ନୂଆଦିଲ୍ଳୀ,୨୪।୫: ଭାରତୀୟ କ୍ରୀଡ଼ାରେ ପ୍ରଥମଥର ପାଇଁ ଏକ ନୂଆ କଥା ଦେଖିବାକୁ ମଳିଛି। ଦେଶର ଆଗଧାଡିର ବକ୍ସର ଓ କୋଚ୍ମାନଙ୍କ ପାଇଁ ସ୍ବାସ୍ଥ୍ୟବୀମାର ବ୍ୟବସ୍ଥା କରାଯିବ ବୋଲି ବକ୍ସିଂ ଫେଡେରେଶନ ଅଫ୍ ଇଣ୍ଡିଆ (ବିଏଫ୍ଆଇ) ତରଫରୁ କୁହାଯାଇଛି। ଜାତୀୟ ପ୍ରଶିକ୍ଷଣ ଶିବିରରେ ରହଣି ସମୟରେ ଚିକିତ୍ସା ପାଇଁ ଏମାନଙ୍କୁ କୋଭିଡ-୧୯ ସ୍ବାସ୍ଥ୍ୟ ବୀମା ପରିସର ଭୁକ୍ତ କରାଯିବା ନେଇ ଯୋଜନା ହୋଇଛି। ଏହି ବୀମା ପଲିସିରେ ବକ୍ସର, କୋଚ୍ଙ୍କ ସମେତ ସପୋର୍ଟ ଷ୍ଟାଫ୍ ମଧ୍ୟ ସାମିଲ ରହିବେ। ଏହା ବ୍ୟତୀତ କ୍ୟାମ୍ପରେ ସାମିଲ ଥିବା ସମସ୍ତଙ୍କ ପାଇଁ ଅଲଗା ଭାବେ ମେଡିକାଲ ଇମର୍ଜେନ୍ସି ଓ ଦୁର୍ଘଟଣା ପାଇଁ ବୀମାର ବ୍ୟବସ୍ଥା କରାଯିବ। ବକ୍ସିଂ ବିଏଫ୍ଆଇ ଜାତୀୟ ପ୍ରଶିକ୍ଷଣରେ ସାମିଲ ହେବାକୁ ଥିବା ବ୍ୟକ୍ତିଙ୍କ ପାଇଁ ମାନକ ସଂଚାଳନ ପ୍ରକ୍ରିୟା (ଏସ୍ଓପି) ଉନ୍ମୋଚନ କରିଛି। ଏହି କ୍ରମରେ ବିଏଫ୍ଆଇ ଦେଶର ପ୍ରଥମ ଜାତୀୟ ସ୍ପୋଟର୍ସ ଫେଡେରେଶନ (ଏନ୍ଏସ୍ଏଫ୍) ଭାବେ କୋଭିଡ-୧୯ ମହାମାରୀ ପାଇଁ ସ୍ବାସ୍ଥ୍ୟବୀମା ବ୍ୟବସ୍ଥା କରିଛି।
ବକ୍ସର ଓ କୋଚ୍ମାନଙ୍କ ପାଇଁ ବେସିକ ଇନ୍ସ୍ୟୁରାନ୍ସ ବାବଦରେ ୫ ଲକ୍ଷ ଟଙ୍କାର ବ୍ୟବସ୍ଥା କରାଯାଇଛି। ଜାତୀୟ ପ୍ରଶିକ୍ଷଣ ଶିବିର ଆରମ୍ଭ ହେବା ମାତ୍ରେ ଏହି ବୀମା ପଲିସି କାର୍ଯ୍ୟକାରୀ ହେବ। ଏହା ବ୍ୟତୀତ ଶିବିରରେ ଟ୍ରେନିଂ ଅବସରରେ କେତୋଟି ନିର୍ଦ୍ଦେଶନାମା ଜାରି କରାଯାଇଛି। ଖେଳାଳି ଓ କୋଚ୍ମାନେ ଏହାକୁ ଅନୁସରଣ କରିବେ ବୋଲି ବିଏଫ୍ଆଇର ଜଣେ ବରିଷ୍ଠ ଅଧିକାରୀ କହିଛନ୍ତି। ବକ୍ସରମାନଙ୍କ ଟ୍ରେନିଂ ୩-୪ ଜଣଙ୍କୁ ନେଇ ଛୋଟିଆ ଛୋଟିଆ ଗ୍ରୁପ୍ରେ ଆରମ୍ଭ କରାଯିବ। ଟ୍ରେନିଂ ସେଣ୍ଟରରରେ ପହଞ୍ଚିବା ପୂର୍ବରୁ ସବୁ ବକ୍ସର ଓ କୋଚ୍ମାନଙ୍କର ପରୀକ୍ଷା ହେବ। ପରୀକ୍ଷାର ଫଳାଫଳ ଜଣା ନ ପଡିବା ପର୍ଯ୍ୟନ୍ତ ସମସ୍ତେ ବାଧ୍ୟତାମୂଲକ ଭାବେ କ୍ୱାରେଣ୍ଟାଇନ୍ରେ ରହିବେ ବୋଲି ବିଏଫ୍ଆଇ ତରଫରୁ ସ୍ପଷ୍ଟ କରାଯାଇଛି।
