କୋରେଇ,୭ା୬(ସ୍ବ.ପ୍ର.) : ଜନସାଧାରଣଙ୍କ ଧନଜୀବନର ସୁରକ୍ଷା ପାଇଁ ପୋଲିସ ବାହିନୀ ଗଠିତ ହୋଇଥିଲେ ମଧ୍ୟ କେତେଜଣ ନ୍ୟସ୍ତସ୍ବାର୍ଥ ବ୍ୟକ୍ତିଙ୍କ ପ୍ରରାଚନାରେ ସେମାନେ କର୍ତ୍ତବ୍ୟରେ ଅବହେଳା କରୁଥିବା ଜଣାପଡ଼ିଛି। ଏହାର ଏକ ଉଦାହରଣ ହେଉଛି ମଙ୍ଗଳପୁର ଥାନା। ସିସିଟିଭି ଫୁଟେଜରେ ସମସ୍ତ ଘଟଣା କଏଦ ହୋଇଥିବା ସତ୍ତ୍ୱେ ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରୁନାହିଁ। ଗତ ୨ ତାରିଖରୁ ଏତଲା ଦିଆଯାଇଥିଲେ ମଧ୍ୟ ଏପର୍ଯ୍ୟନ୍ତ ମାମଲା ରୁଜୁ ହୋଇନାହିଁ। ଶେଷରେ ବାଧ୍ୟ ହୋଇ ଦଳିତ ବ୍ୟବସାୟୀ ଗୁରୁବାର ପାଣିକୋଇଲିସ୍ଥିତ ଜିଲା ପୋଲିସ ମୁଖ୍ୟାଳୟରେ ଏସ୍ସପିଙ୍କୁ ଭେଟି ଗୁହାରି କରଛନ୍ତି। ପରେ ତୁରନ୍ତ ମାମଲା ରୁଜୁ କରିବାକୁ ଏସ୍ପି ମଙ୍ଗଳପୁର ଥାନାଧିକାରୀ ଅସିତ କୁମାର ମହାନ୍ତିଙ୍କୁ ନିର୍ଦ୍ଦେଶ ଦେଇଛନ୍ତି।
ପ୍ରକାଶ ଯେ, ମଙ୍ଗଳପୁର ଥାନା ପାଲଟପୁର ଗ୍ରାମର ମଦନ ମଲ୍ଲିକ ଗତ ୨୯ ତାରିଖରେ ପାଇଁ ମଙ୍ଗଳପୁରର ପିକେ ଢାବାରେ ଏକ ବିବାହ ଭୋଜି ଆୟୋଜନ କରିଥିଲେ। ଭୋଜି ଚାଲିଥିବାବେଳେ ୨ ଜଣ ଯୁବକ ପହଞ୍ଚି ଖାଦ୍ୟ ମାଗିଥିଲେ। ମାତ୍ର ଭୋଜି ପାଇଁ ଢାବା ରିର୍ଜଭ ହୋଇଥିବାରୁ ହେଟେଲ ମାଲିକ ନିଜର ଅକ୍ଷମତା ପ୍ରକାଶ କରିଥିଲେ। ଫଳରେ ସେମାନେ ଉତ୍କ୍ଷିପ୍ତ ହୋଇ ଗାଳିଗୁଲଜ କରିଥିଲେ। ନିମନ୍ତ୍ରିତ ଭଦ୍ର ବ୍ୟକ୍ତିମାନେ ଥିବାରୁ ମଦନ ଓ ହୋଟେଲ ମାଲିକ ପ୍ରତାପ ପାଢୀ ଗାଳିଗୁଲଜକୁ ପ୍ରତିବାଦ କରିଥିଲେ। ଏନେଇ ମଦନ ଓ ପ୍ରତାପ ମଙ୍ଗଳପୁର ଥାନାରେ ଅଭିଯୋଗ କରିଥିଲେ। ପୋଲିସ ମୁଖ୍ୟ ଅଭିଯୁକ୍ତଙ୍କୁ ଥାନାକୁ ଡାକିଥିଲେ ମଧ୍ୟ ସ୍ଥାନୀୟ ସରପଞ୍ଚ ଓ ବଜାର କମିଟି ପକ୍ଷରୁ ଏହାର ସମାଧାନ କରାଯିବ ବୋଲି କହି ତାଙ୍କୁ ଥାନାରୁ ଆଣିଥିଲେ। ଏହାର ସମାଧାନ ପାଇଁ କମିଟିର ସଭ୍ୟ କ୍ଷତ୍ରୋଦ ଶତପଥୀ ୧ ତାରିଖରେ ମଦନଙ୍କୁ ଦୁର୍ଗା ମଣ୍ଡପକୁ ଡାକିଥିଲେ। ମାତ୍ର ମଦନ ତାଙ୍କ ବୟାନ ରଖିବା ପୂର୍ବରୁ ସଭ୍ୟମାନେ ଉତକ୍ଷୀପ୍ତ ହୋଇ ଗାଳିଗୁଲଜ କରିବା ସହ ଦୋକାନ କରିଦେବୁ ନାହିଁ ବୋଲି କହିଥିଲେ। ମଦନଙ୍କୁ ମାଡ଼ ମାରିବା ସହ ଜୋରଜବରଦସ୍ତ ସାଦା କାଗଜରେ ଦସ୍ତଖତ କରିବାକୁ ବାଧ୍ୟ କରିଥିଲେ। ଏ ନେଇ ୨ ତାରିଖରେ ପୁନଶ୍ଚ ଲିଖିତ ଅଭିଯୋଗ କରିଥିଲେ।
