ଆରମ୍ଭ ହୋଇସାରିଛି କଟକର ବିଶ୍ୱ ପ୍ରସିଦ୍ଧ ବାଲିଯାତ୍ରା। ୨ବର୍ଷ ପରେ ବିନା କରୋନା କଟକଣାରେ ସଭିଁଏ ବାଲିଯାତ୍ରାରେ ମଉଜ ମଜଲିସ୍ କରୁଛନ୍ତି। କିଏ ବିଭିନ୍ନ ପ୍ରକାର ଦୋଳି ଖେଳିବାରେ ମସଗୁଲ୍ ତ କିଏ ବୁଲି ବୁଲି ସବୁ ଦୋକାନରୁ ନେଉଛନ୍ତି ଭଳିକି ଭଳି ଖାଇବାର ମଜା।
ଦିନ ଯେତିକି ଗଡୁଛି ବାଲିଯାତ୍ରା ପଡିଆରେ ଗହଳି ସେତିକି ବଢୁଛି। ଖଚାଖଚ୍ ଭିଡ ସହ ନାଚଗୀତର ଆସର ଜମୁଛି। ସଭିଏଁ ଦିନ ବଢିବା ସହ ମେଳା ମୁହାଁ ହେଉଛନ୍ତି। ଆଖି ଖୋସି ହେଉଯାଉଥିବା ରଙ୍ଗବେରଙ୍ଗର ଆଲୋକମାଳା ସହ ଚଟପଟି ଖାଦ୍ୟ ଖାଇବାକୁ ପିଲାମାନଙ୍କ ମଧ୍ୟରେ ନାହିଁ ନଥିବା ଉତ୍ସାହ। ପିଲାମାନେ ରାମଦୋଳି, ବ୍ରେକଡ୍ୟାନ୍ସ ଆଦି ଦୋଳିରେ ବସି ମଜା କରୁଛନ୍ତି। ଧାଡିକି ଧାଡିକି ଲମ୍ବିଥିବା ଖେଳନା ଦୋକାନରେ ପିଲାଏ ଭଳିକି ଭଳି ଖେଳନା ନେବା ପାଇଁ ଭିଡ ଜମାଇଲେଣି। ଏଥର ଆର୍କଷଣର କେନ୍ଦ୍ରବିନ୍ଦୁ ପାଲଟିଛି ଦଶହଜାର କାଗଜ ଡଙ୍ଗା ଓ ଲେଜର୍ ଲାଇଟ୍ ଶୋ।
ଦୋଳିର ମଜା ନେବି
ବାଲିଯାତ୍ରାରେ ବୁଲିବା ସହିତ ଯଦି ଦୋଳି ଖେଳର ମଜ୍ଜା ନ ଉଠାଇଲ ତାହାଲେ ସବୁ ଅଧୁରା ହୋଇଯାଏ। ସବୁବେଳେ ବିଭିନ୍ନ ରକମର ଦୋଳି ବାଲିଯାତ୍ରାରେ ପଡିଥାଏ। ମୁଁ ବାଲିଯାତ୍ରା ତ ଯାଏ କେବଳ ଦୋଳିରେ ବସିବା ଲାଗି। ଏଥର ମୀନାବଜାରରେ ରାମଦୋଳି, ଚକ୍ରି, ବ୍ରେକଡ୍ୟାନ୍ସ, ଟୋରା ଟୋରାରେ ମନ ଶାନ୍ତି ହେବା ଯାଏଁ ବସି ଉପଭୋଗ କରିବି। ସବୁ ଭାଇ ଭଉଣୀ ମିଶି ଢେର ମଜା କରିବୁ। ବାପା ସମସ୍ତଙ୍କ ପାଇଁ ଭଳିକି ଭଳି ଖେଳନା କିଣାଇ ଦେବେ ବୋଲି ବହିଛନ୍ତି।
-ସ୍ବାଗତ କୁମାର ସାହୁ, କ୍ଲାସ୍-୫, ଓସ୍ତପାଳ ପ୍ରାଥମିକ ବିଦ୍ୟାଳୟ, ଭଦ୍ରକ
ଯାତ୍ରାରୁ ମନ ପସନ୍ଦର କଣ୍ଢେଇ ଆଣିଛି
ଏଥର ବାଲିଯାତ୍ରାରେ ଭଳିକି ଭଳି ଖେଳନା ଦୋକାନ ପଡିଛି। ଏଥର ମୁଁ କାଠ ତିଆରି ସୁନ୍ଦର କଣ୍ଢେଇ କିଣି ଆଣିଛି। ୨ବର୍ଷ ବାଲିଯାତ୍ରା ନ ବୁଲି ପାରି ମନ ଦୁଃଖ ଥିଲା। ଏବର୍ଷ ବାପାଙ୍କ ସହ ବହୁତ ବୁଲିଲି। ସାରେ ଲେଜର୍ ଲାଇଟ୍ ସୋ ସବୁଠୁ ଆର୍କଷଣୀୟ ଥିଲା। ମୀନାବଜାରରେ ରାମଦୋଳିରେ ବାପାଙ୍କ ସହ ବସି ଖୁବ୍ ମଜା କଲି। ଯାତ୍ରାରେ ଦହିବରା, ମଥୁରା କେକ୍, ଠୁଙ୍କାପୁରୀ ବି ଖାଇଲି। ଏଥର ୧୦୦ଟି ଖାଣ୍ଟି ଓଡିଆ ଖାଦ୍ୟ ଷ୍ଟଲ୍ ପଡିଛି। ସେଥିରେ ପରଷାଯାଉଥିବା ଖାଦ୍ୟରେ ପେଟଭର୍ତ୍ତି ହୋଇଗଲା।
