ପାଚେରି ଡେଇଁ ୩ ଦିନ ହେଲା କଏଦୀ ଚମ୍ପଟ
7:53 amAugust 17, 2019 / 21

ବଡବିଲ,୧୭।୮ (ସ୍ବ.ପ୍ର.)- କେନ୍ଦୁଝର ଜିଲା ବଡବିଲସ୍ଥିତ ସବ୍‌ଜେଲର ପାଚେରି ଡେଇଁ ଗତ ୧୩ ତାରିଖ ରାତିରେ ଜଣେ ବିଚାରାଧୀନ କଏଦୀ ଚମ୍ପଟ ମାରିଥିବାରୁ ତାଙ୍କୁ ଧରିବା ଲାଗି ତନାଘନା ଚାଲିଛି। ଅଭିଯୁକ୍ତ ହେଲେ ଗାଢା ହଟିଂ ଅଞ୍ଚଳର ସାୱନ ପାତ୍ର ଓରଫ କୁନା। ଗତ ୧ ତାରିଖରେ ଏକ ବାଇକ ଚୋରି ଘଟଣାରେ ପୋଲିସ ତାଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। ସେ ବିଚାରାଧୀନ କଏଦୀ ଭାବେ ସବ୍‌ଜେ୍‌ଲରେ ଥିବାବେଳେ ତାଙ୍କୁ ଗତ ୧୩ ତାରିଖ ଅପରାହ୍ନରେ ରୋଷେଇ କାର୍ଯ୍ୟରେ ସହଯୋଗ କରିବାକୁ କୁହାଯାଇଥିଲା। ଏହି ଅବସରରେ ସୁଯୋଗ ଦେଖି ସେ ପ୍ରଶାସନିକ ବିଲ୍ଡିଂ ଉପରେ ଚଢି କୌଣସିମତେ ପାଚେରି ଡେଇଁ ଚମ୍ପଟ ମାରିବାରେ ସଫଳ ହୋଇଥିଲେ। ଘଟଣା ବିଷୟରେ କାହାରିକୁ କିଛି ଜଣା ନ ଥିଲା। ସନ୍ଧ୍ୟାରେ ରାତ୍ରିଭୋଜନ ବେଳେ କଏଦୀ ଗଣତି ହେବା ସମୟରେ ଜଣେ କଏଦୀ କମ୍‌ ପଡିବାରୁ ତନାଘନା ଆରମ୍ଭ ହୋଇଥିଲା। ପରେ ସିସି କ୍ୟାମେରାରୁ କଏଦୀ ଚମ୍ପଟ ମାରିବା ଘଟଣାର ଦୃଶ୍ୟ ଦେଖିବା ପରେ ଘଟଣା ସ୍ପଷ୍ଟ ହୋଇଥିଲା। ଏ ସମ୍ପର୍କରେ ବଡବିଲ ସବ୍‌ଜେଲର ଜେଲର ସୁଧାଂଶୁ ଶେଖର ବେହେରାଙ୍କୁ ପଚାରିବାରୁ ସେ କହିଛନ୍ତି, ଡ୍ୟୁଟିରେ ଅବହେଳା ଯୋଗୁ ବିଚାରଧୀନ କଏଦୀ ସାୱନ କୌଣସି ପ୍ରକାରେ ପାଚେରି ଡେଇଁ ଚମ୍ପଟ ମାରିଛନ୍ତି। ଘଟଣାର ତଦନ୍ତ ଚାଲିଛି। ଡ୍ୟୁଟିରେ ଥିବା କର୍ମଚାରୀଙ୍କ ଅବହେଳାରୁ ଏଭଳି ଘଟଣା ଘଟିଛି। ଏ ନେଇ ସଂପୃକ୍ତ ଜେଲ ୱାର୍ଡର ସଞ୍ଜିିତ କୁମାର ନାୟକ ଓ ବିଜୟ କୁମାର ନାୟକଙ୍କୁ କାରଣଦର୍ଶାଅ ନୋଟିସ କରାଯାଇଥିବା ସେ କହିଛନ୍ତି।