ଛତ୍ରପୁର,୧ା୧(ଡି.ଏନ୍.ଏ.)-ଗଞ୍ଜାମ ଜିଲା ଛତ୍ରପୁର ଏନ୍ଏସି କାର୍ଯ୍ୟାଳୟ ପରିସରରେ ମୋ ସରକାର ଅଭିଯୋଗ ଶୁଣାଣି ସେଲ୍ ମଙ୍ଗଳବାର ଉଦ୍ଘାଟିତ ହୋଇଯାଇଛି। ମଙ୍ଗଳବାର ଅପରାହ୍ନରେ ଛତ୍ରପୁର ଏନ୍ଏସିରେ ଅନୁଷ୍ଠିତ ଉକ୍ତ କାର୍ଯ୍ୟକ୍ରମରେ ଯୋଗଦେଇ ଗଞ୍ଜାମ ଜିଲପାଳ ବିଜୟ ଅମୃତା କୁଲାଙ୍ଗେ ସେଲ୍ର ଉଦ୍ଘାଟନ କରିଥିଲେ। ମୋ ସରକାର କାର୍ଯ୍ୟକ୍ରମରେ ୨୦୨୦ ଜାନୁୟାରୀ ପହିଲାରୁ ଏନ୍ଏସିରେ ଚାଲିଥିବା ବିଭିନ୍ନ କାର୍ଯ୍ୟ୍ୟକ୍ରମ ଓ ଯୋଜନାକୁ ସାମିଲ କରାଯିବ। ଏହି ପରିପ୍ରେକ୍ଷୀରେ ଏନ୍ଏସିରେ ଚାଲିଥିବା ବିଭିନ୍ନ କାର୍ଯ୍ୟକ୍ରମ ଓ ଯୋଜନାରେ ଥିବା ଅଭିଯୋଗ ଓ ସମସ୍ୟା ସମ୍ପର୍କରେ ଶୁଣାଣିକରି ସମାଧାନ କରିବା ଉପରେ ଗୁରୁତ୍ୱାରୋପ କରାଯାଇଛି। ରାଜ୍ୟ ଗୃହନିର୍ମାଣ ଓ ନଗର ଉନ୍ନୟନ ବିଭାଗ ପକ୍ଷରୁ ମୋ ସରକାର ପାଇଁ ସମସ୍ତଙ୍କ ଅଭିଯୋଗ ଓ ସମସ୍ୟା ଶୁଣାଣି ଆସିବ ତାହା ମୋ ସରକାର ଯୋଜନାରେ ସାମିଲ କରି ଏହାର ସମାଧାନ ହେଲାକି ନାହିଁ ତାହା ଉପରେ ମତାମତ ସଂଗ୍ରହ କରାଯିବ। ଏପରିକି ଏ ସମ୍ବନ୍ଧରେ ସେବା ମିଳିଲାକି ନାହିଁ, ଉକ୍ତ ବିଭାଗର କର୍ମଚାରୀ ଓ ଅଧିକାରୀ ଠିକ୍ ବ୍ୟବହାର କଲେ କି ନାହିଁ ସେ ସମ୍ପର୍କରେ ମତ ଗ୍ରହଣ କରିବା ନେଇ ମୋ ସରକାର କାର୍ଯ୍ୟକ୍ରମର ମୂଳଲକ୍ଷ୍ୟ ବୋଲି ଜିଲାପାଳ କହିଛନ୍ତି। ଯଦି କୌଣସି ନେଗେଟିଭ୍ ମତ ଆସିବ ତେବେ ଉକ୍ତ ଅଫିସ୍ର କର୍ମଚାରୀ ଓ ଅଧିକାରୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଜିଲାପାଳ ସତର୍କ କରାଇ ଦେଇଛନ୍ତି। ଯଦି ଏହା ପରେ ମଧ୍ୟ ସ୍ଥିତିରେ ପରିବର୍ତ୍ତନ ଆସିବନି ତେବେ ଆଇନ୍ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଏହି କାର୍ଯକ୍ରମରେ ଗଞ୍ଜାମ ଜିଲା ଗ୍ରାମ୍ୟ ଉନ୍ନୟନ ସଂସ୍ଥା ପ୍ରକଳ୍ପ ନିର୍ଦ୍ଦେଶକ ଇଂ. ସିଦ୍ଧାର୍ଥ ଶଙ୍କର ସ୍ବାଇଁ , ଜିଲା ଗ୍ରାମ୍ୟ ଉନ୍ନୟନ ସଂସ୍ଥା ପ୍ରକଳ୍ପ ନିର୍ଦ୍ଦେଶକ ସୁଦାମ ଚରଣ ମଣ୍ଡଳ, ଛତ୍ରପୁର ଏନ୍ଏସି ନିର୍ବାହୀ ଅଧିକାରୀ ଗିରିଜା ଶଙ୍କର ମଲ୍ଲୀକ ପ୍ରମୁଖ ଉପସ୍ଥିତ ଥିଲେ।
