ଲକ୍ଷ୍ନୌ: କରୋନା ରୋଗୀଙ୍କୁ ଚିକିତ୍ସା କରୁଥିବା ଡାକ୍ତରଙ୍କ ସେବା ଓ ନିଷ୍ଠାପର କାମକୁ ସମ୍ମାନ ଜଣାଇବା ପାଇଁ ଆସିଛି ଡକ୍ଟର ମ୍ୟାଙ୍ଗୋ। କଥାଟା ଶୁଣିବାକୁ ହୁଏତ ଟିକିଏ ଅଡୁଆ ଲାଗିପାରେ। କିନ୍ତୁ ଏଭଳି ଏକ ଆମ୍ବ ଏବେ ବଜାରକୁ ଆସିଛି ଖାସ୍ ଡାକ୍ତରଙ୍କ ସେବାକୁ ମନେପକାଇ ସେମାନଙ୍କୁ ସମ୍ମାନ ଦେବା ପାଇଁ। ଏଭଳି ଏକ ଆମ୍ବ କିସମ ତିଆରି କରିଛନ୍ତି ମ୍ୟାଙ୍ଗୋ ମ୍ୟାନ୍ ହାଜି କାଲିମୁଲ୍ଲା। ସେ ହେଉଛନ୍ତି ଉତ୍ତରପ୍ରଦେଶ ଲକ୍ଷ୍ନୌସ୍ଥିତ ମାଲିହାବାଦର ବାସିନ୍ଦା। ପ୍ରାୟ ୩୦୦ରୁ ଅଧିକ କିସମର ଆମ୍ବ ଚାଷ କରି ସଫଳ ହୋଇଛନ୍ତି ହାଜି। ସେଥିପାଇଁ ମ୍ୟାଙ୍ଗୋ ମ୍ୟାନ୍ଭାବେ ସ୍ଥାନୀୟ ଅଞ୍ଚଳରେ ସେ ବେଶ୍ ପରିଚିତ। ସ୍ବତନ୍ତ୍ର ଭାବରେ ଆମ୍ବଚାଷ କରି ସଫଳତା ହାସଲ କରିଥିବା ଏହି ଆମ୍ବ ଚାଷୀ ଜଣକ ଆଧୁନିକ ପ୍ରଣାଳୀ ଆପଣାଇ ଗୋଟିଏ ଗଛରେ ୩୦୦ ପ୍ରକାରର ଆମ୍ବ ସୃଷ୍ଟି କରି ଉଲ୍ଲେଖନୀୟ ସଫଳତା ହାସଲ କରିଛନ୍ତି। ସେଥିପାଇଁ ତାଙ୍କୁ ପଦ୍ମଶ୍ରୀ ସମ୍ମାନ ବି ମିଳିଛି। ଏବେ ଏହି ମ୍ୟାଙ୍ଗୋ ମଣିଷ ଦଶହରି ଆମ୍ବର ଆଉ ଏକ ନୂଆ କିସମ ସୃଷ୍ଟି କରିଛନ୍ତି, ଯାହାର ନାଁ ରଖିଛନ୍ତି ଡକ୍ଟର ମ୍ୟାଙ୍ଗୋ। ଏଭଳି ନାଁ ରଖି ସେ ଦେଶରେ କରୋନା ରୋଗୀଙ୍କୁ ଚିକିତ୍ସା କରୁଥିବା ଡାକ୍ତରମାନଙ୍କୁ ସମ୍ମାନ ଜଣାଇବାକୁ ଚାହୁଁଥିବା କହିଛନ୍ତି। ବିଭିନ୍ନ ନୂଆ କିସମ ଆମ୍ବର ସ୍ବତନ୍ତ୍ର ନାଁ ପାଇଁ ମ୍ୟାଙ୍ଗୋ ମ୍ୟାନ୍ ହାଜି ବେଶ୍ ଜଣାଶୁଣା। ତାଙ୍କର ବିଭିନ୍ନ ପ୍ରକାର ଆମ୍ବର ନାଁ ଯଥା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ଗୃହମନ୍ତ୍ରୀ ଅମିତ ଶାହା, ବଲିଉଡ୍ ଅଭିନେତ୍ରୀ ଐଶ୍ୱର୍ଯ୍ୟା ରାୟ ବଚ୍ଚନ, ସଚିନ୍ ତେନ୍ଦୁଲକର ଆଦି ରହିଛି।
