ନୂଆଦିଲ୍ଲୀ,୧୧।୪: କରୋନା ସଂକ୍ରମଣ ନେଇ ଭାରତରେ ସଙ୍କଟ ସୃଷ୍ଟି ହୋଇଛି। ଦେଶର ୫ ରାଜ୍ୟରେ ଅଧିକ କରୋନା ସଂକ୍ରମିତ ରହିଛନ୍ତି। ସେସବୁ ରାଜ୍ୟଗୁଡ଼ିକ ହେଉଛନ୍ତି ମହାରାଷ୍ଟ୍ର, ଦିଲ୍ଲୀ, ତାମିଲନାଡୁ, ତେଲେଙ୍ଗାନା ଏବଂ ରାଜସ୍ଥାନ। ମହାରାଷ୍ଟ୍ରରେ ଏପ୍ରିଲ୍ ୧୦ ସୁଦ୍ଧା ସଂକ୍ରମିତଙ୍କ ସଂଖ୍ୟା ୧୩୬୪ ଥିବାବେଳେ ଦିଲ୍ଲୀରେ ଏହା ୮୯୮ ରହିଥିଲା। ସେହିପରି ତାମିଲନାଡୁରେ ୮୩୪ ଥିବାବେଳେ ତେଲେଙ୍ଗାନାରେ ୪୭୩ ଏବଂ ରାଜସ୍ଥାନରେ ୪୬୩ ରହିଥିଲା। ପୃଥିବୀର କେତେକ ଦେଶର ଜନସଂଖ୍ୟା ସହିତ ଏସବୁ ସହରର ସାମ୍ୟତା ରହିଛି। କିନ୍ତୁ ଭାରତର ଏସବୁ ସହରରେ ସ୍ଥିତି ଭଲ ଥିବା ଏକ ରିପୋର୍ଟରେ ପ୍ରକାଶ ପାଇଛି। ଦିଲ୍ଲୀର ଜନସଂଖ୍ୟା କାଜାକସ୍ତାନ ଜନ ସଂଖ୍ୟା ସହିତ ପ୍ରାୟ ସମାନ। ଦିଲ୍ଲୀର ଜନସଂଖ୍ୟା କୋଟିଏ ୮୪ ଲକ୍ଷ ଥିବାବେଳେ କାଜାକସ୍ତାନର ଜନସଂଖ୍ୟା କୋଟିଏ ୮୭ ଲକ୍ଷ ରହିଛି। ଦିଲ୍ଲୀ ପ୍ରତିଦିନ ହାରାହାରି ୨୩ ଜଣ ନୂଆ କରୋନା ସଂକ୍ରମିତଙ୍କୁ ଚିହ୍ନଟ କରାଯାଉଥିବାବେଳେ କାଜାକସ୍ତାନରେ ୨୯ ଜଣଙ୍କୁ ଚିହ୍ନଟ କରାଯାଉଛି। ଅପରପକ୍ଷରେ ଦିଲ୍ଲୀରେ ସଂକ୍ରମିତଙ୍କ ସଂଖ୍ୟା ୮୯୮ ରହିଛି। ସେହିପରି କରୋନାରୁ ସୁସ୍ଥ ହୋଇଥିବା ଲୋକଙ୍କ ସଂଖ୍ୟା ୨୪ ଏବଂ ମୃତକଙ୍କ ସଂଖ୍ୟା୧୩ ରହିଛି। କାଜାକସ୍ତାନରେ ସଂକ୍ରମିତଙ୍କ ସଂଖ୍ୟା ୮୦୨ ଥିବାବେଳେ ସୁସ୍ଥ ହୋଇ ଘରକୁ ୬୩ ଜଣ ଫେରିଛନ୍ତି। ଏଠାରେ ମୃତ୍ୟୁ ସଂଖ୍ୟା ୯ ରହିଛି। ସେହିପରି ଜାପାନ ଏବଂ ମହାରାଷ୍ଟ୍ରର ଜନ ସଂଖ୍ୟା ପାଖାପାଖି ରହିଛି। ଜାପାନର ଜନସଂଖ୍ୟା ୧୨ କୋଟି ୬୪ ଲକ୍ଷ ଥିବାବେଳେ ମହାରାଷ୍ଟ୍ରର