ନୂଆଦିଲ୍ଲୀ, ୫।୫-
ଆସନ୍ତା ବର୍ଷ ପ୍ରାରମ୍ଭରେ ମହିଳା କ୍ରିକେଟ ବିଶ୍ୱକପ ଅନୁଷ୍ଠିତ ହେବ । ମାତ୍ର କୋଭିଡ୍-୧୯ ଯୋଗୁ ଏହି ମେଗା ଇଭେଣ୍ଟ ପାଇଁ କୌଣସି ଦଳ ପ୍ରସ୍ତୁତି ଆରମ୍ଭ କରିପାରି ନାହାନ୍ତି। ତେଣୁ ଆଗାମୀ ଟୁର୍ନାମେଣ୍ଟ ପାଇଁ କୌଣସି ଦଳ ଫେଭରାଇଟ ନୁହନ୍ତି, ପ୍ରତିଯୋଗିତା ସମସ୍ତଙ୍କ ପାଇଁ ଓପନ ରହିବ ବୋଲି ଅନୁଭବ କରୁଛନ୍ତି ଭାରତୀୟ ଦଳର ଅଧିନାୟିକା ମିଥାଲି ରାଜ। ”ଏବେ ଟ୍ରେନିଂ ବନ୍ଦ, ଜିମ୍କୁ ଯିବା ମଧ୍ୟ ମନା। ତେଣୁ ୨୦୨୧ ଆଇସିସି ମହିଳା ବିଶ୍ୱକପ ପାଇଁ କେହି ଫେଭରାଇଟ ବିବେଚିତ ହେବେନାହିଁ। ତେଣୁ ଭାରତ ପାଇଁ ମଧ୍ୟ ସୁଯୋଗ ରହିବ“ ବୋଲି ମିଥାଲି କହିଛନ୍ତି। ୨୦୧୭ ବିଶ୍ୱକପର ଫାଇନାଲରେ ଭାରତ ଦୁର୍ଭାଗ୍ୟଜନକଭାବେ ଇଂଲଣ୍ଡଠାରୁ ହାରିଯାଇଥିଲା। ଏଥର କିନ୍ତୁ ଦଳ ପୂର୍ବାପେକ୍ଷା ଶକ୍ତିଶାଳୀ। ”ଆମକୁ ଏବେ କୌଣସି ଦଳ ହାଲ୍କାଭାବେ ନେଇ ପାରିବେ ନାହିଁ। କ୍ରମାଗତଭାବେ ଆମେ ବିଶ୍ୱର ଶ୍ରେଷ୍ଠ ଦଳଗୁଡ଼ିକୁ ହରାଇ ଆସୁଥିବାରୁ ଖେଳାଳିଙ୍କ ଆତ୍ମବିଶ୍ୱାସ ବଢ଼ିଛି। ଆମେ ମଧ୍ୟ ଯେ କୌଣସି ଦଳକୁ ହରାଇ ପାରିବା ହୃଦ୍ବୋଧ ହୋଇଛି“ ବୋଲି ମିଥାଲି ପ୍ରକାଶ କରିଛନ୍ତି।
ଆୟୋଜକ ନ୍ୟୁଜିଲାଣ୍ଡ ସମେତ ଆଇସିସି ମହିଳା ଚାମ୍ପିୟନଶିପ୍ର ଶ୍ରେଷ୍ଠ ୪ ଦଳଭାବେ ଭାରତ ସ୍ବାଭାବିକଭାବେ ବିଶ୍ୱକପ ଯୋଗ୍ୟତା ହାସଲ କରିଛି। ଭାରତ ୨୦୦୫ ଓ ୨୦୧୭ରେ ଫାଇନାଲରେ ପ୍ରବେଶ କରିଥିଲେ ହେଁ ଟାଇଟଲ ହାସଲରୁ ବଞ୍ଚତ୍ତ ହୋଇଥିଲା। ନିଜ ନେତୃତ୍ୱରେ ଭାରତକୁ ବିଶ୍ୱକପ ଜିତାଇବାକୁ ଚାହାନ୍ତି ମିଥାଲି। ଟି୨୦ କ୍ରିକେଟରୁ ଅବସର ନେଇ ସେ କେବଳ ଏକଦିବସୀୟ କ୍ରିକେଟ ଉପରେ ଫୋକସ କରୁଛନ୍ତି। ଗୋଟିଏ ଫର୍ମାଟରେ ଖେଳୁଥିବାରୁ ଟୁର୍ନାମେଣ୍ଟ ପାଇଁ ଫିଟ୍ନେସ ବଜାୟ ରଖିବା କେତେ ଗୁରୁତ୍ୱପୂର୍ଣ୍ଣ ତାହା ସେ ଭଲଭାବେ ଜାଣନ୍ତି। ” ମୋ ବୟସରେ ଫିଟ୍ନେସ ବଜାୟ ରଖିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ତେବେ ନିଜ ଉପରେ ମୋ ଭରସା ରହିଛି । ଏବେ ମଧ୍ୟ ଅନେକ କିଛି କରିବାର ମନୋବଳ ମୋ ନିକଟରେ ଅଛି। ରିଦିମ ପାଇଁ ମୁଁ କିଛି ସେସନ ଅଭ୍ୟାସ ଆବଶ୍ୟକ କରୁଛି“ ବୋଲି ମିଥାଲି ପ୍ରକାଶ କରିଛନ୍ତି। ୨୦୧୭ ବିଶ୍ୱକପର ଫାଇନାଲରେ ଇଂଲଣ୍ଡ ୭ ଉଇକେଟ ହରାଇ ୨୨୮ରନ କରିଥିବାବେଳେ ଭାରତ ୪୮.୪ ଓଭରରେ ୨୧୯ ରନରେ ଅଲଆଉଟ ହୋଇ ମାତ୍ର ୯ ରନରେ ପରାଜିତ ହୋଇଥିଲା।
