ହାଇଦ୍ରାବାଦ,୪।୬: ଓସମାନିଆ ମେଡିକାଲ କଲେଜ ସହ ସହବଦ୍ଧ ଥିବା ହସ୍ପିଟାଲରେ ପାଖାପାଖି ୩୨ ଜଣ ଡାକ୍ତର କରୋନାରେ ପୀଡ଼ିତ ହୋଇଥିବା ଜଣାପଡିଛି। ଗୁରୁବାର ତେଲଙ୍ଗାନା-ଜୁନିୟର ଡକ୍ଟରର୍ସ ଆସୋସିଏଶନ(ଟି-ଜେୟୁଡିଏ)ପକ୍ଷରୁ ଏହି ସୂଚନା ଦିଆଯାଇଛି। ଏହାର ସଭାପତି ଉମା ନଗେନ୍ଦ୍ର ବିଷ୍ଣୁ କହିଛନ୍ତି ରାଜ୍ୟରେ ବେଳକୁ ବେଳ କରୋନା ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଉଥିବା ବେଳେ ଆହୁରି କିଛି ଟେଷ୍ଟ ରିପୋର୍ଟ ମଧ୍ୟ ଏପର୍ଯ୍ୟନ୍ତ ଆସିନାହିଁ। ଏହା ଆସିବା ପରେ ସଂକ୍ରମିତଙ୍କ ସଂଖ୍ୟା ବଢିପାରେ ବୋଲି ଅନୁମାନ କରାଯାଉଛି। ଡାକ୍ତରମାନେ ସଂକ୍ରମିତ ହେବା ପରେ ଏବେ ଏହି ଆଗଧାଡିର କରୋନା ଯୋଦ୍ଧା ସରକାରଙ୍କ ସାହାଯ୍ୟ ଲୋଡିଛନ୍ତି। ସେମାନେ ୭ ଦିନ କ୍ୱାରାଣ୍ଟାଇନ ମାଗିବା ସହ କରୋନା ରୋଗୀଙ୍କୁ ଚିକିତ୍ସା କରିବା ସମୟରେ ଡାକ୍ତର ଓ ସ୍ବାସ୍ଥ୍ୟକର୍ମୀଙ୍କୁ ପିପିଇ ସହ ଏନ୍-୯୫ ମାସ୍କ ଦେବାକୁ କହିଛନ୍ତି। ସରକାର ମଧ୍ୟ ଏକ କମିଟି ଗଠନ କରି ଏମାନଙ୍କୁ ସମସ୍ତ ପ୍ରକାର ସୁବିଧା ଯୋଗାଇ ଦେବାକୁ ଚେଷ୍ଟା କରିଥିବା ଜଣାପଡିଛି।
