ଦୁଇ ନାବାଳିକାଙ୍କ ସମେତ ୪୧ ଶିଶୁ ଶ୍ରମିକ ଉଦ୍ଧାର
8:12 amMarch 1, 2020 / 21

ବ୍ରହ୍ମପୁର ଅଫିସ,୧ା୩ – ଶିଶୁ ଶ୍ରମିକ ଉଦ୍ଧାର ଓ ଥଇଥାନ ପାଇଁ ଅନେକ ଯୋଜନା କରାଯାଇଛି। ଏବେ ଶିଶୁ ଶ୍ରମିକ ଉଦ୍ଧାର ପାଇଁ ବ୍ରହ୍ମପୁର ପୋଲିସ ଜିଲାରେ ବଚପନ୍‌ ବଚାଓ ଆନ୍ଦୋଳନ ଆରମ୍ଭ ହୋଇଛି। ଏଥିରେ ଜିଲା ଶ୍ରମ ଅଧିକାରୀ, ଶିଶୁ ସୁରକ୍ଷା ଅଧିକାରୀ, ଶିଶୁ ମଙ୍ଗଳ କମିଟି ସଦସ୍ୟ, ଜୁଭେନାଇଲ ପୋଲିସ ଅଧିକାରୀ ଓ ଚାଇଲ୍ଡ ଲାଇନ କର୍ମକର୍ତ୍ତାଙ୍କୁ ନେଇ ୫ ଜଣିଆ ସ୍କ୍ବାଡ୍‌ ଗଠିତ ହୋଇଛି। ଏହି ସ୍ବତନ୍ତ୍ର ଡ୍ରାଇଭ ଗତ ମଙ୍ଗଳବାରରୁ ବ୍ରହ୍ମପୁର ପୋଲିସ ଜିଲାରେ ଆରମ୍ଭ ହୋଇଥିଲା। ଶନିବାର ଶେଷ ଦିନରେ ଏହି ସ୍କ୍ବାଡ୍‌ ଜରଡ଼ା ଥାନା ଇଲାକାରେ ଥିବା ବିଭିନ୍ନ ସ୍ଥାନରେ ଚଢାଉ କରିଥିଲେ ମଧ୍ୟ କୌଣସି ଶିଶୁ ଶ୍ରମିକ ଉଦ୍ଧାର ହୋଇ ପାରି ନ ଥିବା ଜଣାପଡିଛି। ବ୍ରହ୍ମପୁର ପୋଲିସ ଜିଲା ଅନ୍ତର୍ଗତ ୧୦ ଥାନା ଇଲାକାରେ ବିପଜ୍ଜନକ ଓ ଅସ୍ବାସ୍ଥ୍ୟକର ପରିବେଶରେ କାମ କରୁଥିବା ଦୁଇ ଜଣ ନାବାଳିକା ଶିଶୁ ଶ୍ରମିକଙ୍କ ସମେତ ୪୧ ଜଣଙ୍କୁ ଉଦ୍ଧାର କରାଯାଇଛି ବୋଲି ଜିଲା ଶ୍ରମ ଅଧିକାରୀ ବାବୁ ଚରଣ ପାତ୍ର ସୂଚନା ଦେଇଛନ୍ତି। ବୈଦ୍ୟନାଥପୁର ଥାନା ଇଲାକାରୁ ୭ ଶିଶୁ ଶ୍ରମିକଙ୍କୁ ଉଦ୍ଧାର କରାଯାଇଥିବା ବେଳେ ଗୋଷାଣୀନୂଆଗଁା ଥାନା ଇଲାକାରୁ ୬, ଟାଉନ ଥାନା ଇଲାକାରୁ ୧୧, ବଡବଜାର ଅଞ୍ଚଳରୁ ୮ ଶିଶୁ ଶ୍ରମିକ ଓ ଜଣେ ନାବାଳିକାଙ୍କୁ ଉଦ୍ଧାର କରାଯାଇଛି। ସେହିପରି ଗୋପାଳପୁର ଥାନା ଅଞ୍ଚଳରୁ ଜଣେ, ଗୋଳନ୍ଥରା ଥାନା ଅଞ୍ଚଳରୁ ୩, ସଦର ଥାନା ଅଞ୍ଚଳରୁ ଜଣେ ନାବାଳିକା, ଦିଗପହଣ୍ଡି ଥାନା ଅଞ୍ଚଳରୁ ଜଣେ ଓ କେ.ନୂଆଗଁା ଥାନା ଅଞ୍ଚଳରୁ ୨ ଶିଶୁ ଶ୍ରମିକ ଉଦ୍ଧାର ହୋଇଥିଲେ। ଉଦ୍ଧାର ଶିଶୁ ଶ୍ରମିକମାନଙ୍କୁ ଶିଶୁ ମଙ୍ଗଳ ଅଧିକାରୀଙ୍କ ନିକଟରେ କାଉନ୍‌ସେଲିଂ ପରେ ତାଙ୍କ ପରିବାର ଲୋକଙ୍କୁ ହସ୍ତାନ୍ତର କରାଯାଇଥିବା ଜଣାପଡିଛି। ଅନ୍ୟପଟେ ଉଦ୍ଧାର ଶିଶୁ ଶ୍ରମିକମାନେ କହିଛନ୍ତି, ପାରିବାରିକ ଆର୍ଥିକ ସ୍ଥିତି ଭଲ ନ ଥିବାରୁ ଆମେ ବିଭିନ୍ନ ସ୍ଥାନରେ କାମ କରୁଥିଲୁ। ଦିନକୁ ଖାଇବା ଓ ରହିବା ସୁବିଧା ସହ ୧୦୦ ରୁ ୨୦୦ ଟଙ୍କା ମିଳୁଥିଲା ବାପା ମା’ଙ୍କ ସହମତିରେ ଆମେ ଏଠାରେ କାମ କରୁଥିଲୁ ବୋଲି ସେମାନେ କହିଛନ୍ତି।