ନୂଆଦିଲ୍ଲୀ,୩।୫: ଲକ୍ଡାଉନ ଯୋଗୁ ସାରା ଦେଶରେ ଫସି ରହିଥିବା ଶ୍ରମିକ, ଶିକ୍ଷାର୍ଥୀ, ଶ୍ରଦ୍ଧାଳୁ ଆଦିଙ୍କୁ ନିଜ ନିଜ ରାଜ୍ୟରେ ପହଞ୍ଚାଇବା ପାଇଁ ଶ୍ରମିକ ସ୍ପେଶାଲ ଟ୍ରେନ୍ ଚଳାଚଳ ଆରମ୍ଭ କରିଛି। ଏହାକୁ ନେଇ ଭିନ୍ନ ଭିନ୍ନ କଥା ଶୁଣିବାକୁ ମିଳିଥିବା ବେଳେ ରେଳ ମନ୍ତ୍ରଣାଳୟ ପକ୍ଷରୁ ଗାଇଡଲାଇନ୍ସ ଜାରି କରାଯାଇଛି। ଶ୍ରମିକ ସ୍ପେଶାଲ ଟ୍ରେନ୍କୁ ଚଳାଇବା ପାଇଁ ନିର୍ଦ୍ଦିଷ୍ଟ ଗନ୍ତବ୍ୟ ସ୍ଥଳରୁ ରାଜ୍ୟ ପକ୍ଷରୁ ଦିଆଯାଇଥିବା ଶ୍ରମିକଙ୍କ ସଂଖ୍ୟାକୁ ଦେଖି ଟ୍ରେନ୍ ଟିକେଟ ଛପାଯିବ। ରାଜ୍ୟ ସରକାରଙ୍କ ପକ୍ଷରୁ ସ୍ଥାନୀୟ ଅଧିକାରୀ ଯାତ୍ରୀଙ୍କୁ ଟିକେଟ ଦେଇ ଆଦାୟ କରିଥିବା ଅର୍ଥକୁ ରେଲଓ୍ବେକୁ ଦେବେ। ସୂଚନାଯୋଗ୍ୟ, ଏହି ଟ୍ରେନରେ କେବଳ ଲକ୍ଡାଉନରେ ଫସି ରହିଥିବା ଲୋକେ ଯାତ୍ରା କରିପାରିବେ। ସ୍ଥାନୀୟ ପ୍ରଶାସନ ଯାତ୍ରୀଙ୍କ ସମସ୍ତ ବିବରଣୀ ଦେବା ପରେ ସେମାନଙ୍କର ସ୍କ୍ରିନିଂ କରାଯାଇ ଟ୍ରେନ୍ରେ ଯାତ୍ରା କରିବାକୁ ଅନୁମତି ପ୍ରଦାନ କରାଯିବ ବୋଲି ଜଣାପଡିଛି।