-ଅଇଶ୍ୱରୟା ସାହୁ, କ୍ଲାସ୍-୬, ବିବେକାନନ୍ଦ ଶିକ୍ଷାକେନ୍ଦ୍ର, ଯାଜପୁର ଟାଉନ
ପ୍ରଥମ ଥର କବାଲି ଶୁଣି ଖୁସି ଲାଗିଲା
୨ବର୍ଷ ପରେ ଏବର୍ଷ ବାଲିଯାତ୍ରାରେ ବହୁତ ଭିଡ ହୋଇଛି। ଲୋକ ଗହଳି ସାଙ୍ଗକୁ ବିଭିନ୍ନ ପ୍ରକାର ଷ୍ଟଲ୍ ମଧ୍ୟ ପଡିଛି। କଟକରେ ମୋ ମାମୁଁଙ୍କ ଘର ହୋଇଥିବାରୁ ମୁଁ ମାମୁଁଙ୍କ ପରିବାର ସହ ବାଲିଯାତ୍ରା ବୁଲିବାକୁ ଯାଇଥିଲି। ୨ବର୍ଷ କରୋନା କଟକଣା ଯୋଗୁଁ ବାଲିଯାତ୍ରା ଆସିପାରୁ ନଥିଲି। ଏବର୍ଷ ଖେଳନା ଷ୍ଟଲ୍ ଓ ବିଭିନ୍ନ ପ୍ରକାର ଦୋଳି ଲାଗିଛି। ମୋତେ ଅକ୍ଟୋପସ୍ ଦୋଳିରେ ବସିବାକୁ ବଢିଆ ଲାଗିଲା। ଏଥର ନାମୀଦାମୀ କଣ୍ଠଶିଳ୍ପୀଙ୍କ ଦ୍ୱାରା କବାଲି ପରିବେଷଣ ହେଉଛି। ପ୍ରଥମଥର କବାଲି ଶୁଣି ବହୁତ ଖୁସି ଲାଗିଲା।
-ଶ୍ୱେତାଶ୍ରୀ ସାହୁ, କ୍ଲାସ୍-୫,
ସରସ୍ବତୀ ଶିଶୁ ବିଦ୍ୟା ମନ୍ଦିର, ପୁରୀ
ଠୁଙ୍କାପୁରୀ ଖାଇବାର ମଜା ନେବି
ଏ ବର୍ଷ ବାଲିଯାତ୍ରା ଭିନ୍ନ ଢଙ୍ଗରେ ହୋଇଛି। ଏଥର ଦଶ ହଜାର କାଗଜ ଡଙ୍ଗା ନିର୍ମାଣ ହୋଇ କଟକ ଗିନିଜ୍ ରେକର୍ଡରେ ସ୍ଥାନ ପାଇବାକୁ ଯାଉଛି। ଶନିବାର ଏହି ପୋଗ୍ରାମ ରଖାଯାଇଥିବାରୁ ମୁଁ ପରିବାର ସହ ଆଜି ବାଲିଯାତ୍ରା ବୁଲିବାକୁ ପ୍ଲାନ୍ କରିଥିଲି। ବୁଲାବୁଲି ସାଙ୍ଗକୁ ଏହି ଡଙ୍ଗା ନିର୍ମାଣ ଦେଖିବି। ବାଲିଯାତ୍ରାରେ ଠୁଙ୍କାପୁରୀ ଖାଇବାର ମଜା ଅଲଗା। ଏହାଛଡା ଷ୍ଟଲ୍ରେ ପଡିଥିବା ଅଲଗା ସୁସ୍ବାଦୁ ଖାଦ୍ୟ ଖାଇବାର ମଜା ନେବି।
-ସ୍ମୃତିମୟୀ ବେହେରା, କ୍ଲାସ୍-୮, ଏମ୍ ଏଲ ଏ ସରକାରୀ ଉଚ୍ଚ ବିଦ୍ୟାଳୟ, ଦୁଲାଖାପାଟଣା
ଲେଜର୍ ଶୋ ଦେଖି ବହୁତ ଖୁସି ହେଲି
ଗତକାଲି ସାରେ ପରିବାର ସହ ବାଲିଯାତ୍ରା ବୁଲିବାକୁ ଯାଇଥିଲି। ଖାସ୍ କରି ବିଶେଷ ଆର୍କଷଣ ସାଜିଥିବା ଲେଜର ଲାଇଟ୍ ଶୋ କୁ ମୁଁ ହାତଛଡା କରିବାକୁ ଚାହୁଁ ନଥିଲି। ମାହାତ୍ମାଗାନ୍ଧୀଙ୍କ ଜୀବନୀ ଓ କଟକର ଐତିହ୍ୟସ୍ଥଳୀ ଉପରେ ଚିତ୍ତାକର୍ଷକ ଶୋ ପରିବେଷଣ ହେଲା। ପ୍ରଥମ ଥର ପାଇଁ ଲେଜର ଶୋ ଦେଖି ବହୁତ ଖୁସି ଲାଗିଲା। ବିଭିନ୍ନ ରାଜ୍ୟରୁ ଆସିଥିବା ଲୋକ ସେମାନଙ୍କ ଲୋକକଳା ପ୍ରର୍ଦଶନ କରୁଥିଲେ। ସେ ସବୁକୁ ମୁଁ ବହୁତ ଉପଭୋଗ କଲି।
-ଅଖ୍ୟଧ୍ୟା ମିଶ୍ର, କ୍ଲାସ୍-୭, ଡିଏଭି ପବ୍ଲିକ୍ ସ୍କୁଲ୍, ଚନ୍ଦ୍ରଶେଖର, ଭୁବନେଶ୍ୱର
