ବାଲୁଗାଁ,୧୮ା୧୧(ଡ଼ି.ଏନ.ଏ.): ଚିଲିକା ତଥା ସମୁଦ୍ର ତଟ ସୁରକ୍ଷା ଦିଗରେ ମତ୍ସ୍ୟଜୀବୀଙ୍କ ଭୂମିକା ଗୁରୁତ୍ୱପୂର୍ଣ୍ଣ। ଜଳପଥରେ ସେମାନେ ହେଲେ କର୍ଣ୍ଣଧାର ତଥା ଆଖି ଓ କାନ ସଦୃଶ। ନୌସେନା ବିଭାଗ ଓ ମତ୍ସ୍ୟଜୀବୀଙ୍କ ମଧ୍ୟରେ ବନ୍ଧୁତ୍ୱପୂର୍ଣ୍ଣ ସମ୍ପର୍କ ଓ ସମନ୍ବୟ ରହିପାରିଲେ ତଟରକ୍ଷା କ୍ଷେତ୍ରରେ କୌଣସି ଅଘଟଣ ଏଡ଼ାଇବା ସହଜ ହେବ। ରବିବାର ସ୍ଥାନୀୟ ବଡ଼କୁଳଠାରେ ଅନୁଷ୍ଠିତ ନୌଚାଳନା ପ୍ରତିଯୋଗିତା ଅବସରରେ ଭାରତୀୟ ନୌସେନା ଚିଲିକା ଶାଖା ଅଧିକାରୀ ତଥା କମୋଡ଼ର ଋତୁରାଜ ସାହୁ ମୁଖ୍ୟଅତିଥି ଭାବେ ଯୋଗଦେଇ ଉପସ୍ଥିତ ଗଣମାଧ୍ୟମ ପ୍ରତିନିଧିଙ୍କ ଆଗରେ ଏହା ପ୍ରକାଶ କରିଛନ୍ତି।
ଭାରତୀୟ ନୌସେନା ବିଭାଗର ୪୦ତମ ସ୍ବନକ୍ଷତ୍ର ଦିବସ ଉପଲକ୍ଷେ ନୌସେନା ଓ ଜିଲା ମତ୍ସ୍ୟ ବିଭାଗର ମିଳିତ ଆନୁକୂଲ୍ୟରେ ବଡ଼କୁଳ ପାନ୍ଥନିବାସ ଜେଟିଠାରେ ସ୍ଥାନୀୟ ମତ୍ସ୍ୟଜୀବୀଙ୍କୁ ନେଇ ନୌଚାଳନା ପ୍ରତିଯୋଗିତା ଅନୁଷ୍ଠିତ ହୋଇଥିଲା। କମୋଡ଼ର ସାହୁ ପ୍ରତଯୋଗିତା ଉଦ୍ଘାଟନ କରିଥିଲେ। କାତମରା ଓ ଆହୁଲା ଦୁଇ ପର୍ଯ୍ୟାୟରେ ନୌଚାଳନା ପ୍ରତିଯୋଗିତା ହୋଇଥିଲା। ଆହୁଲାରେ ୧୦ ଓ କାତମରାରେ ୯ଟି ଦଳ ଅଂଶଗ୍ରହଣ କରିଥିଲେ। ପ୍ରତି ଦଳରେ ଜଣେ ଦଳପତିଙ୍କ ସହ ୬ଜଣ ପ୍ରତିଯୋଗୀ ଭାଗ ନେଇଥିଲେ। ଚିଲିକା ମଧ୍ୟସ୍ଥ ଜଟିଆନାଶି ପାହାଡ଼ଠାରୁ ବଡ଼କୁଳ ପାନ୍ଥନିବାସ ପର୍ଯ୍ୟନ୍ତ ପ୍ରାୟ ଦେଢ଼କିଲୋମିଟର ମଧ୍ୟରେ ଏହି ପ୍ରତିଯୋଗିତା ହୋଇଥିଲା। ପ୍ରାରମ୍ଭରେ ଅନୁଷ୍ଠିତ ଆହୁଲା ପ୍ରତିଯୋଗିତାରେ ମା’ନାରାୟଣୀ ଟିମ୍ (ଶାନ୍ତିନଗର) ପ୍ରଥମ, ମା’କାଳିଜାଇ ଟିମ୍ (ଶାନ୍ତିନଗର) ଦ୍ୱିତୀୟ ଓ ହରିଚାନ୍ଦ ଠାକୁର ଟିମ୍ (ସନ୍ନ୍ୟାସୀନଗର) ତୃତୀୟ ସ୍ଥାନ ଅଧିକାର କରିଥିଲେ। ସେହିପରି କାତମରା ପ୍ରତିଯୋଗିତାରେ ଜୟନ୍ତପୁର ଟିମ୍ ପ୍ରଥମ, ମା’ ଚିଲିକାରାଣୀ ଟିମ୍ (ଚନ୍ଦ୍ରାପୁଟ) ଦ୍ୱିତୀୟ ଓ ଗଙ୍ଗାଦେବୀ ଟିମ୍ (ପଥରା,ଗଞ୍ଜାମ) ତୃତୀୟ ସ୍ଥାନ ହାସଲ କରିଥିଲେ। କମୋଡ଼ର ସାହୁ କୃତିତ୍ୱ ଅର୍ଜନ କରିଥିବା ଟିମ୍କୁ ଯଥାକ୍ରମେ ୧୦ହଜାର, ୬ହଜାର ଓ ୩ହଜାର ଟଙ୍କା ସହ ଟ୍ରଫି ପ୍ରଦାନ କରିଥିଲେ। ନୌସେନା ବିଭାଗର ବହୁ ଅଧିକାରୀ, ବାଲୁଗାଁ ଏସ୍ଡ଼ିପିଓ ସୁରେଶ କୁମାର ଦାଶ, ଆଇଆଇସି ରମାକାନ୍ତ ମହାଲିକ୍ଙ୍କ ସମେତ ପାନ୍ଥନିବାସ କର୍ତ୍ତୃପକ୍ଷ, ସ୍ଥାନୀୟ ଡ଼ଙ୍ଗା ମାଲିକ ସଂଘର ସଦସ୍ୟ ବୃନ୍ଦ ଓ ମତ୍ସ୍ୟଜୀବୀ ଉପସ୍ଥିତ ରହି ସହଯୋଗ କରିଥିଲେ।
