ଚମ୍ପୁଆ, ୨୩ା୧(ଡି.ଏନ.ଏ)-ଚମ୍ପୁଆ ଏନଏସି ଅନ୍ତର୍ଗତ ୧୩ନଂ ୱାର୍ଡର ଚନ୍ଦ୍ରଶେଖରପୁର ନୁଆଗାଁଠାରେ ଦୀର୍ଘ ଦିନ ହେବ ଫାଇଲେରିଆ ରୋଗରେ ପିଡିତ ହୋଇ ଭିନ୍ନକ୍ଷମ ହୋଇଥିବା ଦୁବରାଜ ମୁଣ୍ଡାଙ୍କ ପାଖରେ ବୁଧବାର ଚମ୍ପୁଆ ଉପଜିଲାପାଳ ପ୍ରତାପ ପ୍ରିତିମୟ ପହଞ୍ଚିଥିବା ଜଣାଯାଇଛି। ଦୀର୍ଘ ଦିନରୁ ଏହି ଭିନ୍ନକ୍ଷମ ପାଇଁ ଗଣମାଧ୍ୟମରେ ପ୍ରକାଶ ପରେ ପ୍ରଶାସନ କେବଳ ଭତ୍ତା ଦେଇ ଏହାର ସମାଧାନ କରିଥିବା ବେଳେ ଉପଜିଲାପାଳ ତୁରନ୍ତ ରେଡକ୍ରସ ଫଣ୍ଡରୁ ଆର୍ଥତ୍କ ସହାୟତା ଦେବା ସହିତ ପ୍ରଧାନମନ୍ତ୍ରୀ ଆବାସ ଯୋଜନା ଯୋଗାଇ ଦେବାର ପ୍ରତିଶ୍ରୁତି ଦେଇଛନ୍ତି। ସୂଚନା ଅନୁସାରେ ଚନ୍ଦ୍ରଶେଖରପୁର ନୁଆଗାଁର ଦୁବରାଜ ମୁଣ୍ଡା ୨୦୦୦ ମସିହାରେ ମାଟ୍ରିକ ପରୀକ୍ଷା ଦେବା ପରେ ଡାହାଣ ଗୋଡଟି ଫୁଲିବାର ଦେଖା ଦେଇଥିଲା। ପ୍ରଥମେ ଏହା ଫାଇଲେରିଆ ଭାବି ଅଭାବ ଅନାଟନରେ ଚଳୁଥିବା ଦୁବରାଜର ପିତା ଜମାଦାର ମୁଣ୍ଡା ବିଭିନ୍ନ ଚିକିତ୍ସାଳୟକୁ ନେଇ ଚିକିତ୍ସା କରାଇଥିଲେ। ମାତ୍ର ଏଥିରେ ସୁଫଳ ମିଳିବା ପ୍ରତିବଦଳରେ ଦିନକୁ ଦିନ ଗୋଡର ଆକର ବଢିବାରେ ଦେଖାଦେଇଥିଲା। ଫଳରେ ଚଲାବୁଲା ବନ୍ଦ ହୋଇଯିବା ଯୋଗୁଁ ଦୁବରାଜ ଶଯ୍ୟାସାୟୀ ହୋଇଥିଲେ। ପରେ ଗଣମାଧ୍ୟମରେ ଏହା ପ୍ରକାଶ ପରେ ତତ୍କାଳୀନ ଉପଜିଲାପାଳ ସନ୍ତୋଷ କୁମାର ମିଶ୍ର ସହାୟତାର ହାତ ବଢାଇ ଚଳିବା ପାଇଁ ଖାଦ୍ୟ ସୁରକ୍ଷାରେ ସାମିଲ କରିବା ସହିତ ମାସିକ ଭିନ୍ନକ୍ଷମ ଭତ୍ତା ବ୍ୟବସ୍ଥା କରାଇଥିଲେ। ମାତ୍ର ଏହାର ଚିକିତ୍ସା ସୁବିଧା ହୋଇ ପାରୁ ନ ଥିବା ତଥା ରହିବା ପାଇଁ ଘର ଖଣ୍ଡିଏ ମିଳି ପାରୁ ନଥିଲା। ବୁଧବାର ଉପଜିଲାପାଳ ପ୍ରତାପ ପ୍ରିତିମୟ ଅପରାହ୍ନରେ ଦୁବରାଜଙ୍କ ଘରେ ପହଞ୍ଚି ଭଲମନ୍ଦ ପଚାରିବା ସହିତ ତତ୍କାଳ ସହାୟତା ପ୍ରଦାନ କରିବାକୁ ପ୍ରତିଶ୍ରୁତି ଦେଇଥିବା ଜଣାଯାଇଛି।
