ବଇଣ୍ଡା,୨।୩(ଡି.ଏନ.ଏ.) ଅନୁଗୋଳ ଜିଲା କିଶୋରନଗର ବ୍ଲକ ଧଉରପାଳ ପଞ୍ଚାୟତ କେନ୍ଦୁନାଳୀ ଗ୍ରାମରେ ଅଙ୍ଗନଓ୍ବାଡ଼ି ଗୃହ ନିର୍ମାଣ ହୋଇପାରୁ ନାହିଁ। ଅର୍ଥ ମଞ୍ଜୁର ହୋଇ ପଡ଼ି ରହିଥିଲେ ବି ନିର୍ମାଣ ହେବାକୁ ଥିବା ସରକାରୀ ଜମିରୁ ଜବରଦଖଲ ହଟାଯାଉ ନ ଥିବାରୁ ଏପରି ସମସ୍ୟା ସୃଷ୍ଟି ହୋଇଛି। ଏହାର ପ୍ରତିବାଦରେ ଶନିବାର କେନ୍ଦୁନାଳୀ ଗ୍ରାମବାସୀ ଅନୁଗୋଳ ଜିଲାପାଳଙ୍କଠାରେ ଅଭିଯୋଗ କରିଛନ୍ତି।
ଅଭିଯୋଗପତ୍ରରେ ଗ୍ରାମବାସୀ ଦର୍ଶାଇଛନ୍ତି ଯେ, ଗ୍ରାମରେ ଅଙ୍ଗନଓ୍ବାଡ଼ି ଗୃହ ନ ଥିବା ଯୋଗୁ କୁନି କୁନି ଛାତ୍ରୀଛାତ୍ରମାନେ ସ୍ଥାନୀୟ ବିଦ୍ୟାଳୟ ବାରଣ୍ଡାରେ ବସି ପଢୁଛନ୍ତି। ଗ୍ରାମବାସୀଙ୍କ ବହୁବାର ଦାବି ପରେ ୨୦୧୮ରେ ରାଜ୍ୟ ସରକାରଙ୍କ ପକ୍ଷରୁ ଅଙ୍ଗନଓ୍ବାଡ଼ି ଶ୍ରେଣୀଗୃହ ନିର୍ମାଣ ପାଇଁ ୮ ଲକ୍ଷ ଟଙ୍କା ମଞ୍ଜୁର କରାଯାଇଥିଲା। ସ୍ଥାନୀୟ ବିଦ୍ୟାଳୟ ସମ୍ମୁଖରେ ଥିବା କେନ୍ଦୁନାଳୀ ମୌଜା ଖାତା ନଂ. ୪୬ ପ୍ଲଟ ନଂ.୧୪୮/୧୫୦/୧୫୧ ସରକାରୀ ଜମିରେ ଏହା ନିର୍ମାଣ ନିମନ୍ତେ ଗ୍ରାମବାସୀ ପ୍ରଶାସନକୁ ପ୍ରସ୍ତାବ ଦେଇଥିଲେ। ହେଲେ ଉକ୍ତ ଜମିକୁ ସେହି ଗ୍ରାମର ଜଣେ ବ୍ୟକ୍ତି ଜବରଦଖଲରେ ରଖିଛନ୍ତି। ଉକ୍ତ ଜମିକୁ ଚିହ୍ନଟ କରିବା ପାଇଁ ଗ୍ରାମବାସୀ ଗତ ଡିସେମ୍ବର ୪ ତାରିଖରେ କିଶୋରନଗର ତହସିଲ କାର୍ଯ୍ୟାଳୟରେ ଅଭିଯୋଗ କରିଥିଲେ। ପରେ ବିଭାଗ ପକ୍ଷରୁ ଜାଗା ଚିହ୍ନଟ କରିବା ପାଇଁ ନିର୍ଦ୍ଦେଶନାମା ଦିଆଯାଇଥିଲା। କିନ୍ତୁ ଅଙ୍ଗପଡ଼ା ରାଜସ୍ବ ବିଭାଗର କେତେଜଣ କର୍ମଚାରୀ ଜବରଦଖଲକାରୀଙ୍କ ସହ ସଲାସୁତୁରା କରିଥିବାରୁ ଉଚ୍ଛେଦ ହୋଇପାରୁନାହିଁ। ଫଳରେ ଅଙ୍ଗନଓ୍ବାଡ଼ି ଗୃହ ନିର୍ମାଣ ସମ୍ଭବ ହୋଇପାରୁ ନ ଥିବାରୁ ମଞ୍ଜୁର ଅର୍ଥ ଫେରିଯିବା ଆଶଙ୍କା ପ୍ରକାଶ ପାଇଛି। ତୁରନ୍ତ ଏଥିପ୍ରତି ଅନୁଗୋଳ ଜିଲାପାଳ ଦୃଷ୍ଟି ଦେଇ ଉକ୍ତ ସରକାରୀ ଜାଗାରୁ ଜବରଦଖଲ ହଟାଇବା ପାଇଁ କେନ୍ଦୁନାଳୀ ଗ୍ରାମବାସୀ ଦାବି କରିଛନ୍ତି। ନଚେତ ତହସିଲ ଅଫିସ ଘେରାଉ କରାଯିବ ବୋଲି ଗ୍ରାମର ଦିଲୀପ କୁମାର ସାହୁ, ସଞ୍ଜୟ ଦେହୁରୀ, ସନ୍ତୋଷ ପ୍ରଧାନ, ବିଶ୍ୱାମିତ୍ର ପ୍ରଧାନ, ରସାନନ୍ଦ ପ୍ରଧାନ, ଶରତ ସାହୁ, କିଶୋରଚନ୍ଦ୍ର ପ୍ରଧାନ ପ୍ରମୁଖ ଚେତାବନୀ ଦେଇଛନ୍ତି। ଏ ନେଇ କିଶୋରନଗର ତହସିଲଦାର ଡ. ଲକ୍ଷ୍ମୀପ୍ରସାଦ ସାହୁ କହିଛନ୍ତି, ତୁରନ୍ତ ବିଭାଗ ପକ୍ଷରୁ ପଦକ୍ଷେପ ନିଆଯାଇ ସରକାରୀ ଜମିରୁ ଜବରଦଖଲ ଉଚ୍ଛେଦ କରାଯିବ।
