ମିଳି ପାରି ନ ଥିଲା । ଏ ନେଇ ସେମାନେ କାରଖାନା କର୍ତ୍ତୃପକ୍ଷଙ୍କ ସମେତ ଟ୍ରକ୍ ମାଲିକଙ୍କୁ ବାରମ୍ବାର ଅବଗତ କରାଇଥିଲେ । ତଥାପି କିଛି ସୁଫଳ ମିଳି ନଥିଲା । ଫଳରେ ଏକ ସାଇକେଲ ଷ୍ଟୋରରୁ ୬ଟି ନୂଆ ସାଇକେଲ କିଣି ସେଥିରେ ନିଜ ସାମଗ୍ରୀ ବୋଝେଇ କରି ସେମାନେ ନିଜ ଘର ଅଭିମୁଖେ ଫେରିଛନ୍ତି।
