କଣିହାଁ,୩।୮(ଡି.ଏନ.ଏ.) କଣିହାଁ ବ୍ଲକସ୍ଥିତ ଏନ୍ଟିପିସି ବିଦ୍ୟୁତ୍ ପ୍ରକଳ୍ପରେ ୨୫ ବର୍ଷରୁ ଊର୍ଦ୍ଧ୍ୱ ହେବ ଜମି ହରାଇଥିବା ୧୨ଟି ପରିବାର ମୁଖିଆମାନେ ସ୍ଥାୟୀ ନିଯୁକ୍ତି ଦାବିରେ ଶୁକ୍ରବାର ଏନ୍ଟିପିସି ଟାଉନ ଥାନା ଅଞ୍ଚଳ ଆମ୍ବପାଳ ରେଲଓ୍ବେ କ୍ରସିଂ ରେଳ ଧାରଣାରେ ବସି ଆନ୍ଦୋଳନ କରିଥିଲେ। ଏହି ଆନ୍ଦୋଳନକୁ ସମର୍ଥନ ଜଣାଇ ଆଇନଜୀବୀ ଦୟାସାଗର ମିଶ୍ର, ଭାଜପା ଶ୍ରମିକ ନେତା ବିରଞ୍ଚି ସାହୁ ସାମିଲ ହୋଇଥିଲେ। ଖବରପାଇ ମାଜିଷ୍ଟ୍ରେଟ ଦାୟିତ୍ୱରେ ଥିବା ଅତିରିକ୍ତ ତହସିଲଦାର, ଥାନା ଅଧିକାରୀ ରାଜେନ୍ଦ୍ର ମହାପାତ୍ର ଘଟଣାସ୍ଥଳରେ ପହଞ୍ଚି ଶନିବାର ସମସ୍ୟା ସମାଧାନ ପାଇଁ ତାଳଚେର ଉପଜିଲାପାଳଙ୍କ କାର୍ଯ୍ୟାଳୟରେ ଆଲୋଚନା ହେବ ବୋଲି ପ୍ରତିଶ୍ରୁତି ଦେବା ପରେ ଅପରାହ୍ନରେ ଆନ୍ଦୋଳନ ସ୍ଥଗିତ ରହିଥିବା ଶ୍ରମିକ ନେତା ବିରଞ୍ଚି ସାହୁ ପ୍ରକାଶ କରିଛନ୍ତି। ଏ ନେଇ ଏନ୍ଟିପିସି ଜନ ସମ୍ପର୍କ ଅଧିକାରୀ ଅମିତ ବେହେରା କହିଛନ୍ତି, ୧୨ଟି ପରିବାର ଆନ୍ଦୋଳନରେ ସାମିଲ ହେବା ଯଥାର୍ଥ ନୁହେଁ। କାରଣ ଏମାନଙ୍କ ଦାବିକୁ ନେଇ ସୁପ୍ରିମକୋର୍ଟରେ ମାମଲା ବିଚାରଧୀନ ରହିଛି। ଏନ୍ଟିପିସି କର୍ତ୍ତୃପକ୍ଷ ଆଲୋଚନାରେ ଅଂଶଗ୍ରହଣ କରି ବିଚାର କରିବେ ବୋଲି ମତ ପ୍ରକାଶ କରିଥିଲେ।
