ନୂଆଦିଲ୍ଳୀ,୪।୬(ପି.ଟି.): ୨୦୦୭ରେ ଅନୁଷ୍ଠିତ ଟି୨୦ ବିଶ୍ୱକପ୍ର ପ୍ରାରମ୍ଭିକ ସଂସ୍କରଣରେ ଭାରତକୁ ଚାମ୍ପିୟନ କରାଇବାରେ ପ୍ରମୁଖ ଭୂମିକା ଗ୍ରହଣ କରିଥିବା ରବିନ୍ ଉଥାପ୍ପା ଏକଦା ମାନସିକ ଦୁଃଶ୍ଚିନ୍ତାର ଶିକାର ହୋଇ ଆତ୍ମହତ୍ୟା କରିବାକୁ ନିଷ୍ପତ୍ତି ନେଇଥିଲେ। କ୍ୟାରିୟରରେ ୨ ବର୍ଷ ସେ ଏ ଭଳି ମାନସିକ ଚାପ ଦେଇ ଗତି କରି ଆସୁଥିଲେ। ସେ ବାଲକୋନୀରୁ ଡେଇଁ ଆତ୍ମହତ୍ୟା କରିବାକୁ ଚିନ୍ତା କରୁଥିଲେ। ତେବେ ଏହି ଦୁଃସମୟରେ କ୍ରିକେଟ ହିଁ ତାଙ୍କୁ ଏଥିରୁ ନିବୃତ୍ତ ରହିବାକୁ ସାହାସ ଦେଇଥିଲା ବୋଲି ଉଥାପ୍ପା କହିଛନ୍ତି। ରୟାଲ ରାଜସ୍ଥାନ ଫାଉଣ୍ଡେଶନ ଲାଇଭ୍ ସେସନ ‘ମାଇଣ୍ଡ, ବଡି ଆଣ୍ଡ ସୋଲ’ରେ ଅଂଶଗ୍ରହଣ କରି ଉଥାପ୍ପା ନିଜ ଜୀବନ ଅନେକ ଗୁପ୍ତ କଥା ସାର୍ବଜନୀନ କରିଛନ୍ତି।
୨୦୦୯ରୁ ୨୦୧୧ ମଧ୍ୟରେ ଏଭଳି ପରିସ୍ଥିତର ସମ୍ମୁଖୀନ ହୋଇଥିଲି। ସେତେବେଳେ କ୍ରିକେଟ ବିଷୟରେ ଚିନ୍ତା କରିପାରୁ ନ ଥିଲି। ସେତେବେଳେ ଆଜି କିଭଳି ରହିବ ଓ କାଲି କେମିତି ବିତାଇବି। ମୋ ଜୀବନ କେଉଁଆଡେ ଗତି କରୁଛି ସେ ନେଇ ସନ୍ଦୀହାନ ଥିଲି। ଅବଶ୍ୟ କ୍ରିକେଟ ଏହି ଚିନ୍ତାରୁ ଦୂରେଇ ରହିବା ପାଇଁ ସାହାଯ୍ୟ କରିଥିଲା। ତେବେ ଅଫ୍ ସିଜନ ଓ ମ୍ୟାଚ୍ ନ ଥିବା ଦିନଗୁଡିକରେ ପୁଣି ସମସ୍ୟାରେ ପଡୁଥିଲି। ବେଳେବେଳେ ମନେ ହେଉଥିଲା ବାଲଲକୋନୀରୁ ଡେଇଁ ଜୀବନ ହାରି ଦେବି। କିନ୍ତୁ କୌଣସ କାରଣରୁ ଏଥିରୁ ନିବୃତ୍ତ ରହିବାରେ ସକ୍ଷମ ହୋଇଥିଲି। ସେତେବେଳେ ଡାଏରୀ ଲେଖିବା ଆରମ୍ଭ କରିଥିଲି। ଜଣେ ମଣିଷ ହିସାବରେ ନିଜକୁ ବୁଝିବାକୁ ପ୍ରୟାସ କରିଥିଲି। ଏହାପରେ ବାହାରୁ ସହାଯ୍ୟ ନେଇଥିଲି ଓ ଜୀବନର ଗତିପଥ ବଦଳାଇବାକୁ ଚେଷ୍ଟା କରିଥିଲି।
ଏହାପରେ ଅଷ୍ଟ୍ରେଲିଆରେ ଭାରତ ଏ’ ଦଳରେ ନେତୃତ୍ୱ ନେଇଥିଲେ ମଧ୍ୟ ଭାରତୀୟ ଦଳରେ ସ୍ଥାନ ପାଇ ନ ଥିଲି। ଯେତେ ପରିଶ୍ରମ କଲେ ବି ରନ ସଂଗ୍ରହ କରିପାରୁ ନ ଥିଲି। ମୋ ସହିତ କିଛି ସମସ୍ୟା ଥିଲା ବୋଲି ଭାବିଥିଲି। ମାନସିକ ସମସ୍ୟାକୁ ଆମେ ବେଳେବେଳେ ସ୍ବୀକାର କରିବାକୁ ଅକ୍ଷମ ହୋଇଥାଉ ବୋଲି ଉଥାପ୍ପା କହିଛନ୍ତି। ତେବେ ଏହାପରେ ୨୦୧୪- ୧୫ ରଣଜୀ ସେସନରେ ଉଥାପ୍ପା ସର୍ବାଧିକ ରନ ସଂଗ୍ରହ କରିଥିଲେ। ଏପର୍ଯ୍ୟନ୍ତ ଅବସର ଘୋଷଣା କରି ନ ଥିଲେ ମଧ୍ୟ ସେ ୨୦୧୫ ପର୍ଯ୍ୟନ୍ତ ଭାରତ ପାଇଁ ଖେଳିଥିଲେ। ଜୀବନରେ ଖାରପ୍ ସମୟ ଦେଇ ଗତି କରିଥିବାରୁ ଓ ନକାରାତ୍କ ଅଭିଜ୍ଞତା ହାସଲ କରିଥିବାରୁ ମୋର କୌଣସି ଅନୁସୋଚନା ନାହିଁ। କାରଣ ଏହା ଦ୍ୱାରା ସକାରାତ୍ମକ ମନୋଭାବ ଆସିଥାଏ। ଗତ ଏକ ଦସନ୍ଧିରେ କ୍ରିକେଟରେ ବହୁ ପରିବର୍ତ୍ତନ ଆସିଛି ବୋଲି ଉଥାପ୍ପା କହିଛନ୍ତି।