ଜନସଂଖ୍ୟା ୧୨ କୋଟି ୧୯ ଲକ୍ଷ ରହିଛି। ଜାପାନରେ ବର୍ତ୍ତମାନ ସୁଦ୍ଧା ୫୫୩୦ କରୋନା ସଂକ୍ରମିତଙ୍କୁ ଚିହ୍ନଟ କରାଯାଇଥିବାବେଳେ ମହାରାଷ୍ଟ୍ରରେ ସଂକ୍ରମିତଙ୍କ ସଂଖ୍ୟା ୧୩୬୪ ରହିଛି। ମହାରାଷ୍ଟ୍ରରେ ୧୨୫ ସୁସ୍ଥ ହୋଇ ଘରକୁ ଫେରିଥିବାବେଳେ ମୃତ୍ୟୁ ସଂଖ୍ୟା ୯୭ ରହିଛି। ଅପରପକ୍ଷରେ ଜାପାନରେ ୬୮୫ ସଂକ୍ରମିତ ସୁସ୍ଥ ହୋଇ ଫେରିଛନ୍ତି। ସେହିପରି ମୃତ୍ୟୁ ସଂଖ୍ୟା ୯୯ ରହିଛି। ତାମିଲନାଡୁର ଜନସଂଖ୍ୟା ୭ କୋଟି ୭୧ ଲକ୍ଷ ଥିବାବେଳେ ଜର୍ମାନୀର ଜନସଂଖ୍ୟା ୮ କୋଟି ୩୭ ଲକ୍ଷ ରହିଛି। ତାମିଲନାଡୁରେ ସଂକ୍ରମିତଙ୍କ ସଂଖ୍ୟା ୮୩୪ ଥିବାବେଳେ ସୁସ୍ଥ ହୋଇଫେରିଥିବା ଲୋକଙ୍କ ସଂଖ୍ୟା ୨୧ ଏବଂ ମୃତକଙ୍କ ସଂଖ୍ୟା ୮ ରହିଛି। ଅପରପକ୍ଷରେ ଜର୍ମାନୀରେ ସଂକ୍ରମିତଙ୍କ ସଂଖ୍ୟା ଲକ୍ଷେ ୧୮ ହଜାର ୨୩୫ ଥିବାବେଳେ ସୁସ୍ଥ ହୋଇ ଫେରିଥିବା ଲୋକଙ୍କ ସଂଖ୍ୟା ୫୨,୪୦୭ ଏବଂ ମୃତକଙ୍କ ସଂଖ୍ୟା ୨,୬୦୭ ରହିଛି। ତେଲେଙ୍ଗାନା ଏବଂ ଆଫଗାନିସ୍ତାନର ଜନସଂଖ୍ୟା ୩ କୋଟି ୮୯ ଲକ୍ଷ। ତେଲେଙ୍ଗାନାରେ ସଂକ୍ରମିତ, ସୁସ୍ଥ ଏବଂ ମୃତକଙ୍କ ସଂଖ୍ୟା ଯଥାକ୍ରମେ ୪୭୩, ୩୫ ଏବଂ ୭ଥିବା ବେଳେ ଆଫଗାନିସ୍ତାନରେ ଏହା ୫୨୧, ୩୨ ଏବଂ ୧୫ ରହିଛି। ସେହିପରି ରାଜସ୍ଥାନ ଏବଂ ଇରାନର ଜନସଂଖ୍ୟା ଯଥାକ୍ରମେ ୭ କୋଟି ୯୫ ଲକ୍ଷ ଏବଂ ୮ କୋଟି ୩୯ ଲକ୍ଷ ରହିଛି। ରାଜସ୍ଥାନରେ ସଂକ୍ରମିତ, ସୁସ୍ଥ ଏବଂ ମୃତକଙ୍କ ସଂଖ୍ୟା ଯଥାକ୍ରମେ ୪୬୩, ୨୧ ଏବଂ ୩ ଥିବାବେଳେ ଇରାନରେ ସଂକ୍ରମିତଙ୍କ ସଂଖ୍ୟା ୬୮,୧୯୨ ଥିବାବେଳେ ସୁସ୍ଥ ହୋଇ ୩୫,୪୬୫ ଜଣ ଘରକୁ ଫେରିଛନ୍ତି। ଏଠାରେ ୪,୨୩୨ ଜଣଙ୍କ ମୃତ୍ୟୁ ଘଟିଛି।
